Kena 5 Oktober 2020, a Kot Menua Zasviyazhsky ba Ulyanovsk deka madahka jaku gerah bekaul enggau kes Menyadi Lelaki Aleksandr Ganin, Khoren Khachikyan, Andrey Tabakov, Mikhail Zelenskiy, nyengkaum sepasang laki bini, iya nya Menyadi Sergey Mysin enggau bini iya, Nataliya. Sida dijangka dijil entara tiga ngagai tujuh taun. Penawa mega minta kot ngerampas duit sereta kerita sida enggau penyampau 1.57 juta rubles ($20,000 U.S. tauka RM84,377).

Aleksandr Ganin

• Ada: 1957 (Ekhabi, Pulau Sakhalin)

• Biograpi: Udah dibaptisa nyadi seiku ari Saksi Jehovah lebih ari 20 taun. Diatu iya udah pinchin lalu rindu bekebun

Khoren Khachikyan

• Ada: 1985 (Yerevan, Armenia)

• Biograpi: Ngembuan degree ba ekonomi. Kala bepekit ba gusti maya agi biak. Dikelala enggau ulah ti nelap sereta manah

• Berengkah belajarka Bup Kudus enggau Saksi Jehovah laban iya deka ngelala Petara enggau dalam agi lalu nitihka pesan Petara. Amat beterima kasih ke penemu Bup Kudus ti ulih dikearapka

Sergey Mysin

• Ada: 1965 (Kulebaki, Begian Nizhny Novgorod)

• Biograpi: Maya iya benung belajarka kursus injineer iya betemu enggau bini iya Nataliya. Seduai iya jadi kena taun 1991. Seduai iya udah nyembah Jehovah lebih ari 20 taun lalu ngembuan dua iku anak ti udah besai. Iya rindu besukan kelebih agi main lacrosse

Nataliya Mysina

• Ada: 1971 (Leningrad, diatu dikumbai Saint Petersburg)

• Biograpi: Iya dibesaika dalam ruang bilik soldadu. Kala diau ba Jerman sebedau abis belajar ari kolej nyadi pakar berubat. Iya rindu bepandukka pemakai sereta begagaka kue

Andrey Tabakov

• Ada: 1973 (Minsk, Belarus)

• Biograpi: Bekereja ba begian komputer. Jadi enggau bini iya, iya nya Marina, kena taun 2006. Seduai iya belajarka Bup Kudus enggau Saksi Jehovah lalu dibaptisa. Rindu belajar pasal perengka elektronik kelebih agi radio enggau komputer

Mikhail Zelenskiy

• Ada: 1960 (Bulaesti, Moldova)

• Biograpi: Kala bekereja nyadi orang ke belayar sereta deriba lori. Jadi enggau bini iya Victoria kena taun 1989. Ba 1990-an, seduai iya berengkah belajarka Bup Kudus. Pengerindu seduai iya ngagai Jehovah majak mansang lalu dibaptisa

Dalam tiga taun ti udah, Federal Security Service ba Rusia (FSB) berengkah matau pengawa bala menyadi kitai ba Ulyanovsk nyengkaum ngerikut randau sida ba talipun. Kena 24 Februari 2019, FSB berengkah bedawaka Nataliya seduai Sergey, sereta Menyadi Khoren, Andrey enggau Mikhail.

Tiga hari pengudah nya, dalam pukul 5 pagi, piak ti bekuasa nyelungkai rumah Menyadi Khoren, Andrey enggau Mikhail. Tiga iku menyadi lelaki nya ditangkap lalu ditan. Ba pagi ti sama Menyadi Nataliya mega nerima talipun ari seiku orang. Orang ke talipun nya madahka kerita iya rusak lalu ngasuh iya enggau laki iya, Sergey, pansut ari rumah. Maya Menyadi Sergey muka pintu, pegawai FSB ngejuka pintu lalu tama. Pegawai nya lalu nyelungkai apartment sida sereta ngerampas perengka elektronik sida sebilik. Sergey enggau bini iya, Nataliya ditangkap.

Ba hari siti, Kot Menua Leninsky ba Begian Ulyanovsk mutuska ngetan Menyadi Sergey nyentukka iya dipechara. Menyadi Nataliya enggau tiga iku da agi menyadi lelaki ke bukai ditan ba rumah.

Menyadi Sergey ditan pengelama 55 hari, enggau 123 hari ditan ba rumah. Menyadi Nataliya, Khoren, Andrey enggau Mikhail ditan entara 50 ngagai 55 hari ba rumah.

Kena pagi 15 Mei 2019, pegawai FSB nyelungkai rumah Menyadi Aleksandr lalu nangkap iya. Iya dijil pengelama dua hari.

Ke semua enam iku penginjil disekat ba sekeda pengawa sida. Taja pia, piak ti bekuasa terus nekan sida enggau chara bukai. Piak ti bekuasa ari menua nya udah nyekat akaun Menyadi Sergey enggau Nataliya sereta Menyadi Andrey. Duit simpan Menyadi Sergey enggau bini iya dalam penyampau 500,000 rubles ($6,313 U.S. tauka RM26,947) lalu duit simpan Menyadi Andrey dalam penyampau 600,000 rubles ($7,575 U.S. tauka RM32,348).

Sama meh kitai besampika bala menyadi ba Rusia ngambika sida ulih terus kering baka ku jaku pemasmur ti madah: ‘Petara endang pengelindung enggau pengering kitai, seruran sedia deka nulung lebuh maya penusah.’—Masmur 46:1.