Kena 21 Oktober 2020, a Kot Pelilih Pervomayskiy ba Nengeri Omsk deka madahka pemutus kes Menyadi Sergey Polyakov enggau bini iya, Anastasia, sereta Menyadi Indu Gaukhar Bektemirova enggau Dinara Dyusekeyeva. Penawa minta kot meri ukum jil enam taun setengah ngagai menyadi Sergey. Tiga iku menyadi indu ke bukai engka deka nerima ukum jil dua taun, tang sida enda ditamaka dalam jil seagi sida enda ngelanggar sekat ke diberi ngagai sida.

Sergey Polyakov

• Ada: 1972 (Begian Murmansk)

• Biograpi: Iya belajar ba kolej deka nyadi radiophysicist. Iya kawin enggau Anastasia kena taun 2003

Anastasia Polyakova

• Ada: 1984 (Begian Murmansk)

• Biograpi: Iya belajar undang-undang ba kolej. Iya enggau laki iya Sergey, rindu belajar bansa jaku bukai nyengkaum jaku China, Kazakh, Serbia sereta jaku bengal bisu Rusia

Gaukhar Bektemirova

• Ada: 1976 (Uryl, Kazakhstan)

• Biograpi: Iya ke pemadu biak entara enam iku menyadi. Iya dibesaika ba endur ti bebukit ba Kazakhstan, lalu iya amat rindu meda rampa menua. Pengudah betaun-tuan berundingka nama tuju pengidup, nyau kelama iya tetemuka saut ti ngemuaska ati ari Bup Kudus. Iya bulih pengering sereta pengelantang ari utai ti dipelajar iya ba Bup Kudus, lalu tu nulung iya napi utai ti enda lurus tu

Dinara Dyusekeyeva

• Ada: 1982 (Leningradskoye, Kazakhstan)

• Biograpi: Kenyau ari mit, iya berunding enggau dalam pasal nama tuju pengidup. Lebuh iya beumur 17 taun iya berengkah belajarka Bup Kudus. Iya rindu belajar pasal penemu-dalam ari Bup Kudus, sereta alit ati deka nemu sapa nama pengerang Bup Kudus, iya nya Jehovah. Iya rindu main bola keranjang, bola tampar, belanda sereta bebasikal

Kena malam 4 Julai 2018, Menyadi Sergey enggau bini iya Anastasia benung tinduk lebuh seraban polis ke bepegaika senyata mechahka pintu penama apartment sida lalu tama. Bala polis bekenaka penutup mua, lalu nyamah Menyadi Sergey. Seduai iya ditangkap lalu ditaban ngagai endur ngetanka orang ke nganti diri dipechara di kot. Kenyau ari taun 2017, lebuh Kot Besia Rusia mutuska nagang pengawa Saksi-Saksi Jehovah, Sergey seduai Anastasia meh laki-bini keterubah dijil ba Rusia. Pengelama lima bulan Sergey enggau Anastasia ditan ba sil kediri aja, diserara ari pangan diri. Pengudah nya, seduai iya lalu ditan ba rumah diri empu pengelama tiga bulan.

Piak ti bekuasa ba Begian Omsk sekali agi nyelungkai rumah bala Saksi-Saksi Jehovah enggau chara ti enda lurus kena bulan Mei 2019. Maya nya, Menyadi Gaukhar enggau Dinara pan ditangkap. Kes seduai iya disegulaika enggau kes Menyadi Sergey seduai Anastasia. Kes sida empat iku nya lalu berengkah dipending kot kenyau ari 1 April 2020.

Kitai andalka, Jehovah deka meri pengering ke diguna nembiak Iya ngambika betan natka utai ti enda lurus tu.—Epesus 3:20.