Kena 23 April 2021, Kot “Industrial District” ba Smolensk ngumbai Menyadi Yevgeniy Deshko, Ruslan Korolyov, enggau Valeriy Shalev besalah. Menyadi Ruslan enggau Valeriy diberi ukum jil pengelama enam taun setengah ke ditangguh. Menyadi Yevgeniy diberi ukum jil pengelama enam taun ke ditangguh.

Yevgeniy Deshko

• Ada: 1989 (Sochi)

• Biograpi: Kala gawa nyadi tukang urut, deriba sereta tukang elektrik. Iya dibesaika apai indai ke Saksi. Iya dibaptisa kena taun 2012. Ketegal iya bebasaka standard Bup Kudus, iya nulak pengawa soldadu lebuh iya dikangau. Entara 2012 ngagai 2014, ari ke nyadi soldadu iya gawa nyadi penulung ba sepital alai orang tuai berubat

Ruslan Korolyov

• Ada: 1982 (Smolensk)

• Biograpi: Kenyau ari biak iya bisi minat ngaduka perengka elektronik. Lebuh iya mansang besai, iya nyadi mekanik. Kala nyadi soldadu ba menua Rusia. Lebuh iya berengkah belajarka Bup Kudus enggau Saksi-Saksi Jehovah, iya tetemuka pengelantang ari utai ke dipelajar. Iya dibaptisa kena taun 2004

Viktor Malkov

• Ada: 1959 (Smolensk)

• Biograpi: Iya kala gawa nyadi mekanik, tukang kayu sereta nirika atap rumah. Iya jadi enggau bini iya Vera kena taun 1992. Iya rindu main bul kenyau ari biak. Iya kala ngibun menyadi lelaki iya ti nyau buta

  Iya dikelala orang ari ulah iya ti amat mangah. Ketegal penganas nya, iya kala dijil pengelama tujuh taun. Seduai bini iya nyau deka sarak. Tang pengudah belajarka Bup Kudus enggau Saksi-Saksi Jehovah, iya nyadi orang ti manah, diau bebaik enggau orang bukai, nitihka adat sereta nyadi laki ti amat manah. Iya dibaptisa kena taun 2008. Lalu iya nadai kena 26 April 2020

Valeriy Shalev

• Ada: 1977 (Yartsevo)

• Biograpi: Lebuh agi nembiak iya belajarka jaku English. Iya tembu belajar ba sekula soldadu. Iya pindah jauh tunga ke timur Rusia ketegal gawa nyadi akauntan ba begian soldadu. Pengudah badu gawa ke begian soldadu, iya gawa meri iring pasal duit ngagai orang. Lebuh belajar ba kolej iya betemu Svetlana. Seduai iya jadi kena taun 1999, lalu iya ngiru anak lelaki Svetlana ke beumur empat taun. Iya agi rindu main bul sereta belanda

  Indai iya dulu belajar enggau Saksi-Saksi Jehovah, lalu iya madahka Valeriy pasal utai ke dipelajar iya. Keterubah iya, Valeriy deka nunjukka utai ke dipechayaka indai iya salah, tang nyau kelama iya sedar, indai iya udah tetemuka pemendar. Iya dibaptisa kena taun 2002

Bala menyadi kitai ba Smolensk udah diperinsa sereta disakal indah sebedau Kot Besai Rusia mutuska nagang pengawa Saksi-Saksi Jehovah di serata menua Rusia kena taun 2017. Kena 19 Disember 2016, 15 iku polis ke bepegai senyata nyerebu Palan Gempuru di Smolensk lebuh bala menyadi benung begempuru. Kira-kira 60 iku menyadi kitai bisi dia maya nya. Lebuh nyerungkai Palan Gempuru, bala polis ngelalaika litaricha ke dikumbai perintah Rusia “ekstremis,” lalu udah nya ngaga diri baka ke “tetemuka” litaricha nya.

