Kena 7 Oktober 2020, siti kot mutuska Menyadi Yuriy Zalipayev enda besalah. Tang opis penawa ngapil pemutus nya, lalu apil nya diperesa Kot Besai ba Republik Kabardino-Balkaria. Kena 25 Januari 2021, Kot Besai nya nulak apil ari piak ti bedawa lalu ngetanka pemutus asal ti madahka Menyadi Yuriy enda besalah. Penawa nya tau ngapil pemutus tu sekali agi. Taja pia, ke diatu semua tuduh ti ngelaban Menyadi Yuriy udah ditutup, lalu iya pan ulih minta diri dibayar ganti rugi ketegal iya udah dituduh enggau salah.

Taja pan iya nemu kot apil nya ulih nukar pemutus asal nya lalu ngumbai iya besalah, tang Yuriy andalka Jehovah sereta mengkang berani lebuh dipechara. Enda lama sebedau pemutus kot dipadah, Yuriy nerangka enggau berani pasal Petara ti deka ngemunaska semua penyai, nyengkaum pemerinsa ke ditapi Saksi-Saksi Jehovah ba Rusia. Ku iya: “Taja pan bala penawa bebendar nyerang kami, tang bisi siti utai ti patut ditemu sida. Sida enda ulih mujur ngerusakka pengarap aku ngagai semaya Petara ti deka muai semua penyai ba dunya tu enda lama da agi. Aku arapka semaya Petara ti madah, enda lama agi, orang ari semua bansa enggau menua di dunya tu deka nemu, semua sida diri menyadi. Iya ke amat, nadai utai melah sida. Bup Kudus madahka, Petara ‘deka mutarka laya entara mayuh bengkah bansa ti besai. Sida deka nempa pedang sida nyadi pengeradu tanah lalu sangkuh sida nyadi duku kena nyarau kayu. Semua bansa deka badu agi beperang, nadai agi nyendiaka diri beperang.’ —Isaiah 2:4.

“Aku andalka semaya tu endang deka dikeamatka enda lama agi!”