Kena 15 Julai 2020, Menyadi Dennis Christensen ditan kali kedua dalam senentang rumah jil alai orang tangkap diukum ke dikumbai SHIZO. Iya deka ditan dia abis kurang nyentukka 27 Julai 2020. Tu nyadi semina empat hari pengudah iya dilepaska ari begian SHIZO tu. Enti sema iya dianjung ngagai begian SHIZO kali ketiga, pegawai rumah jil engka deka ngumbai iya “orang tangkap ke balat amat ngelanggar adat rumah jil,” lalu ngukum iya ditan pengelama enam bulan dalam begian EPKT, iya nya, senentang rumah jil alai orang tangkap balat agi diperinsa. Bala luyar ke ngarika Menyadi Dennis deka ngapil dawa ti baru tu.

Pegawai rumah jil ngukum Menyadi Dennis laban iya enda ulih ngereja pengawa ke diasuh kereja iya ba kilang bejait di rumah jil. Tang, kenyau ari iya ditan ba rumah jil, pengerai iya majak balat. Lutur ke gawa ba rumah jil ngumbai Menyadi Dennis chukup bepengerai, lalu ulih ngereja pengawa nya, asal ga iya kekadang ngetu enda lama ngambika belelak sereta sesais. Tang, seiku lutur bukai, ti enda gawa ke rumah jil nya, udah kala meresa Menyadi Dennis suba. Iya madahka, Menyadi Dennis enda ulih ngereja pengawa ke diberi nya, ketegal penanggul ba pengerai.

Ba begian SHIZO, orang tangkap enda ulih meli pemakai, betalipun ngagai orang, diabas orang luar, tauka nerima barang ke dianjung ngagai iya ari luar. Nitihka undang-undang, orang tangkap dalam SHIZO tau diabas tuai pengarap. Taja pia, ketegal gerempung Saksi-Saksi Jehovah nadai agi direjister ba menua Rusia, bala tuai gempuru enda dikemendarka ngabas Menyadi Dennis.

Baka ke kala diriput ba ditu, kena 23 Jun, Kot Menua Lgov madahka pemutus, ngelepaska Menyadi Dennis tumu lalu nganti ukum jil iya enggau ukum mayar ganti rugi. Beberapa hari pengudah nya, piak ti bedawa ngapil pemutus nya. Pegawai rumah jil baka ke bekerejasama enggau piak ti bedawa ngambika ngenyaika nama Menyadi Dennis, lalu nagang iya ari dilepaska tumu.

Menyadi Dennis seduai bini iya, Irina, mengkang tegap sereta ngembuan runding ti positif. Kitai amat diperansang lebuh meda Jehovah ti seruran nulung nembiak Iya natka semua pemerinsa enggau ati ti liat, sereta ati ti gaga.—Kolosi 1:11.