2 OGOS 2021
RUSIA

Bala Menyadi ke Tuai Mengkang Gaga sereta Tetap Ati Taja Pan Dituduh

TEBAH

Kenyau ari taun 2017 lebuh gerempung Saksi-Saksi Jehovah di Rusia ditagang, piak bekuasa merinsaka bala menyadi ba menua Rusia. Entara bala menyadi ke diperinsa, umur sida nya entara 18 ngagai 89 taun. Kena Julai 2021, 18 iku bala menyadi ke beumur 60 taun ke atas udah dituduh besalah lalu diukum ketegal pengarap sida taja pan nya enda ngachau orang bukai. Tiga iku ari sida benung ba jil diatu. a Berita ti Pemadu Baru ari Raban ti Ngiring 2021 #4 madahka pasal serang ngagai bala menyadi ke udah tuai ti ngenyinuka ati.

Baka ni bala menyadi kitai ke udah tuai tu, betan napi pemerinsa tu? Kami gaga ati bekunsika pengalaman ti meransang ari sekeda bala menyadi ti tetap ati.

Aleksandr Ganin

Ada: 1957

Ukum: Ukum jil tiga taun ti ditangguh sereta disekat ari pansut nengeri pengelama semilan bulan

Dibaptisa: 1997

Interbiu

Baka ni nuan ulih mengkang gaga ba maya ti ngenusahka tu?

Nengah gerempung Iya, Jehovah nyediaka lalau pasal chara nyeliahka diri ari balat tusah ati lebuh diperinsa, sereta chara ulih mengkang ngembuan runding ti positif. Aku enggau bini aku bisi penanggul ba pengerai indah sebedau aku ditangkap. Tang kami mengkang aktif sereta enda nejuka diri dilimpang ari utai ti pemadu beguna, iya nya seruran nyaga kaul kami enggau Jehovah.

Nama empas pemerinsa tu ngagai nuan enggau diri sebilik nuan?

Pengarap kami ditegapka, lalu kami majak semak enggau pangan diri. Aku andal jaku benabi ba Bup Kudus benung dikeamatka, lalu ubah ti besai deka nyadi enda lama da agi. Penemu tu ngeringka aku ngambika terus nyembah Jehovah lalu enda limpang.

Yuriy Krutyakov

Ada: 1952

Ukum: Ukum jil enam taun ti ditangguh, nyengkaum dikemataka piak bekuasa pengelama lima taun sereta sekat pansut nengeri pengelama setaun

Dibaptisa: 1998

Interbiu

Nama penanggul ke ditapi nuan enggau diri sebilik nuan ketegal pemerinsa tu?

Ukum jil ti ditangguh nya manah agi ari dijil. Taja pia, ketegal aku udah tuai aku tusah deka ngiga kereja, kelebih agi aku dikumbai penjenayah. Lalu duit pinchin ke diterima aku ninting bulan nya amat mit enti dibandingka enggau ungkus kena meli pemakai, ubat sereta betemu lutur.

Nama penanggul pengerai ke ditapi nuan, lalu baka ni nuan betan napi utai nya?

Aku bisi sakit ti balat ba patung aku. Ketegal bisi orang nginsap ba endur aku ditan, aku napi penanggul ba paru-paru aku. Nyentukka diatu aku agi merinsa enggau nya. Aku bebendar nitihka iring ari lutur sereta enggau naka ulih nyaga pengerai aku ngambika aku ulih terus ngereja peneka Jehovah.

Baka ni Jehovah nulung nuan enggau nyemetak kenyau ari kes pechara nuan tembu?

Bala menyadi udah mayuh nulung aku. Aku ngasaika pengamat jaku ba Masmur 133:1. Ngasaika pengerindu ari bala menyadi nya siti berekat ti besai agi ari penguji aku. Kami enda nyangka ulih bebakih enggau mayuh bala menyadi. Aku udah meda baka ni Jehovah nyaga kami nengah bala menyadi. Nambahka nya, penyiru ke udah diayanka iya ngagai kami, sereta baka ni iya udah nulung kami ba maya napi penusah ti balat. Ketegal semua utai tu aku amat deka terus nyembah Jehovah, Petara ti bepengerindu sereta pemadu badas. Aku enda ulih ngambarka diri enti enda nyembah Jehovah.

Lyudmila Ponomarenko

Ada: 1950

Ukum: Ukum jil pengelama dua taun ti ditangguh, nyengkaum dikemataka piak bekuasa pengelama setaun

Dibaptisa: 1998

Interbiu

Baka ni ukum tu udah ngubah pengidup nuan?

Enti aku enda madahka begian perintah ke ngemataka orang ke kala diberi ukum jil ke ditangguh, aku enda ulih pindah rumah. Aku mega patut betemu enggau begian nya sekali sebulan.

Baka ni ukum tu ngachau pengerai nuan?

Aku suah ngasaika balat pedis pala ba siti timpuh ti panjai. Utai ke nulung aku nya, besampi ngagai Jehovah minta Iya nulung aku ngembuan runding ti betul pasal utai ke enda ulih diubah.

