Kena 27 September 2021, Kot Pelilih Leninskiy di Ufa ngumbai Anatoliy besalah lalu meri iya ukum jil pengelama dua taun ti ditangguh.

Anatoliy Vilitkevich

• Ada: 1986 (Begian Khabarovsk)

• Biograpi: Iya tukang kayu. Iya jadi enggau Alyona kena taun 2008. Seduai iya rindu camping sereta niki bukit

  Kenyau ari mit, apai indai iya ngajar iya rinduka Penempa. Kelebih agi, iya rindu semaya Petara pasal mensia enggau jelu deka diau bebaik enggau pangan diri jemah ila. Kena taun 1997 iya dibaptisa, lebuh beumur 11 taun

Kena 8 April 2018, nama Menyadi Anatoliy Vilitkevich ayan ba lis orang ‘ekstremis’ ke dikemataka perintah Rusia. Baka Menyadi Dennis Christensen, Anatoliy mega entara bala Saksi Jehovah ti keterubah ditan pengudah Kot Besai Rusia nagang pengawa Saksi-Saksi Jehovah kena April 2017.

Bala pegawai polis ngelalaika kamera dalam apartment Anatoliy seduai Alyona. Ari video ke dirikut kamera tu, sida nuduh Anatoliy ngereja pengawa jenayah ketegal iya berandauka Bup Kudus enggau bala kaban iya. Diatu iya dituduh ngatur pengawa ke gerempung ke dikumbai “ekstremis.”

Lebuh Anatoliy ditangkap lalu ditabanka bala polis, seiku ari sida enggau kasar madahka Alyona, iya patut “ngiga laki baru.” Anatoliy madahka, lebuh iya ditasat, iya “berasai ditekan sereta balat stres. Sida madah, enti aku enda ngaku diri ngereja jenayah, bini aku enggau sida ke bukai ke kala datai ke rumah kami deka diperinsa. Sida suah madahka aku, nyau kelama bini aku deka dijil mega. Maya nya, aku besampi ngagai Jehovah, minta iya meri pemaik dalam ati aku.”

Anatoliy udah dijil pengelama dua bulan, ditan ba rumah nyau ka semilan bulan, sereta disekat ari bejalai ke endur bukai lebih ari setaun setengah. Lebuh iya dijil, iya nuliska dalam siti bup pasal teladan nembiak Bup Kudus ke napi pemerinsa. Ku iya: “Aku ingat, taja pan Jehovah enda ngelindung sida ari semua macham penusah, tang Iya tetap enda ninggalka sida. Tu ngeringka aku sereta ngingatka aku, Jehovah pan sama enggau aku. Utai ti pemadu beguna nya kitai mengkang tetap ati ngagai Iya.” Iya mega bulih peransang ari surat bini iya. Ku iya ngenang: “Dalam siti surat ke dikirumka iya, iya nyimpan sekeda gambar bala kaban enggau orang ke dikesayauka kami. Tiap malam aku meda gambar nya lalu nguji ingatka siti cherita pasal aku enggau orang ke dalam gambar nya. Tu nulung aku ngasaika sida baka ke ngimbai aku.”

Teladan Anatoliy seduai Alyona ti tetap ati meransang semua kitai. Kitai gaga ati laban nemu bala menyadi kitai ba Rusia majak rapat enggau Jehovah taja pan sida balat diperinsa. Kitai pan beterima kasih ngagai Jehovah laban ningaka sampi semua kitai ke ngarika sida.—2 Korint 1:11.