24 SEPTEMBER 2021
RUSIA

Macha Bup Kudus sereta Pengawa Begempuru Ngeringka Menyadi Maksim Beltikov

TEBAH

BERITA TI PEMADU BARU | Kot Rusia Ngumbai Menyadi Maksim Beltikov Besalah

Kena 17 Januari 2022, Kot Pelilih Pavlovskiy ba Begian Krasnodar ngumbai Menyadi Maksim Beltikov besalah lalu meri iya ukum jil pengelama dua taun. Ukum tu berengkah tekala nya.

Garis Timpuh

29 Jun 2020

Enda diasuh ninggalka endur nya
23 Jun 2020

Kes jenayah berengkah. Tuduh: “enggau ba pengawa ngajar pengarap” nyengkaum “meri sereta ningaka cheramah ke bepelasarka litaricha pengarap”
29 April 2020

Piak bekuasa nyerungkai rumah Maksim. Udah nya, iya ditasat

Profil

Maksim Beltikov

Ada: 1980 (Baltiysk, Begian Kaliningrad)

Biograpi: Maya agi mit, rindu bemain musik tradisional. Gawa nyadi tukang batu bata. Petunggal iya ngajar iya Bup Kudus. Alit ati lebuh belajarka nama Petara, Jehovah. Jaku benabi ke udah dikeamatka ba Bup Kudus sereta jaku lalau ti beguna amat ngalitka ati iya. Dibaptisa nyadi seiku ari Saksi Jehovah kena taun 2001. Jadi enggau bini iya Mariya kena taun 2005. Seduai iya bisi tiga iku anak ke agi mit

Interbiu

Baka ni Jehovah nyukung nuan enggau diri sebilik lebuh napi pemerinsa tu?

Jehovah nyediaka semua utai ke diguna diri sebilik aku ba pengarap enggau fisikal. Bini enggau bala anak aku nguji enggau naka ulih meretika asai ati aku sereta nulung aku enda kelalu berundingka utai ke ngasuh aku tusah ati. Seiku menyadi meransang aku enggau jaku ba Masmur 23. Menyadi nya madahka: “Anang ngenyauhka diri ari Jehovah enggau gerempung Iya. Tang tejuka Iya nyaga nuan.”

Baka ni pengawa begempuru sereta macha Bup Kudus nulung nuan mengkang gaga ati?

Macha Bup Kudus ninting hari sereta datai ngagai semua gempuru nulung aku mengkang gaga ati sereta andal Jehovah deka nyukung aku. Kena 2018 aku enggau bini aku datai ngagai konvensyen ba Seoul, Korea Selatan. Kena Hari Minggu pencheramah bejaku ngagai menyadi ke bebansa Korea lalu minta sida ke kala tama jil ketegal pengarap sida bediri. Beribu iku bala menyadi lelaki bediri. Aku agi ingatka utai nya lalu madahka ngagai diri empu: ‘Enti sida iya ulih, aku mega ulih.’

Baka ni kaul nuan enggau Jehovah dikeringka agi sepemanjai pemerinsa tu?

Kaul aku enggau Jehovah ukai semina nyadi kering agi, tang bisi utai ke berubah. Sampi aku nyadi nyemetak agi. Ukai peminta aku nyadi nyemetak, tang chara aku meri terima kasih nyadi nyemetak agi. Aku berengkah macha Bup Kudus enggau chara ti baru, iya nya aku ngiga chunto ba dalam Bup Kudus ke napi utai ti sama enggau aku.

Arapka bala menyadi kitai ba Rusia terus ditegapka sereta diperansang lebuh macha Bup Kudus enggau ari pengerindu bala menyadi. Kitai nemu “Petara ti pun pengerindu enggau pemaik” deka terus ngimbai sida ke dikerinduka tu.—2 Korint 13:11.

Nuan Engka Rindu Meda Tu

BERITA TI PEMADU BARU

Dijil Ketegal Pengarap Sida—Rusia

Pegawai ari opis ti nyaga pengelikun dalam menua (FSB) nangkap Dennis Christensen laban iya sama enggau pengawa begempuru Saksi-Saksi Jehovah ke enda ngachau orang ba Oryol, Rusia.

BERITA TI PEMADU BARU