16 DISEMBER 2021
RUSIA

BERITA TI PEMADU BARU | Macha Bup Kudus Ninting Hari Nulung Lima Iku Menyadi Lelaki enggau Seiku Menyadi Indu Napi Pemerinsa

TEBAH

Kena 25 Ogos 2022, Kot Pelilih Leninskiy ba Saransk ngumbai Menyadi Denis Antonov, Vladimir Atryakhin, Aleksandr Korolev, Georgiy Nikulin, Yelena Nikulina, enggau Aleksandr Shevchuk besalah. Denis, Aleksandr Korolev, enggau Aleksandr Shevchuk sama diberi ukum jil pengelama dua taun. Georgiy seduai Yelena diberi ukum jil pengelama empat taun dua bulan, lalu Vladimir diberi ukum jil pengelama enam taun. Ukum jil sida nya lalu terus berengkah maya pemutus nya digaga.

Garis Timpuh

11 Jun 2021

Kot Pelilih Leninskiy ba Saransk berengkah meresa kes tu
2 April 2021

Yelena dituduh enggau ba pengawa gerempung ekstremis lalu nguji mai orang tama ke gerempung nya
31 Mac 2021

Vladimir dituduh ngatur pengawa gerempung ekstremis
2 Julai 2019

Aleksandr Shevchuk enggau Georgiy udah dibibaska ari rumah jil sementara lalu enda diasuh ninggalka menua nya
28 Mac 2019

Vladimir udah dibibaska ari rumah jil sementara lalu enda diasuh ninggalka menua nya
8 Februari 2019

Aleksandr Shevchuk, Vladimir, enggau Georgiy dianjung ngagai rumah jil sementara
4 Februari 2019

Kes jenayah dibuka ngagai enam iku bala menyadi laban ngatur pengawa gerempung ekstremis

Profil

Denis Antonov

Ada: 1976 (Syktyvkar, Republik Komi)

Biograpi: Lebuh iya agi mit, sida sebilik seruran pindah laban kereja apai iya. Besekula ba politeknik kena nyadi tukang elektrik enggau mekanik

Gawa nyadi tukang elektrik ba dalam lumbung pengelama lima taun. Rindu ngambi gambar sereta bemain chess

Bisi mayuh tanya pasal Petara. Taja pan iya bebendar macha litaricha ari gerija sereta macha Bup Kudus, tang enda mereti. Lebuh nyadi soldadu, iya berandau enggau seiku kaban ke benung belajarka Bup Kudus enggau Saksi-Saksi Jehovah. Denis alit ati lebuh nemu nama Petara nya Jehovah sereta Bup Kudus nya pemendar. Dibaptisa nyadi seiku ari Saksi-Saksi Jehovah kena taun 1998. Jadi enggau Olga kena taun 2015

Interbiu

Ulih nuan bekunsika siti ayat Bup Kudus ke udah nulung nuan nyadi berani sereta betan?

Siti ayat ke pemadu dikerinduka aku iya nya Pemungkal 15:1 . . . Ayat tu amat spesial ba aku laban aku seruran teingatka ayat tu ba malam nya maya pegawai FSB mai aku ari rumah sereta nasatka aku. . . . Tu ngasuh aku berasai tenang sereta nulung aku mengkang taluk.

Vladimir Atryakhin

Ada: 1987 (Rozhdestveno, Republik Mordovia)

Biograpi: Dibesaika ba dalam ruang bilik apai indai tunggal. Bisi seiku menyadi lelaki ke biak. Rindu main bul, volleyball enggau hoki. Gawa ngaga program komputer, kelebih agi ngemataka begian komputer ba siti kompeni

Bisi minat ba Bup Kudus lebuh agi ba sekula. Dibaptisa nyadi seiku ari Saksi-Saksi Jehovah kena taun 2004. Jadi enggau Mariya kena taun 2009. Seduai iya bisi dua iku anak ke agi mit. Seiku beumur semilan bulan lalu seiku da agi dua taun lebuh iya ditangkap

Interbiu

Baka in kaul nuan enggau Jehovah nyadi kering agi lebuh penguji tu?

Pengudah aku diserara ari diri sebilik aku, aku berasai tusah sereta enda ulih jenuh. Lebuh aku ditaban ngagai rumah jil sementara seiku pekereja ngisi dokumen aku. Maya nya iya nanya aku nama kebuah sida ngetan aku. Aku enda ingat tang aku ngasaika aku bisi madahka ngagai iya aku irauka pasal diri sebilik aku. Enggau kempang iya madahka ngagai aku: “Bala kita enda ninggalka diri sebilik nuan.” . . . Iya andal bala menyadi Kristian deka nyaga diri sebilik aku. . . . Tu baka ke Jehovah ngena jejaga nya kena ngingatka aku, aku patut bepanggai ba Iya. Lebuh aku pansut ari rumah jil sementara lalu ulih bejaku enggau bini aku, aku alit ati enggau chara Jehovah nyaga diri sebilik aku nengah bala menyadi Kristian.

