Pengelama 18 bulan, bala polis enggau Federal Security Service (FSB), iya nya agen Rusia udah ngabas 613 buah rumah menyadi kitai enggau ngenyit. Berengkah ari Januari 2019, piak ti bekuasa nya udah datai ngenyit ngagai 332 buah rumah Saksi. Penyampau tu mayuh agi ari penyampau taun 2018, iya nya 281 buah rumah.

Dalam beberapa bulan tu, piak ti bekuasa majak balat nekan bala menyadi kitai. Bisi 71 buah rumah diabas enggau ngenyit kena bulan Jun, lalu 68 buah rumah kena bulan Julai. Penyampau tu mayuh agi ari taun 2018. Maya nya sida ngabas enggau ngenyit abis nadai 23 buah rumah tiap bulan.

Kesuah iya, maya piak ti bekuasa tu datai enggau ngenyit, sida datai beraban, ngena tutup mua, lalu bepegaika senyata. Pengudah sida tama, sida nuatka senyata nya ba mua bala Saksi, indah ngagai bala anak mit sereta sida ke udah tuai. Pengawa sida tu baka ke nunjukka bala Saksi nya penjenayah ti ulih ngemedis. Nya kebuah, sekeda orang pan setuju enggau utai ke disebut Doktor Derek H. Davis. Iya kala nyadi pengarah ba Baylor University’s J.M., ke belajar pasal entara pengarap enggau pemerintah iya nya, Dawson Institute of Church-State Studies. Iya madahka, “Rusia balat merinsa raban Saksi-Saksi Jehovah ke rinduka pemaik, lalu pengawa sida nya meh ke ‘ekstrem’.”

Amat ngenusahka ati lebuh majak mayuh rumah diabas enggau ngenyit, sereta majak mayuh ukum ke ngemedis bala menyadi kitai. Diatu, bisi 244 iku menyadi kitai ke didawa ba Rusia enggau Crimea. Penyampau tu dua kali lipat ari 110 iti kes dawa ke nyadi kena Disember 2018. Ari 244 iku menyadi ke didawa nya, bisi 39 iku ke ditan ba rumah jil, 27 iku ditan ba rumah, lalu 100 lebih iku menyadi kitai bisi takat ngereja dalam mayuh utai.

Taja pan bala menyadi kitai napi pemerinsa ke datai ari pemerintah Rusia, kitai enda “beguyat lebuh kitai kena perinsa.” Indah kitai majak dikeringka, lebuh kitai ninga bala menyadi kitai mengkang tetap ati sereta tegap. Kitai pan muji Jehovah, lalu beterima kasih ngagai Iya, laban Iya udah nyaut sampi kitai ke bala menyadi. Mimit pan kitai enda berasai kakang, Jehovah tentu deka nyaga sida.—1 Tesalonika 3:3, 7.