Yuriy Belosludtsev

• Ada: 1964 (Smidovich, Jewish Autonomous Region)

• Biograpi: Iya dibesaika ini iya ba sebuah kampung mit. Iya kala gawa nyadi injinir ba kompeni tenaga. Iya rindu nginti sereta bemain ski

  Kena taun 1985 iya jadi enggau bini iya Yelena. Semaya Petara deka munaska penyai enggau pemerinsa ngerinduka ati seduai iya. Seduai iya pan alit ati belajar pasal jaku benabi Bup Kudus ke udah dikeamatka. Ketegal tu, seduai iya setuju deka belajarka Bup Kudus. Iya dibaptisa kena taun 1994

Sergey Sergeyev

• Ada: 1955 (Dukhovnitskoye, Begian Saratov)

• Biograpi: Iya gawa ba lumbung arang nyentukka iya badu agi kereja. Iya jadi enggau bini iya Nelly kena taun 1991. Seduai iya bisi dua iku anak indu enggau seiku anak lelaki. Seduai iya amat rindu ukui

  Seduai iya belabuh belajarka Bup Kudus enda lama pengudah kawin. Utai ti narit ati sida nya jaku lalau ti ngena, sereta jaku benabi Bup Kudus ke udah dikeamatka. Iya dibaptisa kena taun 1996

Kena 17 Mac 2019, bala pegawai Federal Security Service (FSB) nyelungkai mayuh rumah Saksi-Saksi Jehovah ba Luchegorsk di Begian Primorye. Bala menyadi lelaki enggau indu lalu ditasat. Sekeda ari sida lama ditasat, nyentukka tujuh jam. Yuriy seduai Sergey ditan.

Dua hari pengudah nya, seduai iya dianjung ngagai rumah jil alai orang ditan nyentukka kes sida dipechara ba kot. Dia meh seduai iya ditan pengelama lebih enam bulan. Pengudah dilepaska ari jil nya kena bulan September 2019, seduai iya ditan ba rumah diri empu nyauka lima bulan.

Seduai iya sama ngaku, sampi meh utai ke pemadu mayuh nulung sida napi pemerinsa dalam rumah jil nya. Sergey madahka ayat Bup Kudus pan nulung iya ngembuan runding ti positif. Ku iya: “Aku ngenang baru jaku Jesus ti madah: ‘Enti sida merinsaka aku, sida deka mega merinsaka kita.’ (John 15:20) Aku berunding: ‘Apu! Semua utai ke diasaika kami pan udah kala diasaika Jesus Kristus, bala murid iya sereta bala rasul iya. Baka ke Jehovah andalka aku ulih meri saksi ti manah ba ditu.’ Runding ke baka tu, sereta ngasaika Jehovah nyaut sampi aku, nya meh utai ke ngeringka aku sereta ngelantangka ati aku.”

Yuriy ngaku sebedau tu, enda senang ke iya macha Bup Kudus ninting hari. Seiku menyadi Kristian iya nulung iya ngaga pemansang. Latih ke diterima iya nya nulung iya lebuh iya ditan ba jil. Ku iya: “Aku ingat baru pasal teladan nembiak Bup Kudus kelia, sereta teladan bala menyadi ke dibacha aku ari litaricha kitai suba. Nya ngeringka aku sereta nulung aku mengkang gaga ati. Tu pan nulung aku nyeliahka diri ari kelalu balat irau.”

Kitai besampi enggau andal ati, minta Jehovah terus nyadika “pengelindung enggau pengering” ke bala menyadi kitai ba Rusia “lebuh maya penusah.”—Masmur 46:1.