Pengudah nya, entara taun 2018 ngagai 2019, piak ti bekuasa terus nyerungkai rumah sekeda ari menyadi kitai, nangkap sida lalu ngejil sekeda ari sida. Kena 25 April 2019, bala pegawai polis nyerungkai beberapa buah rumah menyadi kitai, lalu nangkap Menyadi Ruslan Korolyov, Valeriy Shalev, enggau Viktor Malkov. Viktor nanya sida bala polis: “Aku kala dijil pengelama tujuh taun ketegal aku balat mangah, tang udah nya aku nyadi Saksi Jehovah. Kati amat nuan diatu deka ngejil aku ketegal aku . . . nusui Berita Manah?”

Beberapa hari pengudah sida tiga iku ditangkap, Menyadi Yevgeniy Deshko mega ditangkap. Ku iya ngenang: “Laban aku udah nyangka diri deka ditangkap, aku udah besedia nerima nya.” Jaku Jehovah ngagai Josua agi meransang sereta negapka iya, alai Jehovah madah: ‘Anang takut tauka lemi semengat, laban Aku, Jehovah Petara nuan bisi enggau nuan di sebarang endur nuan bejalai.’ (Josua 1:9) Yevgeniy nerangka: “Ba ayat tu Jehovah minta kitai berani, tang iya mega besemaya deka nyukung kitai.”

Lebuh Ruslan ditan, iya belematika jaku Jesus ba Matthew 6:34. Ruslan nerangka, ari ke kelalu irauka nama deka nyadi, “Aku ngisukka diri enggau pengawa nulis surat, macha Bup Kudus sereta berandau enggau orang tangkap ke bukai pasal pemendar ari Bup Kudus. Aku nyau nadai hari alai berasai irau tauka tusah ati.”

Kena Mac 2020, seiku penasat Federal Security Service (FSB) ke benama G. P. Bezrukov muai sekat ke udah diberi ke sida lalu ngelepaska sida ari ditan ba rumah sida empu. Maya nya, sida udah ditan ba jil tauka ba rumah diri empu nyau ka setaun. Menyadi kitai dibibaska baka tu ketegal ulah sida ti manah lebuh dijil sereta laban ngasika piak ti bekuasa. Penasat nya andalka, enti sida dibibaska, sida enda ngachau piak ti bekuasa, tauka rari tauka nyadi mangah enti sida diasuh kena tasat baru ila.

Sayau amat, enda lama pengudah nya, Viktor lalu nadai. Mayuh orang ngumbai iya nyadi balat sakit ketegal utai ke ditapi iya ba rumah jil, sereta stres ke diasaika iya sekumbang iya dituduh ngereja jenayah, lalu penyakit nya ke nabanka nyawa iya.

Ruslan, Valeriy, enggau Yevgeniy keran deka nunda teladan Viktor sereta mayuh menyadi ke bukai ti mengkang taluk ngagai Jehovah nyentukka mati. Ketegal sida mengkang rapat enggau Jehovah, sida ukai semina tan natka pemerinsa aja, tang sida pan gaga ati.

Ku Valeriy: “Kenyau ari aku dijil, kaul aku enggau Jehovah majak rapat. Dibanding enggau suba, aku nadai kala sesemak enggau Jehovah baka tu. Aku enda ngetu-ngetu macha Bup Kudus. Amat, pengidup ba rumah jil sigi enda senang. Tang indah orang ke nadai kaul enggau Jehovah pan ulih idup dia. Enda ka kitai ke disukung Jehovah, lebih agi ari sida, ulih tan natka diri dijil?”

Yevgeniy madah, lebih ari ke suba, diatu iya amat andalka Jehovah nulung nembiak Iya. Ku iya: “Aku andalka Apai kitai nulung kitai, kelebih agi lebuh kitai balat diuji. Nyadi diatu, aku amat jarang irau pasal nama penguji deka ditapi aku dudi hari.”

Yevgeniy nerangka, enda ngira nama pemutus ke digaga ba kot, “Aku deka enggau naka ulih betan napi semua penguji tu, lalu mengkang taluk ngagai Jehovah.”

Kitai nemu enggau saup ari Jehovah, semua menyadi lelaki tu enggau ruang bilik sida mega deka terus betan natka penusah tu enggau ati ti gaga.—2 Tesalonika 3:5.