1 OKTOBER 2021 | DIADUKA BARU: 29 OGOS 2023
RUSIA

BERITA TI PEMADU BARU—MENYADI KITAI DIKUMBAI BESALAH | Lima Iku Menyadi Lelaki Keran Deka Betan taja pan Diperinsa

TEBAH

Kena 28 Ogos 2023, Kot Daerah Promyshlenniy ba Orenburg ngumbai Menyadi Vladimir Kochnev, Vladislav Kolbanov, Pavel Lekontsev, Sergey Logunov enggau Nikolay Zhugin besalah. Semua sida diberi ukum jil enggau pemanjai entara dua taun enam bulan ngagai tiga taun enam bulan, tang nya ukum jil ti ditangguh. Sida enda ibuh dijil ke diatu.

Garis Timpuh

1 Mac 2021

Pengudah lebih ari setaun kes nya dipulaika baru ngagai opis penawa, pengawa pechara berengkah dipejalaika ba Kot Pelilih Menua Promyshlenniy ba Orenburg
14 Januari 2020

Kes jenayah nya dipulaika baru ngagai opis penawa ketegal jaku tuduh nya enda chukup nyemetak
3 Ogos 2018

Pengudah 79 hari, Vladimir dilepaska ari endur iya ditan lalu ditan ba rumah diri empu
16 Mei 2018

Piak bekuasa nyerungkai rumah 19 buah ruang bilik ba Begian Orenburg. Vladimir enggau Vladislav dianjung ngagai rumah jil sementara. Tiga hari udah nya Vladislav dilepaska ari endur iya ditan lalu ditan ba rumah diri empu
14 Mei 2018

Lima iku menyadi lelaki dituduh ba kes jenayah

Profil

Vladimir Kochnev

Ada: 1979 (Orenburg)

Biograpi: Rindu nginti sereta main bul maya agi mit. Gawa nyadi tukang besi sereta tukang ngaduka TV enggau radio. Dibaptisa nyadi seiku ari Saksi-Saksi Jehovah ba taun 1993. Jadi enggau bini iya Galina ba taun 2003

Interbiu

Baka ni kaul nuan enggau Jehovah majak kering sekumbang pemerinsa tu?

Aku enggau andal ulih madah, timpuh aku ditan nya meh maya ti pemadu manah ke kaul aku ngagai Jehovah. Aku belajar arap agi ngagai Jehovah laban aku kediri aja lalu aku enda ulih ngereja nama-nama utai kena ngubah situasi aku.

Nama pesan ke ulih diberi nuan ngagai orang bukai bekaul enggau chara sida ulih ngena awak sida kena nyediaka diri ke pemerinsa ke deka nyadi?

Pemerinsa enda ngasuh seseiku orang nya manah agi tauka jai agi. Tang pemerinsa nunjukka sapa iya ti bendar. Enti kitai bisi tebiat ti manah ba sembah kitai ngagai Jehovah, iya nya enggau tetap besampi, belajarka Bup Kudus sereta datai gempuru, pengarap kitai deka seruran kering. Kitai enda patut nganti sesiti awak alai kitai deka berengkah ngeringka kaul kitai ngagai Jehovah. Ngambika chunto, kitai enda ibuh nganti sesiti utai nyadi kena berengkah macha Bup Kudus ninting hari tauka enggau tetap besampi ngagai Jehovah.

Vladislav Kolbanov

Ada: 1992 (Orenburg)

Biograpi: Indai iya berengkah belajarka Bup Kudus maya iya beumur enam taun. Dibaptisa nyadi seiku ari Saksi-Saksi Jehovah ba taun 2008. Lebuh beumur 18 taun, minta ngereja utai bukai ari ke nyadi soldadu. Diberi pengawa ba rumah orang tuai kena nyaga sida

Interbiu

Baka ni pemerinsa tu nambahka pengeran nuan deka nyembah Jehovah?

Orang bukai suah nanya aku sekalika enti aku diberi peluang, aku deka nyeliahka diri ari dipechara. Lalu saut iya, aku sedar aku langsung nadai nesal ke utai ke benung nyadi ba aku. . . . Aku udah ngasaika tulung Jehovah ba pengidup aku lalu aku ulih ngasaika sukung ke datai ari bala menyadi.

