Menyadi Ivan Puyda ngenang pasal lebuh iya agi mit. Tiap lemai, lebuh apai iya pulai ke rumah, iya macha bup My Book of Bible Stories ngagai Ivan enggau tujuh iku menyadi iya. Iya mega ingat lebuh iya nginjil enggau apai iya ba kampung sida, iya nya Kvitok. Maya nya, Ivan suah ngabas bala pengajar sereta orang ke sama sekula enggau iya. Lebuh umur iya bebelas taun, iya nitihka aki iya ari sepiak indai, Menyadi Pyotr Partsey, ngagai endur ke enda kala alai nginjil. Lebuh maya nya, iya belajar ari aki iya ti ransing nginjil sereta sanggup nyerahka diri ke orang bukai.

Menyadi Ivan suah meda apai enggau aki iya macha Bup Kudus enggau litaricha Bup Kudus. Nyadi, iya mutuska deka nunda teladan seduai iya.

Menyadi Ivan diatu udah beumur 41 taun. Amat, iya nunda teladan apai enggau aki iya, tang enggau siti chara ti enda disadang. Baka seduai iya, Ivan pan udah ditangkap sereta dijil ketegal nyembah Jehovah. Bala pegawai Federal Security Service (FSB) nangkap Menyadi Ivan kena 30 Mei 2018. Iya lalu dijil pengelama empat bulan. Pengudah iya dilepaska, iya lalu ditan ba dalam rumah iya empu pengelama enam bulan. Aki iya, Menyadi Pyotr Partsey kala ditangkap lalu dijil perintah Nazi sereta perintah Soviet Union. Pia mega, apai Ivan, iya nya Menyadi Grigoriy Puyda, pan kala dijil perintah Soviet Union.

Menyadi Ivan Puyda madahka: “Ba 2 Timoti 3:14, Paul nulis, ‘Nuan enda tau enda majak bepegai ba utai ti udah dipelajar sereta dikarapka nuan laban nuan nemu sapa ke udah ngajar nuan utai nya.’ Lebuh aku ngingatka diri, sapa meh ke ngajar aku pemendar, nya meri aku pengering. Nadai perintah tauka ukum jil ulih nagang sida ari nyembah Jehovah. Pia mega, perinsa ke diasaika kitai sigi nemu abis. Diatu, aku idup nitihka singkang sida sereta utai ke diajar sida ngagai aku. Seagi aku mengkang taluk ngagai Jehovah, aku nemu iya deka nulung aku.” Diatu, Menyadi Ivan nganti kot ngaga pemutus pasal kes iya.

Iya pan bisi madah, seraya apai enggau aki iya ngenang pasal lebuh sida dijil, sida ukai bejakuka pemalat penusah ke diasaika sida ba dia. Tang sida deka agi nyerita pasal peluang meri saksi.

Grigoriy, iya nya apai Ivan, udah beumur 64 taun. Pengudah iya udah ditan ba kem pengawa berat pengelama setaun ketegal enggai nyadi soldadu ba Soviet Union, iya dibaptisa kena taun 1975. Iya dibibaska kena taun 1977. Tang iya dijil baru kena taun 1986 ketegal iya bisi litaricha Bup Kudus ke ditagang perintah. Apai Grigoriy empu, ke benama Ivan mega, ditan ba kem pengawa berat entara tuan 1944 nyentukka 1950 ketegal iya mengkang neutral.

Grigoriy madah: “Aku ulih tan natka pemerinsa nya ketegal pengarap ti teguh. Aku enda sekali-kali kakang ati pasal pemendar ke ditemu aku, tauka pasal Jehovah ti Petara ti bendar.”

Diatu anak iya, Ivan, mega ngasaika utai ti sama. Grigoriy nampung: “Aku agi ingat jeman Soviet Union suba. Utai ke nyadi kemayaharitu nyau sama aja. Nyadi, aku besampi ngambika Ivan mengkang taluk sekumbang penguji tu, sereta ngemuliaka nama Jehovah ketegal pengeliat ati iya.”

Aki Ivan, Menyadi Pyotr Partsey, udah nadai. Kena taun 1943, ketegal enggai nyain surat ti madahka iya ngelengkaka pengarap iya, Pyotr dianjung bala Nazi ngagai kem Majdanek dulu, lalu ngagai kem Ravensbrück mega. Lebuh perintah Nazi alah kena taun 1945, iya dibibaska. Tang, kena taun 1952 iya ditangkap baru lalu diukum bunuh. Taja pia, ukum nya diubah lalu iya dilepaska kena taun 1956. Menyadi Pyotr ditangkap sekali agi kena taun 1958 lalu dibibaska kena taun 1964.

Menyadi Ivan madahka: “Teladan aki aku ti tetap ati, ngeringka aku. Lebuh iya diangkat idup baru ila, aku deka madahka iya, aku mega napi penguji ti sama baka iya, lalu teladan iya meransang aku mengkang berani sereta tetap ati.”

Iya nampung: “Nadai orang ulih madamka pengerindu enggau pengarap aku ngagai Petara aku, Jehovah. Aku seruran madah ngagai penasat: ‘Nuan semina ulih nangkap lalu ngejil aku. Tang semua jaku emba nuan nadai asai ba aku.’”

Nama utai ke nulung menyadi ti dikesayau kitai napi semua penguji tu?

Ivan nerangka: “Ba Kereja Rasul 14:22 kitai macha, ‘Kitai endang enda tau enda ngasaika mayuh macham penusah enti kitai deka tama ngagai Perintah Petara.’ Tiap iku orang Kristian deka napi penguji. Engka penguji nya ukai ukum jil. Engka penguji nya sesiti penyakit, tauka pemati orang ke dikesayau. Tang enti kitai ngemuban runding ti positif sereta semak ngagai Jehovah, kitai ulih betan. Jehovah seruran besedia deka nyaup nembiak Iya.”

Apai Ivan, Grigoriy, nambah: “Keringka meh kaul nuan enggau Jehovah. Jadika meh Iya pangan nuan ti bendar. Utai ti beguna bendar iya nya, peratika bukti ti nunjukka kitai endang bisi pemendar. Nya baru kitai besedia deka ngereja sebarang utai ngambika terus nyembah Jehovah. Iya deka ngupah nuan laban bebendar nyembah Iya.”

Kitai amat diperansang macha pasal chara Jehovah udah nyukung menyadi kitai ke diperinsa ketegal pengarap. Kitai terus besampika bala menyadi kitai ba Rusia, awakka sida mengkang berani sereta bulih pengering ari semaya Jehovah ti madah: “Anang takut . . . Aku deka nyaga nuan, lalu meri nuan upah ti besai.”—Pemungkal 15:1.