Roman Baranovskiy

• Ada: 1974 (Balakovo, Begian Saratov)

• Biograpi: Iya gawa nyeruri rumah kena melanja diri sereta indai iya. Iya rindu nebah gita, main chess sereta main bul

  Lebuh umur iya bebelas taun aja, iya suah berundingka nama tuju pengidup. Iya ngenang: “Kekadang aku minta Petara nunjukka aku jalai pengidup ti betul.” Kena taun 1993 iya berengkah belajarka Bup Kudus enggau Saksi-Saksi Jehovah. Iya dibaptisa kena taun 1997

Valentina Baranovskaya

• Ada: 1951 (Vannovka, Kazakhstan)

• Biograpi: Iya gawa nyadi akauntant nyentuk ngagai maya iya badu kereja kena taun 2006. Iya rindu manduk, nuliska lagu sereta nulis leka pantun

  Kena taun 1995, iya berengkah belajarka Bup Kudus enggau Saksi-Saksi Jehovah, sama enggau anak lelaki iya. Utai ke negu ati iya nya, lebuh iya belajar ari Bup Kudus pasal Petara enda bula. Iya dibaptisa kena taun 1996

Kena malam 10 April 2019, bala polis ke bepegai senyata nyelungkai empat buah rumah Saksi di Abakan, nyengkaum rumah Menyadi Roman Baranovskiy enggau indai iya Valentina. Bala polis ngerampas Bup Kudus, perengka elektronik enggau dokumen sida. Pengudah nya, piak ti bekuasa ngepunka kes jenayah pasal Roman seduai Valentina.

Roman ngenangka utai ke nyadi malam nya: “Lebuh rumah kami diselungkai, kami benung berandauka 1 Korint 10:13 ba gempuru tengan minggu. Ayat tu ngajar kitai siti poin ti beguna bendar, iya nya, Jehovah ukai milih sesiti penguji ti deka ninggang kitai . . . Iya ukai berundingka: ‘Nuan kering, nyadi, aku deka ngasuh nuan napi penguji tu. Tang sanu lemi agi, iya deka ditinggang penguji ti senang agi ditapi.’ Ukai baka nya. Enti pia, kitai semina bepanggai ba pengering diri empu aja. Tang sesiti penguji ulih ninggang barang sapa. Tang enti kitai bepanggai ngagai pengering ari Jehovah, semua kitai ulih mujur betan napi nya.”

Kena Julai 2020, Valentia kena strok. Iya nerangka: “Lebuh penanggul ba pengerai aku majak balat, majak nyata Jehovah bisi berimbai aku, nulung aku. Tu ketegal aku enda ngetu-ngetu besampi, lalu Jehovah baka ke merap aku. Nadai jaku kena nerangka pemaik ke diasaika aku maya nya.”

Semua utai ke diasaika Valentina ngujungka iya ngaga pemutus tu: “Pengeran aku ba pengidup iya nya, nyembah Apai kitai belama iya, sereta mengkang taluk ngagai Iya enda ngira nama penyadi ba aku.”

Roman madahka utai ke ngeringka pengarap iya nya, belematika chunto nembiak Bup Kudus sereta penyembah Jehovah kemayaharitu ti nyadika teladan pasal pengeliat ati. Lebuh iya belematika semua chunto tu, iya nanya diri: ‘Nama utai ke ditapi sida, sereta nama kebuah sida napi nya? Nama utai ke nulung sida mengkang tetap ati ngagai Jehovah? Baka ni chara Jehovah ngena roh kudus Iya kena nyukung sida?’ Lebuh ngiga saut ke semua tanya tu Roman andal agi, enda ngira nama penanggul ke ditapi iya, “Jehovah deka meri pengering ti jauh besai agi ari pengering ke dikemisi kitai mensia, enti kitai begunaka utai nya.”

Kitai besampi ngambika Roman, Valentina, enggau semua bala menyadi ke dikesayauka kitai ba Rusia terus nyadika Jehovah pengelindung enggau pengering sida.—Masmur 46:1.