Genap 25 Mei 2020, Menyadi Dennis Christensen udah tiga taun dijil ba Rusia. Iya ditangka kena 25 Mei 2017. Kenyau ari nya, bala menyadi Kristian ke bukai selalu nanya, baka ni iya napi semua utai ke enda lurus tu? Iya seruran meri saut ti sama, “Pengarap aku majak kering.”

Menyadi Christensen madahka: “Diatu, aku empu ngasaika utai ti ditulis ba Bup Kudus iya nya James 1:2, 3. Ayat dia bisi nyebut, “Menyadi, lebuh kita dituntung mayuh macham penguji, kita patut gaga ati, laban kita nemu, lebuh pengarap kita diuji, iya ngadaka ati ti tan.”

Utai ke ngalitka ati, Menyadi Christensen majak kering ba pengarap. Indah, iya majak gaga ati taja pan utai ke ditapi iya nya majak pedis, lalu iya mega selalu asa ati.

Pengudah Menyadi Christensen ditangkap, iya terus ditan seraya nganti kes iya dipechara. Endur iya ditan enda jauh ari endur iya diau, ba Oryol. Udah nya baru bini iya Irina dikemendarka ngabas iya. Menyadi Christensen ditan dia pengelama dua taun. Kena bulan Februari 2019, kot mutuska Menyadi Christensen dijil pengelama enam taun. Iya nguji ngapil kes tu, tang tiga bulan udah nya, peminta iya enda diterima. Iya lalu dipindahka ngagai rumah jil ke bukai, ti penyauh kira-kira 200 km ari Oryol. Tu ngujungka seduai iya Irina majak jauh ari pangan diri.

Kenyau ari taun nyin tadi, iya ke bendar iya Menyadi Christensen ulih minta baru, ngambika iya ulih dilepaska tumu agi ari haribulan ke patut. Tang nyentukka diatu, iya udah tiga kali nganjung peminta, lalu ketiga-tiga peminta nya ditulak. Taja pan utai tu ulih ngasuh iya asa ati, tang iya tetap sabar napi nya.

Menyadi Christensen enggau baruh ati ngaku: “Aku enggau Irina agi jauh amat ari pengidup ti sempurna. Tang kami deka terus belajar betan, lalu mandangka ati ti gaga taja pan benung napi penguji. Utai ke pemadu beguna nya, kami majak semak Petara, iya nya Apai kitai Jehovah.”

Sampi kitai seruran semak bala menyadi kitai ba Rusia ti napi utai ke enda lurus. Kitai mega andal, Jehovah tentu terus nulung sida betan lalu gaga ati.—Matthew 5:11, 12.