Kena Hari Dua, 7 Mei 2019, Kot Tinggi Oryol ningaka apil ke digaga bekaul enggau kes Dennis Christensen, ke diukum jil pengelama enam taun ketegal pengarap iya. Ke diatu, kot tu agi nitihka pemutus ke udah digaga kot Rusia ke bukai. Sida enggai nerima utai ke dipadahka luyar ke ngarika Dennis, ti nunjukka iya enda salah. Tiga iku hakim ke bejalaika kes tu deka madahka pemutus sida kena ujung minggu tu.

Ba hari ti keterubah apil tu digaga, mayuh bala menyadi Kristian datai ngagai kot tu kena nyukung menyadi Dennis. Kelimpah ari nya, bisi mega diplomat ari mayuh bengkah menua, bala pemerita, sereta orang ke ngetanka hak mensia. Apil tu dipejalaika ba siti bilik mit ke ulih endur 20 ngagai 25 iku orang aja. Nya alai, kira 50 iku orang semina nganti ba luar. Taja pia, kot setuju enggau peminta luyar ke ngarika Dennis ngambika mindah ngagai bilik ke besai agi, ke ulih endur 80 iku orang. Kot nangguhka baru kes tu pengudah tiga jam dipejalaika.

Ba hari ti kedua, luyar ke ngarika Dennis minta bala hakim beratika baru mayuh bukti ti nunjukka menyadi Dennis enda salah, tang sida nulak peminta nya. Tu amat ngenusahka ati laban luyar ke ngarika Dennis amat andal bukti ke deka dipadahka tu, ulih nunjukka jaku tuduh ngagai Dennis sebedau tu endang utai ti salah. Pengujung iya, kot madahka apil tu deka disambung baru kena Hari Empat, 16 Mei. Maya nya, sida deka ningaka jaku simpul ari luyar ke ngarika kedua-dua piak.

Aram kitai terus besampi ngambi bala menyadi ba Rusia mengkang sabar sereta andal ngagai semaya Petara Jehovah. Iya tentu deka nyelamatka sida ari orang ke merinsa sida.—Masmur 12:5.