Kena 28 Ogos 2021, Menyadi Aleksandr Lubin enggau Anatoliy Isakov dilepaska pengudah ECHR minta ngagai piak Rusia ngelepaska sida. Taja pan dua iku menyadi tu timpang pendiau, sida ditan ba Begian Kurgan di Rusia pengelama sebulan setengah. Sida engka agi deka dijil pengudah kot meri pemutus pasal kes sida.

Kena 13 enggau 14 Julai 2021, mayuh rumah Saksi-Saksi Jehovah ba Begian Kurgan diserungkai. Bisi entara beberapa iku Saksi ke ditan nyengkaum Menyadi Isakov ke beumur 56 taun enggau Menyadi Lubin ke beumur 65 tuan.

Menyadi Lubin bisi penyakit vaskular, darah tinggi enggau penyakit autoimun ke nyerang organ tubuh iya. Tiap hari iya begunaka beberapa iti chara berubat, baka begunaka oksigen pengelama 16 jam. Tang semua nya enda diberi. Iya tusah deka bejalai sereta enda ulih angkat kediri. Bini iya, Tatyana, mega timpang pendiau sereta udah kena strok empat kali.

Menyadi Isakov bisi kanser darah sereta patah tulang belakang enggau tulang kerigai lalu begunaka kerusi roda. Sekumbang iya dijil, iya enda ulih nerima kemoterapi. Iya mega enda diberi orang ubat tan pedis. Sayau amat, Menyadi Isakov kena penyakit COVID-19 lebuh iya ditan.

Pengelama beminggu-minggu, bala luyar minta sida dilepaska tang bala kot tetap enggai ngereja nya. Bala hakim madahka pemutus bepelasarka surat ari doktor ba Sepital Begian Kurgan ke enda logik madahka sida nadai penyakit ti nyadi tegal sida enda ibuh dijil.

Kena 8 Ogos 2021 bala luyar madahka utai tu ngagai ECHR. Udah nya ECHR minta Opis Piak Bedawa Perintah Rusia ngelepaska seduai iya. Kena 24 Ogos 2021, dua iku menyadi tu dianjung baru ngagai Sepital Begian Kurgan. Kali tu bala lutur ngaku Menyadi Lubin enggau Isakov balat sakit lalu sida enda patut ditan.

Kitai deka besampi ke dua iku menyadi tu ke mengkang taluk ngagai Jehovah taja pan diperinsa sereta balat sakit. Kitai nemu Jehovah deka terus “meri pengering ngagai orang ke taluk ngagai Iya.”—2 Bansa Israel 16:9.