Kitai mayuh menyadi Krisitan ti biak ke dikesayauka kitai ba Rusia. Dua iku entara sida nya, Menyadi lelaki Yegor Baranov enggau Menyadi indu Darya Dulova. Seduai iya mengkang berani taja pan sida engka deka didawa lalu diberi ukum jil ti panjai. Menyadi Yegor beumur 19 taun, lalu iya benung dikurung dalam jil, nganti kes iya dipechara ba kot. Lalu Menyadi Darya, beumur 18 taun aja lebuh piak bekuasa kala datai nyelungkai rumah iya. Seduai iya ke pemadu biak entara lebih 380 iku menyadi kitai ba Rusia ke udah dituduh ngereja jenayah ketegal pengarap sida.

Kenyau ari 27 Mei 2020, Menyadi Yegor ditan nyentukka kes iya dipechara ba kot. Menyadi Darya benung nganti pemutus ba dua iti kes iya. Taja pan seduai iya napi mayuh penusah, tang sida agi keran deka mengkang tetap ati ngagai Jehovah.

Kena 27 Mei, bala ari Federal Security Service (FSB) ke bepegai senyata, nyelungkai rumah alai Menyadi Yegor seduai indai iya diau. Sehari nya, Hakim Aleksey Shatilov mutuska Yegor patut dijil, ketegal iya seiku ari “tuai” entara bala Saksi Jehovah ba endur nya.

Taja pan utai ke nyadi nya balat ngenakutka, tang Menyadi Yegor madahka iya ngasaika pemaik pengudah iya besampi ngagai Jehovah. Ku iya nerangka: “Seiku ari sida ke nyelungkai rumah kami madahka, ari ulah aku, aku berupai baka ke udah besedia lebuh sida datai ngenyit.”

Menyadi Yegor seruran ngingatka diri, “Enti Jehovah nejuka sesiti utai nyadi, reti iya, aku ulih tan napi utai nya.” Ku iya nampung baru: “Utai ti nulung aku muai asai ati ti takut, iya nya, lebuh aku bebendar besampi ngagai Petara, minta tulung sereta roh kudus. Pia mega, aku nemu diri ukai ngereja jenayah. Nyadi, ati aku beresi, lalu aku nemu diri benung diperinsa ketegal pengarap.”

Menyadi Yegor enda ngasaika rumah jil nya ulih ngemedis. Laban orang jil ke bukai, ti enda bangat jai, amat bebasaka iya sereta ngintu iya enggau manah. Ba mata sida, iya baka seiku madi ti biak. Ku Menyadi Yegor: “Indah sida nemu, aku enda patut ditan dia.”

Kena 1 Ogos 2018, bala polis nyelungkai apartment alai Menyadi indu Darya enggau indai iya diau. Menyadi Darya nerangka, taja pan iya stres lebuh rumah iya diserungkai lalu iya ditangkap, tang pengarap iya tetap teguh. Ku iya madah: “Aku keran deka mengkang tetap ati ngagai Jehovah. Enda ngira nama utai ke nyadi, aku deka nyembah Jehovah, datai ke ujung.”

Kes Menyadi Darya nya berengkah kena bulan September 2019, ba Kot Nengeri Karpinsky di Begian Sverdlovsk. Bisi sekali lebuh kes iya dipechara ba kot, Menyadi Darya nerangka, nya endang siti utai ti biasa, lebuh seseiku orang nemu berita ti ngagaka ati, sida tentu deka bekunsika berita nya enggau orang bukai. Iya madah: “Ambika chunto, aku nemu, enda lama da agi Petara deka ngaga bumi tu nyadi paradais. Maya nya, nadai orang deka nyabak, kelimpah ari nyabak laban gaga ati. Enda ka berita ti ngagaka ati tu, patut ngasuh aku deka madahka orang bukai?”

Taja pan Menyadi Darya ngetanka diri enggau berani sereta pintar, iya diukum kena 27 Januari 2020. Iya diberi ukum jil pengelama setaun, tang maya nya iya enda nyadi iya dijil. Luyer ke ngarika iya lalu ngapil pemutus nya.

Kena 6 Ogos 2020, Kot Menua Sverdlovsk nginsil pemutus ke udah diberi nya. Kes iya lalu dipulaika baru ngagai Kot Nengeri Karpinsky, ngambika kes nya ulih diperesa seiku hakim ke bukai. Haribulan alai kes nya deka dipechara bedau diputuska. Seraya iya nganti kes tu dipechara baru, iya mega benung ngetanka diri ba siti da agi kes, ke nyengkaum indai iya enggau tiga iku Saksi ke bukai.

Menyadi Yegor enggau Menyadi Darya udah belajar mayuh utai ari penguji ke ditapi seduai iya.

Menyadi Darya madah: “Keringka meh pengarap nuan enggau chara macha Bup Kudus, nyediaka diri ke gempuru, lalu belajarka meh lagu Perintah Petara. Mengkang kisuk enggau pengawa ti manah, baka belematika ayat Bup Kudus ti ulih nulung nuan mutarka asai ati ti irau sereta takut ke utai ti engka nyadi dudi hari.”

Menyadi Yegor nerangka: “Kena betan lebuh diperinsa, nuan enda tau enda ngembuan kaul ti rapat enggau Petara. Anang masau jam nuan. Keringka meh kaul nuan enggau Jehovah, kenyau ari diatu.”

Dalam Bup Kudus mayuh amat chunto pasal chara Jehovah nulung nembiak iya ke agi biak mengkang berani. Kitai nemu Iya endang deka nyukung bala menyadi ti dikesayauka kitai ke agi biak napi pemerinsa tu ba Rusia, sereta di serata dunya.—1 Samuel 1:20; 16:18; 2 Raja 5:1-3; Daniel 1:14-17; 3:17-27.