Kena April 2017, perintah ba menua Rusia nagang pengawa Saksi-Saksi Jehovah. Kenyau ari nya, lebih ari 500 iku bala menyadi ditangkap sereta dituduh ngereja pengawa ekstremis. Kira-kira 40 iku Saksi-Saksi Jehovah diukum jil sereta 15 iku ke bukai didenda. Lebih ari 80 iku Saksi-Saksi Jehovah dikumbai besalah, sereta diberi ukum jil ke ditangguh. Taja pan sida enda tama jil, tang ukum tu enda lurus sereta meri empas ngagai sida.

Nitihka undang-undang Rusia, akim bisi kuasa meri ukum jil ke ditangguh ari ke ngejil sida. Enti utai tu nyadi, akim deka meri sekat dalam siti timpuh. Enti ngelanggar sekat nya, kot deka nganjung orang ke besalah ngagai jil nitihka pemanjai ukum ke ditetapka.

Baka ni pendiau sida ke diberi ukum jil ke ditangguh, lalu baka ni Jehovah nulung bala menyadi kitai ba situasi tu? Kitai deka interbiu sekeda ari sida ke diberi ukum jil ke ditangguh entara dua ngagai enam taun. Sida deka nerangka penusah ke ditapi sida, sereta baka ni Jehovah nulung sida napi utai nya.

Peluang ulih nemu mayuh agi pasal sida ke napi ukum jil ti ditangguh meransang kitai besampi enggau suah agi sereta nyemetak agi pasal sida enggau ruang bilik sida. Peneleba sida nunjukka Jehovah nyaut sampi ke baka tu sereta nyukung nembiak Iya ti tetap ati enda ngira nama penusah ke ditapi.—2 Korint 1:3, 4.