Kena 19 January 2021, Kot Pelilih Kemerovo nulak peminta Menyadi Sergey Britvin enggau Menyadi Vadim Levchuk ke ngapil ukum jil ke kala diberi ngagai seduai iya. Diatu, ukum asal nya deka dipejalaika, iya nya seduai iya dijil pengelama empat taun. Timpuh alai seduai iya udah ditan nganti kes nya dipechara sereta maya ditan ba rumah diri, nyau udah lebih tiga taun. Ketegal tu, seduai iya nyangka deka dibibaska ari rumah jil dalam setaun. Taja pan napi pemerinsa tu, seduai iya keran deka mengkang taluk.

Seduai iya enggau berani meri jaku penutup maya kes nya keterubah iya dipechara. Seduai iya nerangka pasal pengarap ngagai Jehovah sereta penguntung ke diulih sida ari nyembah Iya.

Ku Sergey madah ngagai bala ba kot: “Nama utai kedeka penawa ari aku? Kati iya dekaka aku nulak pengarap diri? Pengarap nya meh ke udah ngasuh aku nyadi orang ti menyana sereta rayat menua Rusia ti manah. Aku beterima kasih ngagai Petara, laban iya udah ngemujurka pengidup aku, sereta nyelematka tikah aku. Ketegal Jehovah, pengidup aku bisi reti lalu aku bisi pengadang ke jemah ila. Utai ti pemadu berega ba aku iya nya, kaul aku enggau Petara, Jehovah. Aku deka seruran nyaga kaul nya, enda ngira nama tuduh bula ke dipadah pasal aku.”

Ku Vadim: “Ba aku, kenyau ari aku ditangkap nyentukka diatu, aku ngasaika pengelantang ti ngalitka ati, laban Jehovah bisi ngimbai aku, lalu aku pan bepiak enggau Iya! Enda ngira nama pemutus ke digaga kot tu, utai ti beguna bendar ba aku, iya nya runding Petara pasal aku. Enda ngira dini alai aku, aku seruran deka ngemansangka kualiti ti ngerinduka ati Petara baka pengerindu, pengaga, pemaik, pemanah ati, pengarap, penelap enggau penau nemu nagang diri.”