Kena 13 Ogos 2019, kot ngapil ba menua Kirov mutuska Menyadi Andrey Suvorkov dibibaska ari rumah jil. Taja pan Menyadi Suvorkov diberi mimit pengelepas, tang kes iya tetap agi benung ditasat.

Baka riput ke sebedau tu, Menyadi Suvorkov ditangkap enggau apai tiri sereta tiga iku menyadi iya ke bukai kena 9 Oktober 2018. Ba hari ti sama, bisi 19 buah rumah diabas piak bekuasa ke bekenaka tuping mua enggau ngenyit.

Menyadi Suvorkov nyeritaka utai ke nyadi maya rumah iya diabas enggau ngenyit, “Mayuh barang kami ke berega dirampas. Tang nya enda ngirauka kami duai bini aku, laban kami udah bebendar deka idup pengumbas iya lalu enda kelalu irau pasal reta tengkira. Kami agi ulih berasai lantang laban bisi lalau ti manah ari Matthew 6:21, “Laban dia alai pengaya kita, dia meh alai ati kita.””

Pengudah rumah sida diabas enggau ngenyit, Menyadi Suvorkov, apai tiri iya, enggau tiga iku da agi menyadi iya dituduh penjenayah ketegal sida belaguka lagu Perintah Petara, belajarka litaricha ke bekaul enggau pengarap, sereta ngembuan Bup Kudus Salin Dunya Baru dalam bansa jaku Rusia. Semua sida lalu ditan enda lama, pia mega nganti kes sida diapil kena nentuka sekali sida patut dibibaska tauka ditan nyentukka kes sida nya dipechara.

Menyadi Suvorkov madah, “Aku ditan pengelama dua malam. Keterubah, aku enda ngetu besampi. Aku amat andal Jehovah deka ningaka sampi aku, lalu nyukung aku. Aku ingatka leka lagu kitai lalu belaguka nya. Enda berasai, aku ulih ingat 50 iti lagu enggau leka lagu iya sekali.”

Kot mutuska menyadi Suvorkov enggau ke bukai tetap ditan nyentukka kes sida dipechara. Ba minggu keterubah nya, Menyadi Suvorkov beberatka chara meransang orang bukai. Iya madahka, “Dalam sampi, aku nyebut nama menyadi lelaki kitai, lalu aku nulis surat ngagai alamat ke dikingatka aku. Tu ngasuh aku berasai nyamai agi.”—Kereja Rasul 20:35.

Enda berasai bebulan udah nya, semua menyadi lelaki kitai ditanka ba rumah, kelimpah ari Menyadi Andrzej Oniszczuk. Menyadi Suvorkov, menyadi lelaki keterubah ari menua Kirov ke dibibaska ari ditan ba rumah.

Menyadi Suvorkov ngenang baru, “Aku amat beterima kasih laban bisi ngasaika utai nya ba rumah jil. . . . Aku enda nemu nama deka nyadi dudi hari, tauka kati aku dijil baru. Tang, berengkah ari nya, aku amat andal Jehovah sereta gerempung Iya deka nyukung aku, indah maya aku ba rumah jil. Aku enda takut dijil.”