Kena 22 April 2021, Kot Pelilih Sychyovskiy ari begian Smolensk ngumbai Menyadi Nataliya Sorokina enggau Mariya Troshina besalah lalu meri seduai iya ukum jil pengelama enam taun ke ditangguh.

Nataliya Sorokina

• Ada: 1975 (Dresden, Jerman)

• Biograpi: Ari Jerman, iya pindah ngagai Saint Petersburg dulu, lalu udah nya ke Sychyovka ba Begian Smolensk. Iya gawa nyadi indu misi. Iya rindu ngaga kraftangan sereta belajarka bansa jaku baru kena iya nginjil ngagai mayuh agi orang. Iya belajarka Bup Kudus enggau Saksi-Saksi Jehovah. Utai ke dipelajar iya pasal utai ke ditempa Petara sereta pengadang ke jemah ila negu ati iya. Tu meransang iya deka nyembah Petara enggau naka ulih. Iya dibaptisa kena Ogos 1994

Mariya Troshina

• Ada: 1977 (Saint Petersburg)

• Biograpi: Kenyau ari mit, iya minat pasal sejarah. Iya gawa ngiring temuai ke datai ke nengeri iya. Iya rindu belajarka bansa jaku bukai ngambika ulih nginjil ngagai mayuh agi orang

  Iya berengkah belajarka Bup Kudus enggau Saksi-Saksi Jehovah. Utai ke ngalitka ati iya, ajar Bup Kudus sejalai enggau sains sereta sejarah. Iya nyerahka diri ngagai Jehovah kena Julai 1991. Indai iya, ke udah nadai diatu, pan kala belajar lalu dibaptisa

Kena 7 Oktober 2018, bala pegawai polis enggau Federal Security Service (FSB) nyelungkai empat buah rumah menyadi ba Sychyovka. Bala ari FSB nya ngerampas barang ari 17 iku menyadi kitai nyengkaum anak mit. Seduai iya ditangkap lalu ditan sementara.

Mariya nerangka utai ke nulung lebuh rumah iya diselungkai, iya nya macha cherita pengidup menyadi bukai ke udah kala ditangkap ketegal pengarap. Tu nulung iya nyediaka diri. Ku iya, “Lebuh rumah aku diselungkai lalu aku ditangkap, aku enda bangat irau. Aku enda nyangka diri enda kesal. Tu semina ulih nyadi ketegal saup roh kudus.”

Dua hari pengudah rumah sida diselungkai, Kot Pelilih Leninskiy ba nengeri Smolensk ngasuh dua iku menyadi indu tu ditan nganti kes seduai iya dipechara. Sida ditan dia pengelama 191 hari. Seduai iya mega ditan ba rumah diri pengelama lebih ari enam bulan.

Kedua-dua menyadi indu nya ngaku, utai ke nulung sida mujur napi penguji tu, iya nya kaul ti tegap enggau Jehovah. Nataliya nerangka, ngembuan runding Jehovah nya amat beguna. Iya madah, enti kitai disakal kitai patut ingatka diri, ari ni penatai sakal tu. Iya nyimpulka: “Kenyau ari kelia, Sitan meh ba belakang semua sakal ke nyadi ba nembiak Petara. Genap iku kitai bepeluang nunjukka diri taluk ngagai Jehovah.”

Mariya nambah: “Kaul kitai enggau Jehovah dikeringka ulih pengawa ke dikereja kitai ninting hari. Nya kebuah, tiap hari kitai patut beratika chara Jehovah nulung kitai. Belajar meh andalka Iya ba semua utai. Kemansangka pengeran nuan deka macha Bup Kudus ninting hari. Kingatka meh utai ke nyadi kelia, sereta ayat Bup Kudus ti dikerinduka nuan.”

Pengarap enggau pengeliat ati menyadi indu kitai nyadika teladan ti manah ke semua kitai. Sida terus manggaika pengarap ba Jehovah. Iya nulung sereta nyaga sida.—Masmur 115:11.