3 OGOS 2021
RUSIA

Menyadi Andrey Okhrimchuk Bepanggai ba Pengering Jehovah

TEBAH

BERITA TI PEMADU BARU | Kena 3 Februari 2022, kot Fourth General Jurisdiction Court of Cassation nulak putap ke dikenataika Menyadi Andrey Okhrimchuk. Ukum asal ke diberi ngagai iya, iya nya ukum jil pengelama empat taun ti ditangguh, udah ditetapka. Iya enda ibuh tama jil ke diatu.

Garis Timpuh

22 Mei 2019

Seraban pegawai piak bekuasa nyerungkai rumah enggau kerita Andrey ba tumu pagi
29 Oktober 2020

Iya dituduh datai begempuru ti ngelanggar undang-undang lalu enggau pengawa ti nyukung gerempung ekstremis
5 April 2021

Kes pechara berengkah
2 Ogos 2021

Kot Pelilih Leninskiy ba Rostov-on-Don madahka Andrey dikumbai besalah. Kot meri ukum jil pengelama empat taun ti ditangguhka
4 Oktober 2021

Apil Menyadi Andrey ditulak Kot Pelilih Rostov. Ukum asal ke diberi ngagai iya udah ditetapka

Profil

Andrey Okhrimchuk

Ada: 1979 (Korosten, Ukraine)

Biograpi: Iya belajar ba bidang injinir. Sebedau nyadi seiku ari Saksi-Saksi Jehovah, iya seiku soldadu

Iya jadi enggau Yekaterina ba taun 2006. Seduai iya alit ati enggau jaku benabi ba Bup Kudus ti udah dikeamatka. Seduai iya dibaptisa kena taun 2007. Sida bisi seiku anak indu ke biak

Interbiu

Baka ni kaul nuan enggau Jehovah ditegapka sekumbang penguji tu?

Asai aku, aku enda ulih betan napi penguji tu enti nadai tulung ari Jehovah. Aku enda kala besampi ngemayuh nya ba pengidup aku. Aku berandau enggau Jehovah pasal utai ke dikeirauka aku sereta minta pengarap enggau pemerani ngambika aku enda takut enggau nama-nama utai. Aku ngasaika Jehovah ninga sampi aku lalu semua utai nya ba baruh jari Iya.

Nama utai ke meransang nuan mengkang taluk ngagai Jehovah lebuh napi penguji tu?

Aku ngingatka baru utai ke dipadah ba John 6:67, 68. Jesus nanya bala rasul iya enti sida mega deka ninggalka iya. Udah nya Peter nyaut “Sapa patut digagai kami?” Aku mega ngasaika utai ti sama. Kini ke penunga aku enti enda ngagai Jehovah? Semina jaku Jehovah ba Bup Kudus aja ke madahka pasal pengidup ti meruan belama iya, lalu Iya aja ke meri pengelurus ti bendar. Isaiah 30:15 mega nulung aku. Lebuh aku napi utai ti ngasaka ati, ayat tu nulung aku ngambika enda irau sereta pechayaka Jehovah.

Nama utai ke deka dikunsika nuan ngagai orang ke deka nyediaka diri ke penguji ila?

Anang bepanggai ba pengering diri empu. Tang pinta meh Jehovah nambahka pengarap enggau pemerani nuan. Keringka kaul nuan enggau bala menyadi Kristian ngambika nuan ulih bekunsika pengirau enggau sida lebuh nuan napi penusah.

Bala menyadi Kristian ba Rusia bisi pengarap ti tegap ke ulih nyadi chunto ke kitai. Kitai nemu menyadi Andrey enggau diri sebilik iya ulih napi penguji tu laban sida bepanggai ba Apai kitai di serega, Jehovah.—Masmur 37:5.

Nuan Engka Rindu Meda Tu

BERITA TI PEMADU BARU

Dijil Ketegal Pengarap Sida—Rusia

Pegawai ari opis ti nyaga pengelikun dalam menua (FSB) nangkap Dennis Christensen laban iya sama enggau pengawa begempuru Saksi-Saksi Jehovah ke enda ngachau orang ba Oryol, Rusia.

BERITA TI PEMADU BARU