Aleksandr Korolev

Ada: 1978 (Zemetchino, Begian Penza)

Biograpi: Dibesaika nadai apai. Lebuh agi mit, rindu nginti sereta main bul. Pengudah tembu sekula, gawa ba kilang sereta deriba lori. Iya mega gawa ba ladang nyadi pengibun bedus enggau nyaga jelu ke beranak. Baru-baru tu gawa nyadi tukang kayu

Lebuh iya belajarka Bup Kudus enggau Saksi-Saksi Jehovah iya tetemuka saut ngagai tanya ke ngirauka iya pengelama betaun-taun. Dibaptisa kena taun 1998. Kena taun 2006, jadi enggau bini iya Natalya ke udah bisi seiku anak lelaki lalu seduai iya sama-sama ngemesaika anak iya

Interbiu

Baka ni datai gempuru enggau tetap udah nulung nuan?

Macha Bup Kudus ba gempuru tengan minggu mayuh nulung aku. Lebuh aku berundingka teladan nembiak Jehovah suba, pemerani enggau pengarap sida amat ngeringka aku. Lebuh aku ngasika lalu ke diberi nengah gempuru, tu nulung aku ngembuan ulah ti manah agi. Aku terus besampi minta iring ngambika nyaga ulah enggau menyana sereta nyeliahka diri . . . ari ngenyaika nama Jehovah.

Georgiy Nikulin

Ada: 1963 (Rovenky, Ukraine)

Biograpi: Dilatih nyadi deriba enggau mekanik kerita. Iya mega landik ba pengawa ngelukis grafik, ngaduka radio satelit, nyeruri perengka sereta ngias kayu

Rindu belajar utai baru, kelebih agi iya bisi minat asal penatai mensia. Lebuh iya belajarka Bup Kudus enggau Saksi-Saksi Jehovah, iya tetemuka mayuh saut ti ngemuaska ati

Interbiu

Nama utai ke nulung nuan mengkang berani sereta kering ba pengarap lebuh ba rumah jil sementara?

Ngaga pansik sereta belematika ayat Bup Kudus nulung aku. Tu ketegal [Bup Kudus] ngembuan mayuh chunto pasal nembiak Jehovah ke udah nunjukka pengarap enggau pemerani. Aku rindu neladan sida.

Kitai nemu ari utai ke digaga Sitan suba, iya deka ngena jaku ti bula kena ngelemika pengeliat ati kitai. Kitai nemu diri deka dipetenah lalu orang deka bejaku bula pasal kitai. Tang kitai enggai pedulika jaku sida.

Aleksandr Shevchuk

Ada: 1989 (Pyatigorsk, Begian Stavropol)

Biograpi: Dilatih ba pengawa ngaga pelan kebun sereta nirika bengunan. Pengudah nya, pindah ngagai Saransk. Gawa ba kilang ngaga perengka rumah. Rindu main bola keranjang sereta ping pong

Aki ini moyang iya dibuai ngagai Siberia laban nyadi Saksi-Saksi Jehovah. Apai indai iya ada ba Siberia

Dibaptisa kena taun 2006. Lebuh iya dikangau nyadi soldadu, iya minta ngereja pengawa ke bukai

Interbiu

Sepemanjai empat bulan nuan ba rumah jil sementara, nama tebiat ti manah ke nulung nuan napi pemerinsa?

Lebuh aku agi mit, kami sebilik seruran meresa ayat Bup Kudus ninting hari begulai ba ninting pagi sebedau makai. Utai tu udah nyadi tebiat ke udah ditanam ba ati aku lalu aku nguji ngereja utai tu taja pan aku ba rumah jil. Keterubah iya, lebuh aku nadai Bup Kudus, aku nguji ingatka siti ayat Bup Kudus, tauka chunto nembiak Jehovah lalu belematika nya. Ayat keterubah ke dikingatka aku, iya nya Isaiah 40:26-31. Tu ayat ke dikerinduka aku. Tu nulung aku ingatka, Jehovah nya Penempa lalu Iya amat bekuasa. Iya ngena kuasa Iya kena ngeringka kitai ba maya ti tusah, taja pan kitai semina mensia aja.

Kitai andal Jehovah deka terus ngayanka pengerindu ti meruan sereta penetap ati ngagai bala menyadi ke dikerinduka ke benung diperinsa ba Rusia seraya sida andalka Iya.—Pemungkal 32:10.

Nuan Engka Rindu Meda Tu

BERITA TI PEMADU BARU

Dijil Ketegal Pengarap Sida—Rusia

Pegawai ari opis ti nyaga pengelikun dalam menua (FSB) nangkap Dennis Christensen laban iya sama enggau pengawa begempuru Saksi-Saksi Jehovah ke enda ngachau orang ba Oryol, Rusia.

BERITA TI PEMADU BARU