Enda lama da agi Kot Pelilih Leninskiy ba Nengeri Smolensk deka madahka pemutus pasal kes Menyadi Tatyana Galkevich enggau Valentina Vladimirova. Piak bedawa bedau minta sebarang ukum ke deka diberi ngagai sida.

1. 14 Mei 2019

   Piak bekuasa muka kes jenayah ngelaban Tatyana enggau Valentina. Bala polis nyerungkai apartment dua iku menyadi indu tu, lalu ngetanka sereta nasat seduai iya pengelama lebih ari 48 jam. Taja pan seduai iya bisi penanggul ba pengerai, tang kot ngasuh seduai iya dijil seraya nganti pemutus kes sida

2. 22 November 2019

   Pengudah lebih ari enam bulan, Tatyana seduai Valentina dilepaska ari rumah jil sementara lalu ditan ba rumah diri empu

3. 31 Disember 2019

   Valentina nyadi balat sakit lalu tama sepital

4. 6 Ogos 2020

   Pengudah ditan ba rumah diri empu pengelama kira-kira lapan bulan, Tatyana dilepaska tang enda diasuh pansut ari nengeri iya. Valentina mengkang ditan ba rumah iya empu, lalu ba dia iya semina ulih bejaku enggau seiku ari ruang bilik sereta luyar iya

5. 2 Oktober 2020

   Piak bekuasa nuduh Tatyana seduai Valentina ba dalam siti dokumen ke ngundan 400 lambar. Dalam dokumen nya, sida dituduh nguji “ngelalaika pengawa gerempung ekstremis”

6. 14 Oktober 2020

   Lebuh hakim berengkah meresa kes tu, iya mutuska bukti ke dikenataika piak bedawa enda ulih dikena ba kot, lalu iya mulaika kes tu ngagai opis penawa. Taja pan Valentina enda ulih bediri maya kes tu diperesa ketegal penanggul iya ba pengerai, tang kot agi enggai ngelepaska iya ari ditan ba rumah diri empu

7. 25 Februari 2021

   Kot apil enda setuju enggau pemutus hakim nya, lalu ngasuh kes tu terus dipechara ba kot

Kitai besampi awakka Jehovah terus “ngelindung sereta nyaga” Valentina, Tatyana, enggau semua bala menyadi Kristian kitai ke benung diperinsa ba Rusia enggau Crimea.—Masmur 28:7.