Kena 21 Januari 2021, Kot Pelilih Obluchenskiy ba Jewish Autonomous Region ngumbai Menyadi Anastasiya Sycheva besalah. Iya diberi ukum jil dua taun ti ditangguh. Iya enda ibuh dijil ke diatu.

Anastasiya Sycheva

• Ada: 1977 (Teploozyorsk, Jewish Autonomous Region)

• Biograpi: Iya bisi empat iku menyadi, tang dua iku udah nadai. Iya bulih degree misi ari universiti. Keterubah iya gawa ba klinik lutur ngeli, udah nya ba sepital psikiatri. Pengudah kaka iya nadai, iya sanggup ngibun dua iku anak menyadi iya ke agi biak. Iya mega ngibun indai iya ke lama napi penyakit, nyentukka indai iya pan nadai

  Lebuh agi nembiak, iya suah berundingka pasal pemandak pengidup mensia. Tu ngujungka iya meresa Bup Kudus. Dalam Bup Kudus iya tetemuka saut tu ngemuaska ati iya. Kena taun 1994 iya dibaptisa lalu nyadi Saksi Jehovah

Kena Oktober 2019, piak bekuasa ba Rusia nepuka nama Anastasiya ba lis orang “ekstremis”. Kena 25 September 2019, Begian Nasat ari Federal Security Service (FSB) di Birobidzhan ngepunka kes jenayah ngelaban menyadi Anastasiya. Iya dituduh sengaja neruska pengawa Saksi-Saksi Jehovah laban iya datai begempuru sereta bekunsika utai ti dipechaya diri ngagai orang bukai.

Lebuh kes iya diperesa ba kot, piak bedawa masang audio enggau video ke dirikut ari talipun Anastasiya sereta gempuru ke dilawa iya. Piak bedawa ngumbai audio enggau video tu nunjukka iya amat ngereja pengawa “ekstremis”. Tang Anastasiya nyadika tu peluang meri saksi. Iya nerangka, ba gempuru Saksi-Saksi Jehovah, orang ke datai diajar chara ngemansangka kualiti Kristian baka penyinu, pengasih enggau pengeliat ati.

Maya iya meri jaku penutup ngagai bala ba kot, Anastasiya nerangka chara Bup Kudus udah ngemanahka pengidup iya. Iya madah: “Seharitu, aku diakim ketegal pengarap aku, laban aku macha Bup Kudus, begulai enggau bala kaban aku berandauka Bup Kudus nya, belaguka lagu puji ngagai Jehovah sereta besampi ngagai Iya.”

“Baka ni ku aku tau enda bedulika asuh ba Hebrew bagi 10 ayat 24 enggau 25? Dia madah: ‘Lalu aram kitai berundingka chara kitai tau nyungkak pangan diri ngayanka pengerindu lalu ngereja pengawa ti badas, enda ngelengkaka pengawa begempuru, baka sekeda orang, tang meransang pangan diri, lalu bebendar agi ngereja nya laban kita meda Hari Tuhan nyau semak.’ Enti Petara ti Pemadu Tinggi, iya nya Jehovah empu ngasuh aku begempuru enggau bala kaban aku, bala menyadi Kristian aku, ngambika kami macha Bup Kudus, meransang pangan diri sereta ngayanka pemanah ati ngagai pangan diri, baka ni ku aku tau enda ngasika Iya? Aku balat rinduka, bebasaka sereta nyembah Iya enggau pengabis ati.”

Kitai gaga ati ninga pasal Anastasiya ke udah ngetanka pengarap diri enggau berani, sereta ngayanka pengering enggau pengandal. Kitai besampi ngambika iya mengkang gaga ati lalu awakka penguji ti enda ngetu-ngetu tu deka ngenalamka kualiti pengeliat ati iya.—James 1:2, 3.