Kot Pelilih Birobidzhan ba Jewish Autonomous Region ngumbai Menyadi Alam Aliyev, Valeriy Kriger, Sergey Shulyarenko, enggau Dmitriy Zagulin besalah. Menyadi Alam diberi ukum jil pengelama enam taun setengah lalu Menyadi Dmitriy diberi ukum jil pengelama tiga taun setengah. Menyadi Valeriy enggau Sergey sama diberi ukum jil pengelama tujuh taun. Sida empat iku menyadi terus dibai ke rumah jil ari bengunan kot.

Alam Aliyev

• Ada: 1963 (Kampung Lyaki, Azerbaijan)

• Biograpi: Kala nyadi soldadu ke perintah Soviet Union ba menua Jerman. Udah nya iya nyadi orang ke berikan. Kena taun 1989 iya pindah ngagai Khabarovsk, Rusia. Diatu iya gawa ba kilang

  Enda lama pengudah iya pindah ke Rusia, iya berengkah belajarka Bup Kudus. Iya dibaptisa kena taun 1991. Iya jadi enggau bini iya Svetlana kena taun 2015. Seduai iya rindu bejalai sereta bemain ba luar rumah

Valeriy Kriger

• Ada: 1968 (Jewish Autonomous Region)

• Biograpi: Lebuh dibesaika, apai indai iya nadai bepegai ba nama-nama pengarap. Lebuh agi mit, iya rindu main gimnastik. Iya belajar nyadi tukang urut lalu diatu gawa ba klinik diri empu. Iya dibaptisa kena taun 1994. Iya jadi enggau Natalya kena taun 2017. Seduai iya rindu main volleyball sereta begulai bejalai ba luar rumah

Sergey Shulyarenko

• Ada: 1984 (Khabarovsk)

• Biograpi: Lebuh agi mit iya diau ba menua Turkmenistan laban apai iya gawa dia nyadi soldadu. Iya nyadi penulung orang ke ngaga mesin. Iya rindu ngelukis mua orang sereta belajarka bansa jaku bukai. Iya belajar pasal Jehovah ari indai iya. Lebuh beumur 13 taun iya dibaptisa kena taun 1997

Dmitriy Zagulin

• Ada: 1973 (Khabarovsk)

• Biograpi: Kenyau ari mit, iya bisi juluk ati ka nyadi soldadu. Iya belajarka chara nyaga diri sereta bekenaka payung terejun. Diatu iya gawa ke kompeni ti ngaga jalai kerita api. Kena taun 1991 iya berengkah belajarka Bup Kudus lalu dibaptisa kena taun 1992. Kena taun 2012 iya jadi enggau bini iya Tatyana

Kena 17 Mei 2018, 150 iku pegawai piak ti bekuasa bejalaika operasi ke dikumbai “Hari Pechara” ba Birobidzhan. Menyadi Alam Aliyev dituduh “ngatur pengawa gerempung ekstremis” lalu ditan pengelama lapan hari. Menyadi Valeriy Kriger, Sergey Shulyarenko, enggau Dmitriy Zagulin pan dituduh ngereja pengawa jenayah. Semua sida empat iku ditagang ari pansut ari nengeri alai sida diau. Nambahka nya, bini Alam, bini Valeriy enggai bini Dmitriy pan dituduh ba kes jenayah ke bukai.

Sebedau Alam ditangkap, iya udah mansik pasal chara natka diri diperinsa. Iya mega bekunsika utai ke dipelajar iya enggau menyadi bukai ba eklisia iya. Ku iya: “Aku meransang bala menyadi, anang meh alah ketegal takut ke pemerinsa. Randau kami nya amat ngena, laban chun-chun seminggu pengudah nya, 21 buah rumah menyadi ari eklisia kami diserungkai.”

Ketegal disekat, Valeriy enggau bini iya Natalya enda ulih datai konvensyen Saksi-Saksi Jehovah ba Seoul, Korea Selatan baka ke diperambu seduai iya. Pia mega, seduai iya pan enda ulih ngabas apai indai iya ke diau ba menua Israel. Sayau amat, apai iya udah nadai kena Februari 2019. Beberapa bulan sebedau nya, indai iya beputung ba tulang belakang lalu patut diintu sepemanjai hari. Valeriy ngasaika Jehovah meh ke nyukung sida maya nya. Taja pan apai indai iya ukai Saksi Jehovah, tang bala menyadi Kristian Valeriy ke diau ba Israel nulung ngibun indai iya dia. Ku Valeriy nerangka: “Kami besampi ngagai Jehovah pasal penanggul indai aku, lalu Jehovah nyaut sampi kami. Bala menyadi kami ba Israel meransang sereta ngelantangka ati indai aku. Sida ngabas iya, berandau enggau iya, indah mai iya datai begempuru. Taja pan kami duai enda ulih kia kena nulung indai aku, tang kami ngasaika tulung Jehovah ke diberi nengah bala menyadi Kristian di serata dunya.”

Pemerinsa ke ditapi bala menyadi kitai ba Birobidzhan ngasuh Dmitriy pechaya agi ngagai siti utai ke endang udah ditemu iya. Ku iya nerangka: “Lebuh kitai nadai penanggul sereta nadai utai nekul kitai ari nyembah Jehovah, kitai engka enda entu beterima kasih ke peluang ke dikembuan kitai nyembah Iya, sereta utai ke diterima kitai kena ngeringka pengarap. Tang lebuh pengelepas kitai dikachau piak ti bekuasa, nya baru kitai nyau sedar, diatu meh kitai enda tau enda enggau naka ulih ngeringka kaul enggau Jehovah sereta nyediaka diri ke pemerinsa ti deka datai. Nya meh kebuah diatu kitai patut ngena pengelepas ke dikemisi kitai ‘nyimpan pengaya . . . di serega.’ Tu deka nulung kitai betan nyentukka ujung sereta ngetanka pengarap diri.”—Matthew 6:20.

Endang terang, Jehovah ngeringka bala menyadi kitai ba Rusia enggau “kuasa ti besai,” ngambika sida ulih betan.—2 Korint 4:7.