Kena 23 September 2021, Kot Pelilih Volgograd Traktorozavodsky ngumbai semua tiga iku menyadi lelaki nya besalah. Menyadi Igor enggau Sergey diukum jil pengelama enam taun. Menyadi Valeriy diberi ukum jil pengelama enam taun lima bulan.

Sergey Melnik

• Ada: 1972 (Volgograd, Begian Volgograd)

• Biograpi: Iya kala belajar nyadi mekanik ba kolej vokasional. Diatu iya gawa nirika atap rumah. Kena taun 1993 iya jadi enggau Anna. Seduai iya udah ngemesaika tiga iku anak lelaki. Sida sebilik rindu sukan niki bukit sereta begulai enggau pangan diri beratika utai ti ditempa

  Anna dulu agi berengkah belajarka Bup Kudus enggau Saksi-Saksi Jehovah. Pengudah Sergey meda bini iya ngaga ubah ti manah ba pengidup iya, iya pan belabuh belajarka Bup Kudus. Iya dibaptisa kena taun 1999

Valeriy Rogozin

• Ada: 1962 (Krasnokamsk, Begian Perm)

• Biograpi: Pengelama dua belas taun iya nyadi pilot soldadu lalu pengudah badu kereja nya iya nyadi injinir. Kena taun 1984 iya jadi enggau Marina. Seduai iya bisi dua iku anak lelaki

  Dalam urung taun 1990-an iya berengkah belajarka Bup Kudus. Iya dibaptisa kena taun 1998

Igor Yegozaryan

• Ada: 1965 (Volgograd, Begian Volgograd)

• Biograpi: Iya gawa nyadi tukang elektrik enggau tukang kasut. Kenyau ari biak iya bisi minat enggau musik. Iya landik nebah gita. Kena taun 2002 iya jadi enggau bini iya Yevgeniya. Seduai iya bisi seiku anak lelaki

  Indai iya ti keterubah madahka iya Berita Manah pasal Perintah Petara. Utai ke ngalitka ati iya nya, pesan Bup Kudus bisi logik sereta senang ditemu. Iya dibaptisa kena taun 1992

Kena 16 Mei 2019, bala pegawai polis enggau Federal Security Service (FSB) nyerungkai tujuh buah rumah Saksi ba Begian Volgograd di Rusia. Dua hari udah bekau nya, hakim kot pelilih mutuska Menyadi Sergey, Valeriy enggau Igor deka ditan nyentukka kes sida ulih dipechara. Sida tiga iku lalu ditan pengelama tujuh bulan.

Taja pan diatu sida udah dilepaska lalu ulih begulai baru enggau diri sebilik, tang sida agi napi mayuh penanggul seraya sida nganti kes nya dipechara. Ambika chunto, bisi siti begian ari perintah Rusia ti ngemataka orang ke dituduh ngereja jenayah sereta chara sida ulih ngena duit diri empu. Menyadi Valeriy udah disengkaum ba lis orang ke dikemataka sida. Ku iya: “Aku enda dikemendarka ngambi duit aku ke ba bank, tauka bekenaka talipun tauka internet. Laban aku begunaka talipun enggau internet ke kereja aku, aku udah dibuai kereja.” Seduai bini iya patut ngena duit pinchin kena sida beridup. Ketegal tu, sida patut ngurangka belanja sida sereta idup enggau penumbas iya.

Sergey enggau Igor pan disekat kot, lalu tu mega ngujungka seduai iya tusah ngiga kereja. Ketegal Sergey suah dikangau ke kot, tu udah ngachau jadual iya gawa. Ku iya: “Laban aku gawa nirika atap rumah, aku enda ulih nerima kontrak besai, semina kontrak ke mit ti ulih ditembuka aku entara maya aku dikangau ke kot.”

Igor napi siti penyakit lalu iya patut suah ngagai sepital ngambika berubat. Ku iya nerangka: “Ketegal aku dituduh ngereja jenayah, aku enda ulih tetemuka kereja.” Taja pan iya napi penanggul ba pengerai enggau penatai pemisi, iya madah: “Jehovah udah meri aku ruang bilik ba pengarap, ti seruran nyukung aku lalu enda kala ninggalka aku indah ba maya ti tusah tu.”

Endang amat, bala menyadi kitai enggau diri sebilik sida napi penanggul ba penatai pemisi ketegal sida disekat. Tang kitai pechaya, semua bala menyadi kitai ba Rusia deka mengkang bediri tegap lebuh diperinsa, laban sida andalka Jehovah seruran deka nyediaka utai ke diguna sida.—Matthew 6:33.