Kena 28 Oktober 2020, Kot Nengeri Dimitrovgrad ba Begian Ulyanovsk madahka enggai ngelepaska Menyadi Konstantin Bazhenov tumu, tauka nganti ukum jil iya enggau ukum mayar ganti rugi. Menyadi Konstantin Bazhenov ulih ngapil pemutus tu dalam sepuluh hari.

Endang amat, Menyadi Konstantin takut lebuh keterubah iya dijil kena bulan Jun 2018. Taja pia, iya berengkah nuliska ayat Bup Kudus dalam siti bup. Ke pengujung iya, Menyadi Konstantin ulih nulis kira-kira 500 iti ayat Bup Kudus ke dikingatka iya. Nyau kelama iya bulih siti Bup Kudus lalu macha iya abis dalam empat bulan. Iya nulis surat ngagai orang bukai, ngambika meransang sida nengah ayat ari Bup Kudus. Iya mega suah belagu lagu Perintah Petara sereta besampi enggau bendar, minta tulung ari Jehovah.

Menyadi Konstantin dijil pengelama 340 hari seraya iya nganti kes iya dipechara ba kot. Pengudah kot mutuska kes iya, lalu ngumbai iya besalah, iya diberi ukum jil pengelama tiga taun setengah. Taja pia, iya neruska jadual iya belajarka Bup Kudus sereta besampi ngagai Jehovah. Enggau saup ari Jehovah, Menyadi Konstantin indah ulih ngintu pengawa Ngingatka Pemati Jesus dalam rumah jil. Ketegal kaul iya enggau Jehovah ti rapat, Menyadi Konstantin ulih betan natka diri diperinsa enggau pengaga ati. Arapka kitai semua terus besampika Menyadi Konstantin.