Kena 2 September 2021, Kot Pelilih Amur nulak apil Menyadi Aleksey Berchuk enggau Dmitriy Golik. Ukum jil asal ke diberi ngagai Aleksey tetap enda berubah, tang ukum jil ke diberi ngagai Dmitriy dikurangka sepuluh bulan. Seduai iya udah dipindahka ari endur alai sida ditan sementara ngagai rumah jil.

Kena 30 Jun 2021, Kot Nengeri Blagoveshchenskiy ba Begian Amur meri Aleksey ukum jil pengelama lapan taun, lalu Dmitriy diberi ukum jil pengelama tujuh taun. Sebedau tu, ukum jil ti pemadu panjai ke kala diberi ngagai seiku Saksi Jehovah ba Rusia (kenyau ari taun 2017 lebuh gerempung kitai ditagang) iya nya tujuh taun setengah. Seduai iya bela terus ditaban ke rumah jil ari kot pengudah pemutus nya digaga.

Aleksey Berchuk

• Ada: 1975 (Kartaly, Begian Chelyabinsk)

• Biograpi: Iya gawa nirika rumah sereta tukang kayu. Kena 1990-an iya berengkah belajarka Bup Kudus. Iya badu agi main sukan ti ganas lalu diatu iya rindu agi main bul enggau bala kaban. Iya dibaptisa kena taun 1998. Iya jadi enggau bini iya, Anna, kena taun 2008

Dmitriy Golik

• Ada: 1987 (Tokhoy, Republik Buryatia)

• Biograpi: Iya gawa nyalin jaku China ngagai jaku Rusia. Iya rindu sukan angkat berat, main bul sereta nebah gita

  Kena 1990-an, semua sida sebilik berengkah belajarka Bup Kudus. Iya dibaptisa kena taun 2002. Lebuh iya dikangau nyadi soldadu, iya minta ngereja pengawa bukai ari ke dilatih nyadi soldadu. Maya nya iya diasuh gawa ba rumah orang tuai. Iya jadi enggau bini iya Kristina kena taun 2012. Seduai iya sama belajarka jaku English enggau China ngambika ngemansangka pengawa nginjil sida

Ba pun taun 2018, bala pegawai perintah belalai masang kamera enggau mikrofon ba dalam rumah Menyadi Dmitriy. Kena bulan Jun 2018, bala pegawai Federal Security Service (FSB) nyerungkai tujuh buah rumah Saksi-Saksi Jehovah ba Blagoveshchensk. Pengudah nya, piak ti bekuasa ngepunka kes jenayah ngelaban Menyadi Dmitriy Golik enggau Aleksey Berchuk. Seduai iya dituduh ngatur pengawa ekstremis.

Piak ti bekuasa enda terus madahka Aleksey iya dituduh. Kena 21 Januari 2019, lebuh Aleksey sangkai ba Padang Bilun Domodedovo di Moscow, iya ngenyit ditangkap lebuh mandangka pasport diri. Seiku pegawai FSB ke bepangkat tinggi lalu ngemai Aleksey pulai baru ngagai nengeri asal iya, lalu iya enda nginsit ari dia nyentukka ditu, ketegal ditagang ari bejalai.

Seduai iya sama nerangka pemesai guna iya nyediaka diri dulu sebedau diuji. Dmitriy ngenang: “Taja kitai ngarapka diri ulih bibas nyembah Jehovah, tang ba maya ti sama, kitai patut nyediaka diri natka pemerinsa. Amat, aku ngereja utai ti praktikal kena nyediaka diri. Tang ke berat agi, utai ke pemadu mayuh nulung aku iya nya, negapka pengarap diri. Lebuh diperinsa, utai ti beguna nya ukai pemandai kitai tauka pengelandik kitai belalai ari orang ke ngiga kitai. Utai ti beguna nya, penaluk ngagai Petara. Sigi amat, Jesus ulih belalai ari bala munsuh iya, lalu tentu sida enda ulih tetemuka iya. Tang nya ukai tuju iya. Laban kitai tu murid Jesus, kitai ukai nguji nyeliahka pemerinsa sekali, tang kitai deka betan natka penguji enggau pemerani.”

Aleksey nambah: “Enti kitai berunding, ‘Tentu aku enda napi pemerinsa baka tu,’ kitai nipu diri empu. Endang terang, Jehovah nejuka semua utai tu nyadi. Enti nuan udah dulu sedarka utai tu lalu ngemansangka runding ti positif, lebuh nuan disakal, nuan deka senang agi nerima nya lalu betan. Nuan mega senang agi bepanggai ba tulung ke diberi Jehovah.”

Kitai nemu, bala menyadi kitai ba Rusia nyengkaum Aleksey, Dmitriy enggau bini sida, terus ngasaika pengamat jaku pemasmur ti madah: ‘Petara endang penyaup aku. Jehovah endang penyaga aku.’—Masmur 54:3, 4.