Kena 21 Jun 2021, Kot Pelilih Birobidzhan ba Jewish Autonomous Region ngumbai Yevgeniy besalah lalu meri iya ukum jil pengelama dua taun setengah ti ditangguh.

Yevgeniy Yegorov

• Ada: 1991 (Birobidzhan)

• Biograpi: Iya dibesaika indai enggau ini iya. Iya kala belajar nyadi injinir elektrik. Diatu iya gawa nyadi tukang kunchi sereta tukang nyeruri. Iya rindu macha sereta nulis bup. Iya kala ngeluarka siti novel enggau sekeda pantun ke ditulis iya. Kena taun 2005 iya dibaptisa nyadi Saksi Jehovah. Iya jadi enggau bini iya Kseniya kena September 2019. Kseniya ngadaka anak lelaki seduai iya kena Ogos 2020

Kena Mei 2018, bala pegawai Federal Security Service (FSB) nyerungkai mayuh rumah Saksi ba Birobidzhan. Enda lama sebedau Yevgeniy jadi enggau Kseniya, iya dituduh ngereja “jenayah” ketegal bejalaika sembah iya ngagai Petara sereta macha Bup Kudus. Iya disekat ari bejalai ke endur bukai. Indai Yevgeniy, Larisa Artamonova, pan dituduh sepengudah anak iya jadi. Kena Disember 2019, kes jenayah Yevgeniy belabuh dipechara ba Kot Pelilih Birobidzhan.

Yevgeniy madahka diri berasai semak agi ngagai Jehovah ari ke suba. Ku iya nerangka: “Ba maya ti pemadu tusah, Jehovah ngasuh ati aku tendur ari pengirau, lalu meri aku ‘kuasa ti besai.’”—2 Korint 4:7.

Taja pan Yevegniy nemu Jehovah sigi deka nulung iya, tang iya pan sedar, iya patut nyediaka diri sereta mengkang semak ngagai Jehovah ngambika ulih betan natka penguji dudi hari. Ku iya nerangka: “Ba aku, utai ti pemadu beguna iya nya, negapka kaul aku enggau Jehovah, enda ngira nama nyadi.”

Taja pan sida diperinsa, kitai andalka Yevgeniy seduai Kseniya, sereta semua bala menyadi kitai ba Rusia, deka bulih pengering ari ayat ba Masmur 10:17 ti madah: ‘O Jehovah, Nuan endang deka mendingka sampi orang ke baruh ati. Nuan meri sida pemerani.’