23 SEPTEMBER 2021
RUSIA

BERITA TI PEMADU BARU—KES APIL DITULAK | Enam Iku Menyadi Indu enggau Seiku Menyadi Lelaki Bepanggai ba Jehovah enggau Bala Menyadi Kristian Lebuh Dipechara

TEBAH

Kena 26 September 2022, Kot Pelilih Primorye nulak kes apil ari Menyadi Nadezhda Anoykina, Lyubov Galaktionova, Nailya Kogay, Nina Purge, Raisa Usanova enggau Valentin Osadchuk. Sida iya enda dijil ke diatu.

Kena 1 Jun 2022, Kot Pelilih Leninskiy di Vladivostok ngumbai Nadezhda, Lyubov, Nailya, Nina, Raisa, enggau Valenti besalah. Nadezhda, Lyubov, Nailya, Nina, enggau Raisa sama diberi ukum jil pengelama dua taun ti ditangguh. Valentin diberi ukum jil pengelama enam taun ti ditangguh. Pemutus kes pechara Menyadi Yelena Zayshchuk (ke beumur 87 taun) ditangguh dulu laban iya balat amat sakit diatu.

Garis Timpuh

19 Januari 2021

Kes jenayah dipindahka ngagai Kot Pelilih Leninskiy di Vladivostok
12 November 2019

Kes jenayah tu dipulaika baru ngagai opis piak bedawa
5 April 2019

Valentin, kengka menyadi lelaki dalam kes tu, dibibaska pengudah iya ditanka pengelama 274 hari. Pengudah nya iya ditan ba rumah diri
19 April 2018

Bala pemesai Federal Security Service (FSB) nyerungkai rumah tujuh iku bala menyadi
9 April 2018

Begian Nasat ari FSB di Begian Primorsky muka kes jenayah Menyadi Valentin enggau enam iku menyadi indu

Profil

Nailya Kogay

Ada: 1951 (Tashkent, Uzbekistan)

Biograpi: Dibesaika enggau dua iku madi lelaki. Lebuh agi mit, rindu bemain sukan. Pengudah tembu belajar kolej, nyadi seiku injinir. Diatu pinchin. Jadi enggau Robert kena taun 1975. Ngemesaika dua iku anak. Kena taun 1989, Robert ditemu bisi penimpang lalu iya begunaka orang kena nyaga iya penuh jam. Pindah ngagai Vladivostok kena taun 2003

Berengkah andal Bup Kudus nya Jaku Petara lebuh belajar enggau Saksi Jehovah. Iya amat rinduka Jaku Petara ke amat logik sereta pengerindu Petara. Dibaptisa kena taun 1997

Interbiu

Kati bisi utai ke dipadah bala menyadi kena nulung nuan napi penanggul tu?

Aku ninga ari mayuh bala menyadi indu ke madahka: ‘Nuan teladan ti manah ke kami. Kami temegahka nuan. Enti nuan ulih napi penguji tu, kami mega ulih!’

Nina Purge

Ada: 1940 (Pesok, Begian Pskov)

Biograpi: Bisi seiku menyadi lelaki ke biak. Dibesaika maya Perang Dunya Kedua. Kena taun 1942, bala soldadu Jerman nyerebu kampung iya. Diri sebilik iya nyauka dibunuh orang Nazi

Jadi enggau laki iya lebuh laki iya belajar ba Akademi Maritim Estonia. Sida bisi dua iku anak. Sida sebilik pindah ngagai Vladivostok alai laki iya diasuh gawa

Kena 1990-an berengkah belajarka Bup Kudus enggau Saksi Jehovah. Iya nemu iya seruran ulih bepanggai ba Petara kena nerima tulung. Dibaptisa kena taun 1999

Interbiu

Baka ni kaul nuan enggau Jehovah nyadi tegap agi sepemanjai penanggul tu?

Aku andal agi ke Jehovah. Aku minta ngambika aku ulih betan nyentukka ujung sereta mengkang tetap ati. Lalu Isaiah 41:13 nulung aku nyadi berani seraya Apai aku [ti di serega] megai jari aku. Aku besedia napi nama-nama utai ke deka nyadi ba aku.

Raisa Usanova

Ada: 1947 (Kuznetsovo)

Biograpi: Dibesaika enggau tiga iku menyadi lelaki enggau seiku menyadi indu. Pengudah tembu sekula menengah pindah ngagai Vladivostok kena nerima latih gawa ngaduka kerita api. Iya belaki lalu ngemesaika dua iku anak indu. Gawa pengelama 25 taun deriba bas elektrik. Diatu udah pinchin

Kena taun 2000, pengudah lenyau indai iya, menyadi indu, sereta seiku menyadi lelaki, iya berengkah berunding nama kebuah mensia mati lalu kati bisi pengadang ngagai sida ke udah mati. Tetemuka saut ti logik sereta ulih dipechaya lebuh belajarka Bup Kudus enggau Saksi Jehovah. Dibaptisa kena taun 2002

Interbiu

Nama utai ke dipelajarka nuan ari penguji tu ngambika nuan ulih besedia napi penguji ti deka datai?

Aku belajar nagang diri, kelebih agi ba jaku aku. Pia mega, aku belajar pengeliat ati sereta bepanggai ba Jehovah. Aku berengkah belajarka Bup Kudus enggau bejarit. . . . Aku deka mengkang tetap ati nyentukka ujung.

Baka ni nuan nyediaka diri napi pemerinsa?

[Aku nguji ngambika aku ulih] belematika mayuh agi ayat Bup Kudus, ngambika roh kudus Petara ulih nulung aku ngingatka ayat nya ba maya ti ngena.—John 14:26.

Kitai seruran diperansang ari chunto bala menyadi kitai ba Rusia. Sida nunjukka diri ngembuan pengarap ke ulih nyelamatka nyawa.—Hebrew 10:39.

Nuan Engka Rindu Meda Tu

BERITA TI PEMADU BARU

Dijil Ketegal Pengarap Sida—Rusia

Pegawai ari opis ti nyaga pengelikun dalam menua (FSB) nangkap Dennis Christensen laban iya sama enggau pengawa begempuru Saksi-Saksi Jehovah ke enda ngachau orang ba Oryol, Rusia.

BERITA TI PEMADU BARU