20 OGOS 2021 | DIADUKA BARU: 28 NOVEMBER 2022
RUSIA

BERITA TI PEMADU BARU—KOT MERI PEMUTUS | Tiga Iku Menyadi Lelaki enggau Seiku Menyadi Indu ba Dagestan Nerima Sukung ari Jehovah Lebuh Ditan

TEBAH

Kena 24 November 2022, Kot Pelilih Kirovskiy ba Makhachkala ngumbai Menyadi Marat Abdulgalimov, Arsen Abdullaev, Anton Dergalev enggau Mariya Karpova besalah. Semua sida diberi ukum jil ti ditangguh enggau pengelama enam taun ngagai enam taun setengah. Sida enda dijil ke diatu.

Garis Timpuh

27 Mei 2020

Marat, Arsen, Anton, enggau Mariya ditan ba rumah jil sementara pengelama 362 hari, udah nya dipindahka ngagai rumah sida iya empu lalu ditan ba dia
4 Jun 2019

Kot Pelilih Sovetskiy ba Makhachkala nganjung sida empat iku ngagai rumah jil sementara
1 Jun 2019

Bala pegawai FSB nyerungkai 13 buah rumah Saksi-Saksi Jehovah ba Dagestan
27 Mei 2019

Opis FSB ba Dagestan muka kes jenayah Marat, Arsen, Anton, enggau Mariya

Profil

Marat Abdulgalimov

Ada: 1991 (Makhachkala, Republik Dagestan)

Biograpi: Bisi tiga iku menyadi. Rindu main bul. Dilatih nyadi tukang welding lalu baru-baru tu iya gawa ba kedai kasut

Kenyau ari biak iya rindu macha Bup Kudus. Iya rindu begulai enggau orang ke nunda Jesus sereta rinduka orang bukai. Iya dibaptisa nyadi seiku ari Saksi-Saksi Jehovah ba taun 2013

Interbiu

Nama utai ke nulung nuan betan nyauka setaun ba rumah jil sementara?

Aku belematika situasi aku lalu mandingka nya enggau utai ke ditapi Josep. Aku engka dijil pengelama 10 taun. Josep dijil pengelama 13 taun. Enggau tulung ari Jehovah, aku mega ulih mengkang taluk enda ngira nama utai ke nyadi ba aku. Lebuh aku meda baka ni chara Jehovah nyaut sampi aku, aku berengkah nyerahka semua penusah aku ngagai Iya. Masmur 55:22 nulung aku napi penguji tu. Ayat tu besemaya, enti aku nyerahka semua penusah aku ngagai Jehovah, Iya deka nyukung aku. Nya meh utai ke dikereja aku.

Arsen Abdullaev

Ada: 1979 (Kasumkent, Republik Dagestan)

Biograpi: Kenyau ari biak, rindu main volleyball enggau macha bup. Bulih degree ngaga wain. Baru-baru tu iya gawa nyadi tukang ngaduka paip sereta perengka ngangatka rumah

Taja pan disakal apai indai lebuh berengkah belajarka Bup Kudus, Arsen dibaptisa nyadi seiku ari Saksi-Saksi Jehovah kena taun 2000. Iya jadi enggau bini iya, Suat. Sida bisi seiku anak lelaki ti biak

Interbiu

Baka ni nuan mutarka asai ati ti asa lebuh ditan?

Lagu Kristian kitai amat nulung. Lagu tu ngasuh aku berasai nyamai. Aku seruran belagu lagu tu lebuh aku kediri. Lagu lumur 45, “Peragam Atiku,” nya ti pemadu dikerinduka aku. Endang bisi maya iya ati aku asa, lelak, ransi sereta enggau ngereja nama-nama utai. Taja pia, aku enggai asai ati tu ngachau aku nyentukka ke pagi siti. Lebuh utai tu nyadi, aku madahka ngagai diri empu: ‘Pagila, lebuh nuan dani, semua utai deka OK magang. Asai ati tu deka lenyau. Nyadi meh kering. Diri sebilik enggau bala menyadi begunaka nuan mengkang taluk.’

Anton Dergalev

Ada: 1985 (Rostov-on-Don, Begian Rostov)

Biograpi: Iya enggau menyadi lelaki iya dibesaika indai tunggal. Indai enggau ini ngajar iya rinduka Bup Kudus. Gawa nyadi tukang elektrik enggau ngaga pelan ba kebun orang bukai. Dibaptisa nyadi seiku ari Saksi-Saksi Jehovah ba taun 2002

Interbiu

Baka ni Jehovah nyukung nuan lebuh napi penguji tu?

Bala menyadi bebendar nyaga kami. Seiku ari orang ke sama dijil enggau aku madahka aku deka ngetu bulih utai ari bala kaban pengudah beberapa bulan. Tang, bala menyadi enda ngetu-ngetu meri utai nyauka setaun. Utai tu ngasuh iya tekenyit!

Nama utai ke deka dikunsika nuan ngagai orang ke deka nyediaka diri ke penguji ila?

Anang ngelengkaka pengawa begempuru. Aku amat lelengau datai ke gempuru. Kena meh semua peluang ke udah diberi Jehovah. Jaga meh pengarap nuan, lalu jaga kaul nuan enggau Jehovah sereta enda takutka ke sebarang utai. Jehovah seruran ngimbai kitai!

Mariya Karpova

Ada: 1980 (Magadan, Begian Magadan)

Biograpi: Bisi dua iku menyadi lelaki. Rindu bemain ski, bejalai ngagai menua bukai sereta macha bup. Bulih degree nyadi lutur jelu

Tetemuka saut pasal jemah ila ba Bup Kudus lalu mutuska diri deka nyadi seiku ari Saksi Jehovah. Iya dibaptisa ba taun 1998

Interbiu

Nama utai ke nulung nuan enda kelalu irau lebuh ditan?

Aku bisi nulis mayuh ayat Bup Kudus ba dalam bup nota aku. Pengelama tiga bulan aku nadai Bup Kudus. Tang aku bulih pengering ari ayat ke ditulis aku. Pilipi 4:6, 7 meransang aku. Maya aku berasai irau, aku muka bup nota. Lebuh meda ayat Bup Kudus nya, aku berunding: ‘Anang irau ke sebarang utai.’ Udah nya aku berasai nyamai.

Nama utai ke ngasuh nuan andal Jehovah udah nulung nuan lebuh maya ti tusah?

Jehovah udah nulung aku maya aku lenyau apai lebuh aku ba rumah jil sementara. Aku nerima berita tu ari indai, lalu ukai nya ari orang bukai, laban aku dikemendarka bejaku enggau iya ba talipun. Ketegal aku nadai enggau indai, bisi dua iku kaban rapat kin lalu nyukung iya lebuh ngintu pemati apai aku. Bala menyadi seruran ingatka indai aku. Sida talipun, nulis surat, nganjung kad, sereta nyediaka utai ke diguna ngambika iya ulih datai lebuh aku dipechara.

Kitai amat andal, Petara kitai Jehovah seruran ngamatka reti nama Iya, iya nya deka nyadi sebarang utai kena ngelindung sereta nyukung nembiak Iya.—Pemansut 3:14, nota kaki.

Nuan Engka Rindu Meda Tu

BERITA TI PEMADU BARU

Dijil Ketegal Pengarap Sida—Rusia

Pegawai ari opis ti nyaga pengelikun dalam menua (FSB) nangkap Dennis Christensen laban iya sama enggau pengawa begempuru Saksi-Saksi Jehovah ke enda ngachau orang ba Oryol, Rusia.

BERITA TI PEMADU BARU