Kena pagi Hari Lima, 13 Disember 2019, Kot Menua Leninsky ba bandar Penza, mutuska Menyadi Vladimir Alushkin dijil pengelama enam taun. Kes tu mega bekaul enggau tiga iku menyadi lelaki sereta dua iku menyadi indu. Lalu seiku ari menyadi indu nya Tatyana, bini Alushkin empu. Sida lima iku tu disekat ba rumah pengelama dua taun. Reti iya, sida seruran dikemataka dalam timpuh dua taun tu, lalu engka ulih dijil enti sida ngelanggar sebarang undang-undang ke udah ditetapka. Tang, semua kes enam iku menyadi tu deka diapil.

Baka riput sebedau tu, kena 15 Julai 2018, abis nadai sepuluh iku polis bekenaka tutup mua, tama enggau ngenyit ngagai endur Menyadi Alushkin diau. Sida mega bebaika senyata. Pengudah sida nyelungkai rumah Menyadi Alushkin pengelama empat jam, sida terus ngerampas sekeda utai baka talipun, perengka elektronik, Bup Kudus, sereta litaricha ke bukai. Ba hari nya mega, sida datai ngenyit ngagai lima buah da agi rumah Saksi ke bukai. Udah nya, dalam urung 40 iku bala menyadi kitai dibai ngagai balai polis, lalu sida ditasat.

Keterubah, Menyadi Alushkin ditangkap pengelama dua hari aja. Udah nya, Kot Menua Pervomayskiy ba Bandar Penza ngasuh iya dipindahka, lalu ditan pengelama dua bulan sebedau kes iya diapil. Indah kot nya udah dua kali ngemanjaika timpuh iya ditan. Pengudah nyauka enam bulan, iya dipindahka baru, lalu disekat ba rumah nyentukka 13 Disember.

Kelimpah ari Menyadi Alushkin, tiga iku da agi menyadi lelaki ke bukai mega dituduh penjenayah iya nya, Menyadi Vladimir Kulyasov, Andrey Magliv, enggau Denis Timoshin. Sida disekat ba rumah seagi kes sida agi benung ditasat sereta dipechara. Dua iku da agi menyadi indu iya nya, Tatyana Alushkina enggau Galiya Olkhova mega disekat kenyau ari Februari 2019. Sida disekat ari ngagai endur bukai tauka begigaka orang bukai.

Kena bulan Ogos 2019, the United Nations Working Group on Arbitrary Detention (WGAD), ngeluarka 12 lambar dokumen ke ngembuan penemu sida pasal kes Menyadi Alushkin. Sida amat enda setuju enggau penemu pemerintah Rusia ke nangkap Menyadi Alushkin. Ku WGAD madahka, Menyadi Alushkin “enda patut ditangkap, ditan, tauka dipechara.” Indah, sida ngasuh pemerintah menua nya jampat ngelepaska iya. Utai ke dipadahka WGAD amat diterima entarabansa, lalu nya meh nyadika pelasar maya bala menyadi kitai ngapil kes sida. Tang sayau, hakim menua nya enda ibuhka penemu WGAD. Maya iya macha pemutus kot kena 13 Disember, iya madahka, atur ti pemadu beguna sereta ulih dikena nya, pemutus ke diberi Kot Besai Rusia kena taun 2017, iya nya pengawa Saksi-Saksi Jehovah ke bekaul enggau pengarap patut ditagang.

Taun tu, udah 18 iku bala menyadi kitai dikumbai besalah ba Rusia. Lalu semilan iku ba entara sida udah dijil, sereta timpuh sida dijil mega enda sama. Lebih ari 40 iku bala menyadi ditan sebedau kes sida diapil, lalu 19 iku da agi disekat ba rumah. Nyentukka diatu, nyauka 300 iku bala menyadi kitai ba Rusia dikumbai penjenayah ketegal pengarap sida.

Kitai tentu berasai tusah ati maya ninga bala menyadi kitai disakal. Tang kitai enda tekenyit. Jehovah mega besemaya deka nyukung sereta rinduka sida. Kitai besampi ngambi ‘roh kudus Petara bisi enggau sida.’—1 Peter 4:12-14.