21 OKTOBER 2021 | DIADUKA BARU: 26 DISEMBER 2022
RUSIA

BERITA TI PEMADU BARU—UKUM TI BARU DITAMBAH | Gaga Ati Taja Pan Lama Ditan ba Rusia

TEBAH

Kena 22 Disember 2022, Kot Fourth General Jurisdiction Court of Cassation nambahka agi ukum ke udah diberi ngagai Menyadi Rustam Diarov, Sergey Klikunov, Yevgeniy Ivanov enggau bini iya, Olga. Akim nya madahka, pengudah nembuka timpuh alai sida dijil, sida deka ditagang ari ninggalka menua Astrakhan. Sida empat iku menyadi kitai ningaka pemutus tu dikerandauka ba kot nengah konferen video, laban sida iya ba dalam rumah jil sementara maya nya.

Kena 3 Mac 2022, Kot Daerah Astrakhan nulak apil ari Menyadi Rustam Diarov, Sergey Klikunov, Yevgeniy Ivanov enggau bini iya, Olga. Sida empat bela mengkang ba jil.

Garis Timpuh

25 Oktober 2021

Kot Pelilih Trusovskiy ba Astrakhan meri ukum jil pengelama lapan taun ngagai Rustam, Yevgeniy enggau Sergey. Olga, iya nya bini Yevgeniy, diberi ukum jil pengelama tiga taun enam bulan. Tiga iku menyadi lelaki nya sigi udah ditan. Lalu menyadi indu nya terus ditaban ngagai rumah jil
11 Jun 2020

Rustam, Yevgeniy, enggau Sergey dianjung ngagai rumah jil sementara sebedau nganti kes dipechara. Olga ditan ba rumah diri empu
9 Jun 2020

Lebih ari 100 iku pegawai polis nyerungkai 27 buah rumah Saksi-Saksi Jehovah di nengeri Astrakhan. Rustam, Yevgeniy, Olga, enggau Sergey ditan ba balai polis
8 Jun 2020

Kes jenayah Rustam, Yevgeniy, Olga, enggau Sergey berengkah. Tiga iku menyadi lelaki nya dituduh ngatur sereta meri duit ke nyukung pengawa ekstremis. Olga dituduh enggau ba pengawa ekstremis

Profil

Olga Ivanova

Ada: 1982 (Volzhsky, Begian Volgograd)

Biograpi: Belajar main accordion maya agi mit. Belajar bansa jaku sereta gawa nyadi cikgu jaku English

Lebuh agi mit, takutka pemati. Lebuh Olga agi nembiak indai iya betemu enggau Saksi-Saksi Jehovah. Udah nya iya ngajar Olga pasal Bup Kudus. Dibaptisa kena taun 1997

Interbiu

Nama utai ke nulung nuan kena nyeliahka ati ti asa lebuh diserara enggau laki nuan?

Teladan Jehovah enggau Jesus meransang aku ngambika enda ngalahka diri. Jehovah sanggup diserara enggau pangan iya Jesus pengelama 33 taun setengah ngambika semua mensia nyengkaum aku bulih penguntung. Laki aku nya kaban ti rapat enggau aku lalu aku amat lelengauka iya. Tang kami engka enda diserara [pengelama 33 taun setengah baka Jehovah enggau Jesus.] Aku andal kami ulih napi semua utai tu enggau sukung ari Jehovah.

Sergey Klikunov

Ada: 1975 (Astrakhan)

Biograpi: Gawa nyadi tukang welding sebedau ditan. Iya enggau bini iya Irina sama berengkah belajarka Bup Kudus. Prinsip ba Bup Kudus nulung iya badu nginsap. Dibaptisa kena taun 2007. Seduai iya bisi dua iku anak indu. Lebuh bisi awak iya rindu nginti sereta nebah gita

Interbiu

Nama utai ke nulung nuan mengkang tetap ati lebuh ditan?

Sepemanjai aku ba ditu aku berengkah beterima kasih agi ke pemeri besampi. Utai tu amat diguna aku ba endur aku ditan. Aku udah ba dalam sil kediri aja pengelama enam bulan ti udah. Utai tu sigi enda senang tang sampi nulung aku tan napi semua utai nya. Lebuh ba maya ti pemadu tusah, aku besugang lalu mantaika semua utai ba dalam ati ngagai Apai kitai. Aku berasai nyamai sereta lantang lalu aku berengkah berasai manah agi. Amat ngalitka ati lebuh meda baka ni Jehovah nulung kitai lebuh kitai begunaka iya. Aku andalka Iya enggau pengabis ati, nya alai aku enda takut.

Endang ngelantangka ati lebuh nemu Jehovah seruran semak enggau nembiak Iya ti tetap ati lebuh diuji.—Masmur 139:5, 10.

Nuan Engka Rindu Meda Tu

BERITA TI PEMADU BARU

Dijil Ketegal Pengarap Sida—Rusia

Pegawai ari opis ti nyaga pengelikun dalam menua (FSB) nangkap Dennis Christensen laban iya sama enggau pengawa begempuru Saksi-Saksi Jehovah ke enda ngachau orang ba Oryol, Rusia.

BERITA TI PEMADU BARU