Baka ni Jehovah nulung nuan?

Jehovah meri aku mayuh berekat kenyau ari kes aku tembu dipechara. Jehovah meri aku pengering ngambika aku ulih terus nyembah iya, lalu iya enda kala enda meri aku bantu. Pia mega, bala menyadi Kristian seruran semak aku. Lebuh aku bisi napi penusah sida seruran besedia nulung aku. Taja pan sekeda penusah tauka situasi nya baka ke enda ulih diputarka, tang Jehovah ulih mutarka penanggul nya nyadika berekat. Aku belajar pechaya agi ke Jehovah sereta bepanggai ba Iya dalam semua utai. Aku amat beterima kasih laban Jehovah andalka aku, meri pengawa nginjil ngagai bala pegawai kot. Tu ngagaka ati aku. Aku nadai kebuah deka berasai lemi, lalu aku amat andal sereta keran deka nembuka lumba tu, lalu nulung orang bukai datai ke adan.

Gennady Shpakovskiy

Ada: 1958

Ukum: Keterubah iya, ukum jil nya pengelama enam taun setengah. Tang pengudah kes nya diapil, kot mutuska nangguh ukum nya, lalu meri iya sekat pengelama dua taun

Dibaptisa: 1995

Interbiu

Baka ni gaya nuan disekat kenyau ari kes nuan dipechara?

Aku nadai hak ngatur tauka ngereja pengawa ke sebarang gerempung pengarap pengelama tiga taun. Aku ditagang pansut ari rumah berengkah ari pukul 11 malam nyentukka pukul 6 pagi. Aku enda ulih pansut ari bandar aku tauka pindah rumah enti nadai pemendar. Lalu aku patut betemu enggau begian perintah dua kali sebulan.

Baka ni bala menyadi Kristian nulung nuan ba maya tu?

Aku nerima mayuh macham tulung. Kenyau ari hari keterubah aku ditan, kami sebilik nerima mayuh surat, kad, utai ke dilukis, sereta mesej ke ngayanka sukung enggau pengerindu, jaku peransang, pia mega bala menyadi madahka sida deka nulung kami enggau sebarang chara.

Baka ni pengeran nuan deka nyembah Jehovah dikeringka?

Semua utai ke nyadi ngagai kami sebilik enggau aku dalam beberapa taun ti udah, ngeringka agi pengandal aku udah nyembah Petara ti bendar, Jehovah! Ari macha, belemati, sereta bisi ungkup dalam utai ke udah dipadah dalam Bup Kudus ke disebut ba “hari ti penudi,” ngasuh aku andal aku udah ba jalai ti betul, iya nya jalai ti nuju ngagai dunya baru.

Valentina Suvorova

Ada: 1948

Ukum: Ukum jil pengelama dua taun ti ditangguh

Dibaptisa: 1996

Interbiu

Kati asai ati nuan pasal ukum tu?

Dituduh baka penjenayah amat ngemaluka, laban aku nyembah Petara ti pengerindu, gaga ati sereta pengasih. Aku selalu berasai irau. Kekadang, aku enda ulih tinduk malam, pedis pala, tinggi darah enggau pedis belakang.

Nama utai ke nulung nuan mengkang positif?

Utai ke nulung aku nya, pengerindu sereta ati ti beterima kasih ke Petara kitai Jehovah, jaku lalau, enggau gerempung Iya. Ari suba aku nemu pasal pengerindu, pengasih, tulung enggau peransang ari Apai kitai ti di serega, Jehovah. Tang diatu baru meh aku ngasaika lebih agi, Jehovah nyaga pengidup aku ninting hari lalu nulung aku mengkang tetap ati ke Iya. Aku ngasaika utai tu ketegal tulung ari bala menyadi, kaban rapat, menyadi ke betanggungjawap ba eklisia, eklisia sereta semua gerempung. Terima kasih semua!

Kitai amat beterima kasih ke teladan ti manah ari bala menyadi kitai ke tuai ba Rusia. Pemerani sida ngetanka pengelurus nya endang patut ditunda, lalu utai ke penting agi nya, sida berega ba mata Petara.—Jaku Dalam 16:31.

a Menyadi Valentina Baranovskaya, ke beumur 70 taun, dijil pengelama dua taun. Menyadi Aleksandr Ivshin, ke beumur 63 taun, dijil pengelama tujuh taun setengah. Menyadi Yuriy Savelyev, ke beumur 68 taun, dijil pengelama enam taun.

Nuan Engka Rindu Meda Tu

BERITA TI PEMADU BARU

Dijil Ketegal Pengarap Sida—Rusia

Pegawai ari opis ti nyaga pengelikun dalam menua (FSB) nangkap Dennis Christensen laban iya sama enggau pengawa begempuru Saksi-Saksi Jehovah ke enda ngachau orang ba Oryol, Rusia.

BERITA TI PEMADU BARU