20 JANUARI 2022
RUSIA

Ba Karpinsk, Bala Menyadi Bepanggai ba Jehovah lalu Negapka Pengarap Sida

TEBAH

Enda lama da agi Kot Nengeri Karpinsk be Daerah Sverdlovsk deka madahka pemutus pasal kes Menyadi Darya Dulova, Venera Dulova, Svetlana Zalyaeva, Aleksandr Prianikov, enggau bini iya Anastasiya Prianikova. Piak bedawa bedau minta sebarang ukum ke deka diberi ngagai sida

Garis Timpuh

27 Januari 2020

Aleksandr, Darya, enggau Venera dikumbai besalah ba kes jenayah ke bukai
Februari 2020

Siti da agi kes jenayah ngelaban Aleksandr, Darya, enggau Venera dibuka
30 Mac 2020

Piak bekuasa nyerungkai rumah sida lalu ngerampas perengka elektronik sida
19 Mei 2020

Anastasiya enggau Svetlana disengkaum ba kes jenayah tu. Seduai iya ditagang mindah ari endur nya
29 April 2021

Kes jenayah berengkah dipechara

Profil

Venera Dulova

Ada: 1968 (Karpinsk, Daerah Sverdlovsk)

Biograpi: Dikemesaika indai enggau ini iya. Iya rindu ngait, macha, sereta belajar. Sebedau umur iya manggai 17 taun iya lenyau indai enggau ini iya. Iya kawin ba taun 1990, lalu iya bisi tiga iku anak

Iya keran deka nemu kebuah kitai mati lalu nama deka nyadi jemah ila ngagai anak iya. Iya berengkah belajarka Bup Kudus enggau Saksi-Saksi Jehovah lebuh umur iya 28 taun. Dibaptisa ba taun 1998

Interbiu

Baka ni Jehovah nulung nuan maya napi penguji tu?

Kaban belayan ke kala nyakal aku enggau laki aku ngayanka pengibuh ngagai kami diatu. Laki aku muji sereta meransang aku ngambika enda putus asa. . . . Jehovah mega nulung kami nengah jaku ti siru ari bala menyadi ba eklisia.

Pengudah piak bekuasa nyerungkai rumah kami, utai keterubah ti diperundingka aku nya: ‘Aku dituduh ngereja jenayah, enda patut! Tu baka mimpi jai!’ Tang seiku kaban meransang aku berunding, ‘Aku ulih menang baka Jesus.’

Aleksandr Prianikov

Ada: 1987 (Udinsk, Daerah Khabarovsk)

Biograpi: Iya rindu musik lalu nemu main accordion. Iya kala gawa ba kilang nyadi tukang elektrik. Diatu iya ngaga tile kena ngias rumah

Ari suba, iya pechaya Petara bisi. Semaya Petara pasal pemati deka nadai agi, negu ati iya. Dibaptisa ba taun 2004. Jadi enggau Anastasiya ba taun 2011

Interbiu

Baka ni bala menyadi meransang nuan maya napi penguji tu?

Seiku menyadi nulung kami berundingka Masmur 139:1. Iya madah: “Jehovah amat sayauka nuan nyentukka Iya nemu utai ti diperunding, diasai, dipadah sereta dikereja nuan. . . . Raja David nemu Jehovah amat ibuhka tiap iku kitai. . . . Iya mega nemu nama utai ke nyadi ba kitai sereta nama empas iya ngagai kitai. Nya alai kitai enda patut berasai kediri.” Utai tu amat negu ati aku. Tiap hari aku ngasaika Jehovah ngimbai aku.

Taja pan bala menyadi ba Rusia terus diperinsa, tang pengarap kitai majak dikeringka lebuh kitai meda Jehovah ngayanka pengerindu Iya sereta nyaga sida enggau manah. Pengarap sida ke udah diuji, mai “puji, mulia enggau basa” ngagai nama Jehovah.—1 Peter 1:7.

Nuan Engka Rindu Meda Tu

BERITA TI PEMADU BARU

Dijil Ketegal Pengarap Sida—Rusia

Pegawai ari opis ti nyaga pengelikun dalam menua (FSB) nangkap Dennis Christensen laban iya sama enggau pengawa begempuru Saksi-Saksi Jehovah ke enda ngachau orang ba Oryol, Rusia.

BERITA TI PEMADU BARU