Dua iku ari United States House of Representatives, iya nya, sebagi ari perintah menua ti netapka undang-undang, udah ngaga siti dokumen ke dikumbai House Resolution 958 ti bedawa menua Rusia endang salah lebuh nangkap sereta ngetan menyadi kitai Dennis Christensen di jil. Tu siti ari dokumen ke pemadu baru, ari mayuh dokumen bukai ti ngakim Rusia laban merinsaka bala menyadi kitai ketegal pengarap sida.

Menyadi Christensen ditangkap lalu dijil kena Mei 2017 semina laban iya enggau gempuru Saksi-Saksi Jehovah. Dua iku Pengari, iya nya Eliot L. Engel enggau Michael T. McCaul, ngeluarka dokumen tu kena 8 Mei, 2020, ti ngasuh perintah Rusia ngelepaska Menyadi Christensen enggau lengkas.

Dokumen tu madah: “Kena 6 Februari, 2019, Dennis Christensen, seiku Saksi-Saksi Jehovah sereta rayat menua Denmark, diukum jil pengelama enam taun. The United States Commission on International Religious Freedom bedawa pemutus tu endang salah. Pemutus tu endang nyata nyadika bukti ti nunjukka, perintah Rusia ngelanggar hak bejalaika pengarap diri, lebuh iya merinsaka, tauka nejuka orang merinsaka orang ke megai pengarap.”

Kena 25 Mei, 2020, nya baru Menydi Christensen udah tiga taun ditan ba rumah jil. Iya seiku ari 32 iku menyadi lelaki engau menyadi indu kitai ke dijil ba Rusia. Semilan iku ari sida udah dikumbai salah, lalu 23 iku ke bukai benung dijil nganti kes sida diperesa. Bisi mega 18 iku menyadi kitai ke ditan dalam rumah sida empu. Kenyau ari tuan 2017, lebih ari 900 buah rumah menyadi kitai di Rusia udah diselungkai. Ketegal tu, perintah Rusia udah nuduh 331 iku Saksi-Saksi Jehovah salah.

Pengari perintah Amerika Serikat enggau Eropah udah balat amat nganu Rusia ketegal merinsaka Saksi-Saksi Jehovah.

Enda ngira sekalika dokumen House Resolution 958 tu diterima, lalu ngasuh perintah Rusia berubah, tauka enda, kitai andalka Jehovah deka terus nulung bala menyadi kitai di Rusia betan enggau gaga ati. Kitai enda sabar nganti maya Jehovah deka ngemunaska semua ke “ngaga atur ti jai lalu ngumbai atur nya betul.”—Masmur 94:20-23.