Kena 5 November 2019, Kot Menua Tomsk mutuska menyadi Sergey Klimov dijil pengelama enam taun. Sebedau tu, semina menyadi Dennis Christensen aja ke udah nerima ukum jil ti sama. Nambahka nya, kot mega natak menyadi Klimov ba sekeda utai, lalu tu meh ukum ti pemadu berat kenyau ari taun 2017, belabuh Saksi-Saksi Jehovah disakal.

Menyadi Klimov ditangkap kena 3 Jun 2018, maya piak bekuasa datai ngenyit ngagai dua buah rumah Saksi-Saksi Jehovah. Bisi 30 iku bala menyadi kitai, nyengkaum seiku menyadi indu ke beumur 83 taun ditan lalu ditasat. Tang udah nya semua sida dibibaska. Semina menyadi Klimov agi ditan. Iya dituduh ngereja jenayah lalu ditan pengelama dua bulan. Lalu timpuh iya ditan udah tujuh kali diapil. Reti iya, sebedau iya diputuska dijil pengelama enam taun, iya endang udah ditan sereta diserara ari sida sebilik pengelama setaun lima bulan.

Luyar ke ngarika menyadi Klimov deka ngapil baru kes tu. Kelimpah ari nya, kena 20 Ogos 2018, kes menyadi Klimov ari Rusia tu kala dibai ngagai Kot Eropah ke Bekaul enggau Hak Mensia, laban iya ditan enggau enda dipechara.

Sepemanjai taun 2019, pengawa datai ngenyit, nangkap, sereta ngetan bala menyadi kitai majak balat ba Rusia. Tang, bala menyadi kitai amat tegap sereta berani. Tu terang nunjukka, Jehovah meh benung merekat bala menyadi ke bepanggai ba Iya. Tu amat meransang semua kitai.—Masmur 56:1-5, 9.