13 OGOS 2021 | DIADUKA BARU: 6 MAC 2023
RUSIA

BERITA TI PEMADU BARU—UKUM DIKURANGKA | Menyadi Yegor Baranov enggau Menyadi Yen Sen Li Enda Irau Tang Andalka Jehovah

TEBAH

Kena 1 Mac 2023, pengudah meresa kes apil ari Menyadi Yegor Baranov, Kot Daerah Khabarovsk mutuska deka ngurangka ukum iya. Ukum iya ke sebedau tu ditukar ngagai ukum jil pengelama empat taun setengah ti ditangguh. Iya enda dijil ke diatu.

Kena 6 Jun 2022, Kot Pelilih Vyazemskiy ba Daerah Khabarovsk ngumbai Menyadi Yegor Baranov besalah lalu meri iya ukum jil pengelama lima taun ti ditangguh. Sayau amat, Menyadi Yen Sen Li udah nadai sebedau kes pechara tu abis dipechara.

Garis Timpuh

2 Februari 2021

Kot berengkah bepecharaka kes Menyadi Yegor enggau Menyadi Yen Sen
20 November 2020

Menyadi Yegor dilepaska ari endur iya ditan pengudah 177 hari
26 Ogos 2020

Kerita Menyadi Yen Sen dirampas kot
29 Mei 2020

Yegor ditan seraya iya nganti kes iya dipechara
26 Mei 2020

Menyadi Yegor enggau Menyadi Yen Sen dituduh ngereja jenayah ba Begian Khabarovsk

Profil

Yegor Baranov

Ada: 2001 (Olovyannaya, Begian Trans-Baikal)

Biograpi: Bisi dua iku abang. Apai iya udah nadai kena taun 2013. Iya rinduka alam sekitar enggau jelu. Iya belajar kursus pasal utan sebedau iya ditangkap

Iya dibesaika indai iya ke seiku ari Saksi-Saksi Jehovah. Pengadang ulih betemu baru enggau apai iya lebuh pengangkat ari mati amat nulung iya. Kena 2017 iya dibaptisa nyadi seiku ari Saksi-Saksi Jehovah. Iya rindu nebah piano, nulis pantun enggau manduk

Interbiu

Baka ni kaul nuan enggau Jehovah dikeringka sepemanjai penguji tu?

Ketegal penguji tu, aku gaga ati nemu enda ngira ni pemalat penusah ke ditapi kitai, Jehovah meda asai ati kitai lalu nyaga kitai seiku-seiku. Aku sedar, enti aku berengkah kakang ati, tu reti iya aku enda chukup andalka penemu-dalam Petara. Iya amat nemu utai ke patut digaga Iya, lalu ke suah iya, iya ngereja utai enggau chara ti enda disadang. Lebuh aku ditan, pengarap aku ngagai Jehovah diuji, tang asil iya, pengarap aku majak kering.

Yen Sen Li

Ada: 1952 (Nikolaevsk-on-Amur, Begian Khabarovsk)

Biograpi: Anak ketiga dalam ruang bilik iya. Iya bisi empat iku madi. Iya gawa nyadi injinir elektrik. Iya jadi enggau bini iya Olga kena taun 1991. Sida bisi seiku anak lelaki. Iya bisi minta ngagai Bup Kudus lebuh iya enggau bini iya belajar pasal pengadang ke mensia jemah ila. Iya dibaptisa ba taun 1994. Iya rindu main chess sereta bejalai ba taman

Interbiu

Nama disampi nuan sepemanjai penguji tu?

Aku bebendar minta Petara ngeringka aku enggau bini aku sereta meri kami pengelantang ba ati. . . . Aku enda balat irau lebuh aku ditasat lalu nya ngasuh aku andal agi pasal Jehovah ke enda kala ninggalka aku.

Lebuh bini aku tama sepital ketegal kena serang jantung, aku bebendar besampi ngagai Jehovah . . . ngambika iya dijaga enggau manah. Jehovah ninga sampi aku. Tu nyata dipeda ari chara Iya nyukung aku enggau bini aku nengah bala menyadi. Sida seruran bisi enggau kami. Sida nyediaka utai ti diguna kami, lalu keberat agi, sida nulung kami mengkang semak ngagai Jehovah.

Enggau tulung ari bala menyadi enggau Jehovah, bini aku ulih mengkang tegap ba pengarap. . . . Indah, iya meransang menyadi ke bukai. Tu bukti ti nyata ke nunjukka Jehovah nyukung bini aku.

Kitai muji bala menyadi kitai ke terus arapka Jehovah, lalu kitai andal Iya deka ngeringka sida ngambika ulih betan.—2 Tesalonika 3:3.

Nuan Engka Rindu Meda Tu

BERITA TI PEMADU BARU

Dijil Ketegal Pengarap Sida—Rusia

Pegawai ari opis ti nyaga pengelikun dalam menua (FSB) nangkap Dennis Christensen laban iya sama enggau pengawa begempuru Saksi-Saksi Jehovah ke enda ngachau orang ba Oryol, Rusia.

BERITA TI PEMADU BARU