Andrzej Oniszczuk, menyadi kitai ke berasal ari menua Polish, agi ditan ba Rusia, pia mega benung nganti maya kes iya diapil baru. Iya ditangkap piak bekuasa kena 9 Oktober 2018. Empai lama ti udah, timpuh iya dijil dipemanjaika agi dalam lima iti kes, iya nya nyentukka ngagai 2 Oktober 2019. Timpuh tu nyauka setaun kenyau ari iya berengkah ditan.

Sepemanjai Andrzej ditangkap, iya ditamaka ngagai rumah jil ti kediri. Berengkah ari pukul 6 pagi nyentukka pukul 9 malam, iya enda dikemendarka duduk. Iya semina dikemendarka mandi enggau ai angat seminggu sekali pengelama 15 minit. Andrzej udah dijil pengelama sepuluh bulan. Lalu bini iya Anna, enda dikemendarka ngelawa iya. Seduai iya semina bejaku enggau pangan diri nengah surat. Taja pan Anna udah mayuh kali minta pemendar ngelawa Andrzej, tang peminta iya tetap ditulak.

Baka riput ke sebedau tu, Andrzej ditangkap pengudah piak bekuasa ke bekenaka tuping mua ngabas rumah iya enggau ngenyit, sereta 18 buah rumah ke bukai ba Kirov. Andrzej dituduh seiku ari penjenayah ketegal iya belaguka lagu Perintah Petara sereta belajarka litaricha ke bekaul enggau pengarap iya.

Kelimpah ari Andrzej, empat iku da agi menyadi kitai ari Kirov mega ditangkap taun nyin kemari, lalu ditan sebedau kes sida diapil. Sida nya, Maksim Khalturin (44 taun), Vladimir Korobeynikov (66 taun), Andrey Suvorkov (26 taun), enggau Evgeniy Suvorkov (41 taun). Nyentukka seharitu, sida agi ditan ba rumah sida empu. Kes menyadi Andrzej enggau empat iku menyadi kitai nya tadi udah dibai ngagai Kot Eropah ke Bekaul enggau Hak Mensia.

Taun tu, pemerintah Rusia udah nuduh tujuh iku da agi menyadi lelaki kitai ba Kirov. Menyadi kitai ke pemadu tuai iya nya, Yevgeniy Udintsev ke beumur 70 taun. Semua penyampau Saksi-Saksi Jehovah ba Kirov ke ditan ketegal pengarap sida bisi 12 iku.

Arapka kitai seruran ingatka menyadi kitai Andrzej enggau bini iya Anna, sereta semua menyadi bukai ke dikesayauka kitai ba Rusia, baka ke dipadahka ayat tu, “Kingatka orang ke dalam jil, baka ke ngasaika kita empu kena jil sama enggau sida. Kingatka orang ke kena perinsa, baka ke ngasaika kita empu kena perinsa.”—Hebrew 13:3.