Kena 6 April 2021, Kot Pelilih Abinskiy ba Begian Krasnodar ngumbai Menyadi Aleksandr Shcherbina besalah lalu meri iya ukum jil pengelama tiga taun. Iya lalu terus ditaban ari kot ke rumah jil. Iya deka ngapil pemutus tu.

Aleksandr Shcherbina

• Ada: 1976 (Kholmskaya, Begian Krasnodar)

• Biograpi: Apai enggau indai iya sama udah nadai. Iya kala gawa deriba lori, nyadi mekanik kerita sereta tukang kayu

• Lebuh agi nembiak iya rindu main bul sereta bola keranjang. Lebuh beumur 20 lebih iya berengkah belajarka Bup Kudus enggau Saksi-Saksi Jehovah. Iya pechayaka Bup Kudus nya bendar pengudah iya meresa jaku benabi Bup Kudus ke udah dikeamatka. Iya dibaptisa kena taun 1999

Bala pegawai piak bekuasa ba Begian Krasnodar nyerungkai rumah Menyadi Aleksandr Shcherbina dua kali, kena bulan April enggau bulan Disember 2020. Kededua kali Aleksandr ditasat lalu Bup Kudus enggau perengka elektronik iya dirampas.

Kena 17 Mac 2021, Kot Pelilih Abinskiy berengkah bepecharaka kes Menyadi Aleksandr. Baka kes menyadi bukai ke kala dipechara ba kot nya, iya dipechara enggau jampat.

Enggau berani Aleksandr madah ba kot: “Iya ke amat, aku dituduh ketegal pechayaka Petara sereta nyadi Saksi Jehovah. Aku dituduh ngereja pengawa jenayah, taja pan hak aku endang patut dijaga di baruh Artikel 28 Undang-Undang Menua Rusia. Pengarap aku bepelasarka ajar Bup Kudus. Nya meh kebuah utai ke dipechaya aku endang nadai kala ulih dikumbai “ekstremis.””

Kitai beterima kasih ngagai Jehovah laban bala menyadi kitai ba Rusia terus netapka teladan ti manah ke kami pasal pengarap enggau pemerani. Lalu kitai nemu, seraya sida ‘ngereja peneka Petara’ enggau ati ti tan, Jehovah tentu deka merekatka sida.—Hebrew 10:36.