Kena 22 Jun 2021, Kot Pelilih Zavodskiy di Kemerovo ngumbai Aleksandr enggau Sergey besalah lalu meri seduai iya ukum jil pengelama empat taun ti ditangguh.

Aleksandr Bondarchuk

• Ada: 1974 (Topki, Begian Kemerovo)

• Biograpi: Lebuh iya beumur 19 taun, apai iya nadai. Iya kala nerima latih deriba perengka pengangkut besai baka piko. Udah nya iya nyadi tukang kayu. Diatu iya ngaduka serumbung api ke jai. Iya rindu nginti, bemain ski, nepan basikal sereta belanda

• Kena taun 1992 iya jadi enggau bini iya Elena. Entara sida sebilik, Elena ke dulu berengkah belajarka Bup Kudus enggau Saksi-Saksi Jehovah. Ketegal nitihka prinsip Bup Kudus, tikah seduai iya diselamatka. Seduai iya bisi dua iku anak lelaki.

Sergey Yavushkin

• Ada: 1960 (Rubtsovsk, Begian Altai)

• Biograpi: Dalam bepuluh taun iya nyadi tukang welding. Diatu iya nyadi tukang kunchi. Kenyau ari nembiak, iya rindu nebah gita sereta main mayuh bengkah sukan

• Iya jadi enggau bini iya Tatiana kena taun 1990. Enda lama pengudah nya, seduai iya berengkah belajarka Bup Kudus enggau Saksi-Saksi Jehovah. Utai ti ngalitka ati seduai iya, taja pan Bup Kudus ditulis jeman kelia, iya agi ngundan jaku lalau ti ngena kemayaharitu. Seduai iya bisi seiku anak lelaki enggau seiku anak indu

Kena pukul 6 pagi, 22 Julai 2019, bala pegawai piak ti bekuasa nyerungkai rumah Menyadi Aleksandr Bondarchuk enggau rumah Menyadi Sergey Yavushkin. Taja rumah sida kala diserungkai sebedau tu, tang kali tu seduai iya ditangkap lalu bini sida ditasat. Nambahka nya, bala pegawai nya ngerampas perengka elektronik sida.

Aleksandr seduai Sergey ditan pengelama dua hari. Udah nya, Kot Pelilih Kemerovo ngasuh seduai iya ditan ba rumah diri pengelama dua bulan. Timpuh seduai iya ditan ba rumah diri udah dikemanjaika enam kali.

Seraya seduai iya ditan ba rumah, seduai iya ditagang ari bejalai lebih 300 meter (984 kaki) ari rumah sida. Nya kebuah seduai iya enda ulih nurun kereja. Taja pia, sebedau kes jenayah tu berengkah, seduai iya udah ngembuan nama ti manah ba komuniti sereta enggau tuke sida. Ketegal tu, tuke Aleksandr enggau tuke Sergey sama betalipun ngagai pegawai ke ngemataka kes jenayah seduai iya, lalu minta iya ngemendarka Aleksandr seduai Sergey nurun kereja taja pan ditagang ari bejalai. Tang sayau, peminta dua iku tuke nya ditulak.

Sida Aleksandr sebilik suah ngasaika tulung Jehovah. Ketegal Aleksandr enda ulih gawa, lalu sida sebilik ditagang ari ngambi duit diri empu ari bank, sida tusah ngiga belanja. Tang iya madahka: “Asil ari semua penguji tu, aku bendar agi bepanggai ba Jehovah sereta arapka Iya ari ke suba. Engka suba aku enda sedarka tulung Jehovah ba pengidup aku. Tang diatu, endang nyata Jehovah semampai nyaup aku; indah sepemanjai hari, ninting hari. Iya seruran meri kami sebilik sukung sereta pengerindu ke diguna kami.”

Ketegal dituduh ngereja jenayah, Sergey berasai balat irau. Asil ari semua stres nya, iya kena strok. Taja pan iya napi penanggul ba pengerai tu, iya mengkang berunding enggau positif. Ku iya: “Kitai enda tau enda ingat, taja pan nya enda senang ditapi, penusah ke ninggang kitai diatu nya sementara aja, sereta mit.”

Sergey bulih pengering ari belematika ayat ba 1 Korint 15:58. Dia madah kitai ‘enda lebu gawa ke Tuan.’ Sergey nerangka: “Pengingat Jehovah nya amat sempurna, lalu iya tentu deka seruran ingatka pemadas pengawa kitai.”

Kitai besampi ke bala menyadi kitai ba Rusia ke udah natka diri diperinsa enggau ati ti liat dalam betaun-taun udah. Awakka sida bulih peransang sereta pengering ari Bup Kudus ti madahka, Jehovah “rinduka orang ke ngemesaika Iya, orang ke manggaika diri ba pengerindu Iya ti meruan belama iya.”—Masmur 147:11.