Kena 3 September 2020, dua iku menyadi kitai ke lelaki enggau dua iku menyadi kitai ke indu dikumbai salah sereta diukum ba Kot Nengeri Novozybkov ba Begian Bryansk. Sida empat iku nya, Vladimir Khokhlov, Eduard Zhinzhikov, Tatyana Shamsheva enggau Olga Silaeva. Kot nya meri tiap iku sida ukum jil pengelama entara setaun ngagai setaun tiga bulan. Taja pia, sida semua terus dilepaska, laban sida empat iku udah ditan ba jil sepengelama nya, lebuh sida nganti kes nya dipechara.

Vladimir Khokhlov

• Ada: 1977 (Novozybkov, Begian Bryansk)

• Biograpi: Kereja iya, mekanik. Sebedau nyadi Saksi Jehovah, iya nyadi soldadu. Iya rindu main bol, macha, nginti, sereta nebah gita

• Seiku kaban kala meransang iya belajarka Bup Kudus. Iya jadi enggau Olga kena taun 2007. Seduai iya bisi seiku anak indu ke benama Anastasia. Sida sebilik begulai nyembah Jehovah

Tatyana Shamsheva

• Ada: 1977 (Cherepovets, Begian Vologda)

• Biograpi: Iya seiku pakar ekonomi. Udah betaun-taun iya ngajar ekonomi, undang-undang, sereta akauntant. Iya dibaptisa kena taun 1995. Iya rindu nunjukka ajar ti manah ari Bup Kudus ngagai orang bukai

Olga Silaeva

• Ada: 1988 (Davydovo, Begian Moscow)

• Biograpi: Iya ke pemadu biak entara tiga iku semadi. Iya kala belajar nyadi injineer ba kolej. Iya rindu bejait, macha, sereta main volleyball. Baka indai, iya pan belajarka Bup Kudus lalu nerima ajar nya ba pengidup

Eduard Zhinzhikov

• Ada: 1971 (Zadnya, Begian Bryansk)

• Biograpi: Iya kala gawa nyadi tukang tuchi sereta welder besi. Indah iya kala digaji piak polis. Iya suba sebagi ari raban artis, lalu jadi enggau seiku indu ari raban nya, Tatyana, kena taun 1993. Iya rindu bepantun sereta nebah gita

• Enda lama sebedau taun 2000, iya berengkah belajarka Bup Kudus ngambika ngiga saut ngagai tanya ke bisi ba pengidup iya. Utai ke ditemu iya ari Bup Kudus meransang iya muai tebiat ti enda manah lalu ngemanahka agi pengidup diri sebilik. Ubah ke digaga iya ngalitka ati bini iya. Asil iya, Tatyana mega nyadi seiku Saksi Jehovah

Kena 11 Jun 2019, piak ti bekuasa nyelungkai 22 buah rumah menyadi kitai ba Begian Bryansk, Rusia. Maya nya, Menyadi Tatyana Shamsheva enggau Menyadi Olga Silaeva ditangkap. Seduai iya ditan pengelama 245 hari, nganti kes sida nya dipechara ba kot. Kena bulan Mei 2020, seduai iya dilepaska, diasuh pulai ke rumah lalu terus nganti maya kes dipechara.

Kena 16 Oktober 2019, piak bekuasa ngepunka siti kes bedawaka Menyadi Vladimir Khokhlov enggau Menyadi Eduard Zhinzhikov. Pengudah nya, kes seduai iya disegulaika enggau kes Menyadi Tatyana seduai Olga nya tadi. Tujuh hari udah bekau nya, Menyadi Vladimir seduai Eduard lalu ditan nyentukka kes tu dipechara diatu.

Dua iku menyadi indu nya kala diinterbiu ba video Berita ti Pemadu Baru ari Raban ti Ngiring 2020 #5. Menyadi Olga madahka, sekumbang lapan bulan iya dijil, utai ke dipelajarka iya nya, “Jehovah seruran meri roh kudus, ngambika kitai tan napi sebarang penguji ke datai.” Enggau ati ti andal, Menyadi Tatyana pan madah: “Jehovah semak aku. Iya sigi nulung, nyukung enggau ngeringka kitai.”

Kitai andalka Jehovah deka terus nulung semua menyadi lelaki enggau menyadi indu ke benung dijil, sereta sida ke engka deka dijil lebuh kes sida dipechara ba kot dudi hari. Tentu Jehovah meri sida pengelantang sereta pemaik ba ati, seraya sida tan natka penguji nya.—1 Korint 10:13.