Kena 9 September, 2021, Kot Pelilih Birobidzhan ba Jewish Autonomous Region ngumbai Menyadi Andrey Gubin besalah, lalu meri iya ukum jil pengelama dua taun setengah ti ditangguh. Iya enda ibuh dijil ke diatu.

Andrey Gubin

• Ada: 1974 (Nengeri Saran, Kazakhstan)

• Biograpi: Iya bisi seiku abang enggau seiku kaka. Lebuh agi nembiak, sereta agi besekula, iya pan gawa part-time nyadi penulung tukang kunchi, ngambika nulung melanja diri sebilik. Udah nya, iya gawa enggau perengka ke mutong kayu enggau besi, sereta deriba perengka pengangkut besai baka piko. Iya rindu besukan, nuliska pantun sereta nebah perengka musik

• Kenyau ari mit iya balat irau pasal penyai ke nyadi ba dunya tu. Lebuh iya belajarka Bup Kudus, iya tetemuka pengelantang sereta nemu reti pengidup. Lebuh nemu pasal semaya ari Bup Kudus pasal penyai deka nadai agi, lalu mensia deka idup enggau pemaik, iya diperansang nyerahka diri ngagai Petara Jehovah. Iya dibaptisa kena taun 1991 lebuh iya beumur 17 taun. Kena taun 2007 iya jadi enggau bini iya Tatyana. Kena taun 2011 iya pindah ngagai Birobidzhan

Kena 12 Februari 2020, bala pegawai Federal Security Service (FSB) berengkah meresa Menyadi Andrey Gubin kena nuduh iya. Kena 17 September 2020, kes jenayah iya belabuh dipechara.

Tu siti ari 19 iti kes jenayah ke ngelaban bala menyadi kitai ba Jewish Autonomous Region. Semua kes jenayah tu nyadi ketegal operasi “Hari Pechara”, iya nya lebuh 150 iku pegawai piak bekuasa nyerungkai 22 buah rumah Saksi-Saksi Jehovah kena 17 Mei 2018. Kad kredit, duit, gambar, komputer enggau handphone bala menyadi dirampas polis.

Andrey enggau bini iya Tatyana ditagang ari ngambi duit diri empu ari bank. Ketegal tu, seduai iya amat tusah ngiga belanja. Nambahka nya, ketegal laki iya udah bebulan didawa ba kes jenayah tu, Tatyana napi penanggul ba pengerai. Taja pia, seduai iya bulih pengelantang ari macha Bup Kudus enggau bejarit. Kelebih agi, jaku lalau Bup Kudus pasal chara napi penusah amat mayuh nulung seduai iya betan.

Ari sukung ke diterima iya ari bala menyadi, Andrey andal agi ngagai Jehovah enggau gerempung Iya. Ambika chunto, bisi sekali maya Andrey berasai balat irau pasal utai ke ditapi iya. Iya berandau enggau seiku agi menyadi lelaki ke mega benung dipechara, lalu mantaika asai ati iya ngagai menyadi nya. Keterubah iya, menyadi nya ngingatka Andrey anang irau laban asai ati tu sigi biasa lebuh seseiku orang diperinsa. Udah nya, iya ngingatka Andrey pasal Jesus ke ngumbai nya basa ti besai lebuh iya diperinsa ketegal ngetanka nama Jehovah. Ku Andrey: “Pengudah randau nya, ati aku tendur ari pengirau aku. Aku keran deka terus ngereja peneka Apai kitai.”

Kitai besampi awakka Andrey seduai Tatyana deka terus bepanggai ba pengering enggau pengelantang ke diulih seduai iya ari Bup Kudus, sereta sukung ari bala menyadi kitai ba pengarap. Kitai ulih andal, ’orang ti nangika Petara selalu mujur dalam pengawa.’—Pengajar 8:12, Bup Kudus Berita Manah Ka Rebak Diatu.