Aku sedar, ketegal napi penguji tu, nuan ulih ngemansangka ati ti tan, ngeringka pengarap nuan ngagai Jehovah sereta ngenalamka pengerindu nuan ngagai Iya.

Pavel Lekontsev

Ada: 1981 (Kytat, Begian Krasnoyarsk)

Biograpi: Kenyau ari mit, rinduka utai ti ditempa. Rindu hiking, nginti enggau ngumpul kulat. Iya gawa ba pengawa nirika bengunan. Berengkah belajarka Bup Kudus enggau Saksi Jehovah ba urung taun 1998. Iya sedar, kunchi pengelantang nya ngasika pesan Bup Kudus. Dibaptisa ba taun 1999. Jadi enggau bini iya Oksana ba taun 2017

Interbiu

Baka ni gaya nuan lebuh rumah nuan diserungkai, nuan ditasat sereta dituduh ngereja jenayah?

Lebuh polis nyerebu rumah aku, aku tekenyit enggau penyampat Jehovah nyaut sampi aku. Asai aku, nya meh sampi ti pemadu pandak ke kala disebut aku ba pengidup. Aku besampi ngambika aku tenang. Jehovah nyaut ukai dalam beberapa jam tauka minit, tang dalam beberapa sikin aja. Aku tenang sereta runding aku enda charut.

Nama utai ti keran digaga nuan, enda ngira nama pemutus kot?

Aku enda nemu pemutus ke deka digaga kot. Tang aku andal Jehovah deka terus meri aku pengering, laban enda ngira nama pemutus kot, kami tetap menang [tu ketegal kami mengkang tetap ati ngagai Jehovah]! Enda ngira ni pemalat penusah kitai, Jehovah nyediaka roh kudus ke diguna kitai. Kenyau ari aku nyembah Jehovah, pengandal aku ke utai tu mayuh kali ditegapka. Nya kebuah aku deka mengkang terus ba lumba nyentukka adan.—2 Timoti 4:7.

Sergey Logunov

Ada: 1962 (Orenburg)

Biograpi: Iya nerima latih bekenaka mesin. Pengudah tembu pengawa nyadi soldadu, iya nyadi jurugambar ti landik. Pengawa penudi iya sebedau pinchin nya tukang kebun. Iya agi ngambi gambar nyadika hobi. Iya mega main gita. Berengkah belajarka Bup Kudus enggau Saksi-Saksi Jehovah ba urung taun 1990. Dibaptisa ba taun 1992. Jadi enggau bini iya Larisa ba taun 1994

Interbiu

Nama pesan ke deka dikunsi nuan ngagai orang bukai ngambika ulih tan napi penguji?

Lebuh kitai napi penguji, pengarap kitai deka dipeda. Kena nyediaka diri napi penguji tu, kitai patut ngeringka kaul kitai enggau Jehovah sereta Jesus kenyau ari diatu. Utai tu baka pedang. Orang ke ngaga pedang deka nentuka besi nya kering, ngambika pedang nya enda mudah jai lebuh beperang. Lebuh seiku soldadu nemu pedang iya kering, iya berani lebuh beperang. Jesus madahka orang ke “tau dikarapka ngemataka utai ti mimit, tau mega dikarapka ngemataka mayuh utai.” (Luke 16:10) Nya alai, enti seseiku orang matihka diri ngasika Petara ba semua utai kenyau ari diatu, ke suah iya, iya mega ulih tan natka pemerinsa di besai agi.

Taja pan pengarap sida diuji nengah kes pechara tu pengelama lebih ari tiga taun, menyadi kitai ke dikerinduka tu mengkang tetap ati ngagai Jehovah. Endang nyata, Jehovah tetap ati ngagai sida mega.—2 Samuel 22:26.

Nuan Engka Rindu Meda Tu

BERITA TI PEMADU BARU

Dijil Ketegal Pengarap Sida—Rusia

Pegawai ari opis ti nyaga pengelikun dalam menua (FSB) nangkap Dennis Christensen laban iya sama enggau pengawa begempuru Saksi-Saksi Jehovah ke enda ngachau orang ba Oryol, Rusia.

BERITA TI PEMADU BARU