20 DISEMBER 2021
RUSIA

BERITA TI PEMADU BARU | Empat Iku Menyadi Lelaki Nganti Pemutus Pasal Kes Sida Pengudah Mayuh Amat Rumah Diserungkai ba Begian Trans-Baikal

TEBAH

Kena 20 September 2022, Kot Begian Trans-Baikal nulak kes apil ari Menyadi Vladimir Ermolaev, Sergey Kirilyuk, Igor Mamalimov, enggau Aleksandr Putintsev. Vladimir, Igor, enggau Aleksandr agi ba dalam jil diatu. Sergey enda nyadi dijil ke diatu.

Kena 6 Jun 2022, Kot Pelilih Chita ngumbai Vladimir, Sergey, Igor, enggau Aleksandr besalah. Sergey diberi ukum jil pengelama enam taun ti ditangguh. Vladimir, Igor, enggau Aleksandr sama diberi ukum jil pengelama enam taun setengah. Sida deka dijil kenyau ari diatu.

Garis Timpuh

16 Mac 2021

Kes jenayah berengkah dipechara ba kot
2 Februari 2021

Vladimir, Sergey, Igor, enggau Aleksandr dituduh ngatur pengawa gerempung ke ditagang
3 April 2020

Vladimir bibas ari ditan ba rumah
15 Februari 2020

Sergey dilepaska pengudah iya ditan pengelama lima hari
12 Februari 2020

Igor enggau Aleksandr dilepaska ari endur sida ditan. Timpuh Sergey ditan dikemanjaika 72 jam da agi. Vladimir ditan ba rumah diri pengelama 52 hari
10 Februari 2020

Bala pegawai FSB nyerungkai 50 buah rumah Saksi-Saksi Jehovah ba Begian Trans-Baikal. Tu nyengkaum rumah sekeda Saksi ke tuai tauka timpang pendiau. Ba siti kes, seiku menyadi lelaki ke baruh umur dijamah di mua indai enggau menyadi indu iya ke biak. Seiku menyadi lelaki ke bukai balat amat dijamah. Ke pengujung iya, bala FSB nangkap sepuluh iku menyadi lelaki nyengkaum Igor, Aleksandr, Sergey, enggau Vladimir

Profil

Sergey Kirilyuk

Ada: 1972 (Cheremkhovo, Begian Irkutsk)

Biograpi: Dibesaika ba ruang bilik ti besai. Bisi lima iku menyadi bukai. Gawa nyadi tukang welding. Jadi enggau Olga kena taun 1992. Seduai iya bisi tiga iku anak

Pengudah taun 1995, Sergey seduai Olga bisi minat pasal Bup Kudus. Dibaptisa kena taun 1998

Interbiu

Ulah nuan lebuh ditan meri empas ti baka ni ngagai orang bukai?

Bisi seiku orang bukai dalam sil aku ke udah mayuh kali dijil. Iya nyau dijil kenyau ari iya udah besai tuai. . . . Tiap kali aku ditasat lalu pulai baru ngagai sil, iya nanya aku: “Kati nuan alah, lalu madahka sida utai ke deka ditemu sida?” lalu aku nyaut iya: “Enda.” Iya bebasaka aku. Maya nya [piak bekuasa] nasatka aku sepemanjai hari lalu enggai meri aku pemakai. Tang orang ke sama sil enggau aku ngumpul sekeda pemakai ke aku lalu meri ke aku lebuh aku pulai. Aku nadai kala enda chukup pemakai.

Igor Mamalimov

Ada: 1976 (Ilishevsky, Republik Bashkortostan)

Biograpi: Dibesaika ba ladang besai enggau dua iku menyadi. Iya main accordion. Gawa part-time nirika bengunan sereta nyadi mekanik kerita. Jadi enggau Natalya kena 2007. Seduai iya bisi tiga iku anak

Dalam urung taun 2000 iya nyadi sakit lalu menyadi indu iya ke biak mati. Ketegal nya, iya bisi mayuh tanya pasal Petara, pengidup enggau pemati. Iya tetemuka saut lebuh belajarka Bup Kudus enggau Saksi-Saksi Jehovah. Dibaptisa kena taun 2008

Interbiu

Baka ni kita sebilik nyadi semak agi ngagai Jehovah sekumbang penguji tu?

Kami sebilik udah nyadi rapat agi enggau pangan diri sereta rapat agi enggau Jehovah. Bala anak kami ngaga mayuh pemansang ba pengarap. Sida amat rinduka Jehovah. . . . Diatu, komen sida ba gempuru manah agi, lalu sida nanya mayuh tanya ti manah. . . . Sida suah besampi ngagai Jehovah lalu madahka kami baka ni chara Jehovah udah nyaut sampi sida. Penguji tu udah ngubah pengidup kami, tang semua kami sebilik bulih mayuh utai ti manah ari pengalaman tu.

Aleksandr Putintsev

Ada: 1974 (Verkhnyaya Khila, Begian Trans-Baikal)

Biograpi: Iya anak tunggal. Iya rindu macha sereta ngambi gambar. Jadi enggau Galina kena taun 1994. Seduai iya bisi siti bisnes sereta bisi seiku anak lelaki

Dalam urung taun 1990, iya nyau sedar sida sebilik merinsa ketegal iya balat ngirup. Iya berengkah belajarka Bup Kudus lalu ngasaika pengidup iya berubah lebuh ngena utai ke udah dipelajar iya. Dibaptisa kena taun 1997

Interbiu

Baka ni sampi udah nulung nuan?

Lebuh keterubah iya aku ditasat, nya amat nguji pengarap aku. Aku amat kesal. Maya nya aku mayuh besampi. Aku mega nemu mayuh kaban enggau diri sebilik mega besampi ke aku. Aku agi ingat, aku besampi sepemanjai pejalai aku ngagai endur aku deka ditasat. Lebuh aku ba opis penasat, aku berasai tenang sereta andalka Jehovah benung nyukung aku. Tiap kali aku ditasat pengudah nya, pengandal aku ngagai Jehovah majak nambah.

Awakka semua kitai neladan pengarap bala menyadi kitai ke dikesayau. Baka Daniel enggau tiga iku kaban iya, sida “mutuska runding” mengkang tetap ati ngagai Jehovah taja pan balat ditekan piak bekuasa.—Daniel 1:8.

Nuan Engka Rindu Meda Tu

BERITA TI PEMADU BARU

Dijil Ketegal Pengarap Sida—Rusia

Pegawai ari opis ti nyaga pengelikun dalam menua (FSB) nangkap Dennis Christensen laban iya sama enggau pengawa begempuru Saksi-Saksi Jehovah ke enda ngachau orang ba Oryol, Rusia.

BERITA TI PEMADU BARU