Kena 10 Februari 2021, Kot Pelilih Abinskiy ba Begian Krasnodar di Rusia, ngumbai Menyadi Aleksandr Ivshin besalah. Umur iya 63 taun. Iya diberi ukum jil pengelama tujuh taun setengah. Kenyau ari taun 2017 (lebuh gerempung Saksi-Saksi Jehovah ditagang ba menua Rusia) nyentukka diatu, nadai Saksi ke bukai diberi ukum jil ke sepanjai tu.

Aleksandr Ivshin

• Ada: 1957 (Katav-Ivanovsk)

• Biograpi: Sebedau iya badu gawa, iya nyadi tukang ngerarit kayu, tukang nebang kayu sereta injineer ke gawa ba senentang pengelikun. Kena taun 1974 iya jadi enggau bini iya Galina. Seduai iya ngembuan dua iku anak indu sereta lapan iku uchu

  Pengudah iya napi siti penyakit raya, iya berengkah berundingka nama reti pengidup. Dalam semalam aja iya macha abis tiga ari empat iti bup Injil. Sepengudah nya, iya belabuh belajarka Bup Kudus. Iya dibaptisa kena taun 1995

Saksi-Saksi Jehovah ba Abinsk napi sakal ba segi undang-undang kenyau ari taun 2015. Gerempung Saksi-Saksi Jehovah ke direjista ba nengeri nya dikumbai “ekstremis” lalu ditagang maya nya. Lima taun udah bekau nya, kena 23 April 2020, piak ti bekuasa ngepunka kes jenayah bedawaka Menyadi Aleksandr Ivshin. Iya dituduh ngereja pengawa “jenayah” baka ngatur gempuru Kristian nengah konferen video sereta belaguka lagu Perintah Petara.

Lebuh rumah Aleksandr seduai Galina diserungkai piak ti bekuasa, seduai iya balat ngasaika stres, nyentukka tekanan darah majak niki ba seduai iya lalu ulih nganu nyawa. Beberapa bulan pengudah rumah iya diserungkai, kerita Aleksandr pan dirampas. Taja pan napi penanggul tu, Aleksandr mengkang berunding enggau positif. Lebuh mantaika jaku penutup iya ba kot, Aleksandr madah: “Aku enda tekenyit laban udah didawaka, laban Jesus endang udah dulu madahka utai tu deka nyadi. Iya madah, ba Matthew 10:18, ‘Kita deka kena pechara di mua gabenor enggau raja ketegal aku, ngambika kita besaksi pasal aku ngagai sida enggau ngagai orang bansa bukai.’ . . . Ayat tu enda ngasuh aku balat tusah ati. Ukai! Tu ngagaka ati aku laban aku bepeluang madahka bala orang ke bepangkat tinggi ba kot tu pasal pengadang ke dianti aku enggau semua orang bukai ke ngaku diri begunaka iring Petara.”

Aleksandr seduai Galina sama enggau bala menyadi ba Rusia, serata di serata dunya, ke benung besaksika Berita Manah tu. Kitai andalka sida deka nerima upah ti besai ketegal manggaika pengarap sida ba Jehovah.—Jeremiah 17:7.