Kena 1 April 2021, bala pemberita begelumu di Moscow kena berandauka ulang taun ke-70 Saksi-Saksi Jehovah ditaban ke Siberia. Beberapa hari pengudah nya, kena 6 April 2021, Gerempung Entarabansa Ingatka Mansa Perintah Soviet Union (International Memorial Society) mai bala pakar sejarah Rusia enggau hak mensia ngagai siti agi konferen. Bala pencheramah ukai semina bejaku pasal Operasi Utara (pengawa nabanka bala Saksi kena taun 1951) tang pia mega bisi bejuraika pasal pemerinsa ke ditapi Saksi-Saksi Jehovah di Rusia dalam mayuh taun ti udah.

Operasi Utara diatur Begian Pengelikun Menua Soviet (MGB). Kena pun taun 1951, MGB nya nulis ngagai Joseph Stalin (ke nyadi pemerintah Soviet Union maya nya) lalu madah: “Ngambika pengawa bala Saksi Jehovah (ke belalai ngelaban perintah Soviet) ditagang, kami ari MGB ngasaika perintah Soviet Union enda tau enda nangkap bala tuai pengarap Saksi-Saksi Jehovah. Nambahka nya, buru mega orang ke ditemu nyadi Saksi ke diau ba menua Ukraine, Belarus, Moldova, Latvia, Lithuania enggau Estonia, sereta semua sida sebilik, ngagai begian Irkutsk enggau begian Tomsk.” Ke pengujung iya bisi nyauka 10,000 iku orang, iya nya lebih ari 3,000 ruang bilik, ke ditaban. Dalam sejarah perintah Soviet Union, nya meh pengawa nabanka orang ke pemadu besai ti kala dipejalaika.

Aleksandr Guryanov, ke ngatur konferen nya, madah dalam jaku pemuka iya: “Pengawa merinsaka orang ke megai pengarap tu tetap agi nyadi diatu. Tu meh kebuah saritu nya amat beguna kitai berandau pasal utai ke nyadi maya Operasi Utara suba.”

Pavel Polyan, seiku pakar sejarah enggau geograpi ke mansik enggau dalam pengawa nabanka orang maya jeman Soviet Union bejaku pasal sejarah Saksi-Saksi Jehovah ba menua nya sereta kebuah sida diburu ari endur sida. Entara ujung taun 1940-an ngagai pun 1950-an, MGB nya baru sedar gerempung Saksi-Saksi Jehovah diatur enggau manah. Kelimpah ari nya, Pavel Polyan nambah: “[Saksi-Saksi Jehovah] nya landik nginjil. Ketegal perintah menua enda pechayaka Petara bisi, sida amat enda rindu pengawa Saksi-Saksi Jehovah.”

Valeriy Borshchev, ke ngetanka hak mensia sereta nyadi chairman kedua Raban Moscow Helsinki, bejaku pasal chara pegawai perintah Soviet Union nguji mejal Saksi-Saksi Jehovah ngelengkaka pengarap sida nengah propaganda enggau chara bukai. Valeriy Borshchev nerangka, nyau kelama “pesuruhjaya [ari begian pengarap] sedar, semua chara tu nadai guna laban enda ulih ngubah runding Saksi-Saksi Jehovah. Kitai patut muji bala Saksi Jehovah laban sida bebendar mengkang taluk ngagai Petara sida.”

Sergey Davidis nya seiku ari Raban ti Ngatur Pusat Ingatka Hak Mensia (Memorial Human Rights Center Council) lalu iya mega ngiring program Nyukung Orang ke Dijil Ketegal Hal Politik. Iya ngelansa pasal pemerinsa ke majak diasaika Saksi-Saksi Jehovah ba Rusia kenyau ari taun 1998. Iya berandau pasal pemutus Kot Besai Rusia kena April 2017 ti nagang gerempung Saksi-Saksi Jehovah. Iya nerangka Kot Besai nya ngaga pemutus tu laban Saksi-Saksi Jehovah ngumbai diri megai pengrap ti bendar. Dalam randau iya, Sergey Davidis nekanka poin tu: “Endang terang, tuduh tu sigi nadai logik. Laban genap iku orang ke megai sesiti pengarap, ngumbai pengarap ke dipegai iya nya meh pengarap ti bendar.”

Menyadi Yaroslav Sivulskiy, pengari Gerempung Saksi-Saksi Jehovah di Eropah, berandau pasal penusah ke ditapi bala Saksi ke ditaban ke Siberia. Iya ngenang cherita ke kala didinga iya empu ari apai indai iya ke ditaban kia. Lebuh sekeda ruang bilik sangkai ba Siberia, sida patut ngidupka diri dalam utan ke chelap, sereta nadai rumah alai diau. Sida ngelabak lubang besai dalam tanah ngambika diau dalam nya. Semua ruang bilik patut diau ba dalam lubang nya bebulan-bulan nyentukka sida ulih nirika rumah ke ulih tan. Lebuh diau dalam utan, sida patut makai daun nettle enggau kulit kayu. Mayuh ari sida mati ketegal sakit tauka enda chukup pemakai.

Menyadi Yaroslav mega nerangka, kebuah bala Saksi ditaban ke Siberi kena 1951 nya sama enggau kebuah sida diperinsa kemayaharitu. Piak ti bekuasa salah runding pasal Saksi-Saksi Jehovah. Ketegal Saksi mengkang neutral ba pengawa politik, sida ngumbai bala Saksi enggai ngasika perintah. Tang penyilap sida nya, Saksi-Saksi Jehovah dikelala enggau ulah ti ngayanka basa ngagai piak ti bekuasa, ngasika undang-undang sereta bagas gawa.

Aleksandr Guryanov ngenataika jaku penutup iya pasal pemerinsa ke benung diasaika Saksi-Saksi Jehovah di Rusia. Ku iya: “Perintah menua tu begedi bendar ngagai pengarap tu.” Semua peninga dikingatka baru, 70 taun pengudah Operasi Utara, perintah Rusia agi merinsaka Saksi-Saksi Jehovah. Rayat ti ngembuan ulah ti manah sereta ngasika undang-undang dikumbai penjenayah semina ketegal pengarap ke dipegai sida, taja pan nya hak sida empu ke patut dijaga undang-undang menua.

Video ari konferen nya ulih dipeda nengah online dalam jaku Rusia aja.