Kena 20 Julai 2021, Kot Pelilih Birobidzhan ba Jewish Autonomous Region ngumbai Menyadi Anna Lokhvitskaya besalah, lalu meri iya ukum jil pengelama dua taun setengah ti ditangguh.

Anna Lokhvitskaya

• Ada: 1993 (Birobidzhan)

• Biograpi: Iya dibesaika indai tunggal, ke ngajar iya idup sejalai enggau ajar Bup Kudus. Iya dibaptisa kena taun 2012. Iya nyadi tukang jait ti landik. Iya jadi enggau laki iya, Artur, kena taun 2018. Seduai iya sama rindu nginti, raun ke endur bukai sereta main volleyball

Kena 6 Februari 2020, Anna enggau lima iku menyadi Kristian indu ke bukai ba Birobidzhan dituduh piak ti bekuasa ngereja pengawa “ekstremis.” Ba endur nya, piak ti bekuasa bisi ngepunka 19 kes jenayah ngelaban bala Saksi Jehovah dia, nyengkaum laki Anna ke benama Artur, enggau mentua indu iya, Irina.

Pengidup seduai melaki-bini mayuh penekul ketegal kes jenayah tu. Seduai iya enda ulih bejalai ke endur bukai, ngambi duit sida ari bank, tauka bulih sekeda bantu ari perintah. Ketegal tu, Anna balat merinsa ba emosi, nyentukka bisi maya iya patut berubat.

Iya madahka beberapa iti utai ti udah nulung iya. Ku iya: “Lagu asal ari Berita JW ngasuh aku berasai nyamai agi. Tu ukai semina ngurangka pengirau aku, tang pia mega ngemetulka runding aku pasal utai ke ditapi. Siti agi utai ke nulung, lebuh suah sesais, aku ulih befokus agi ngagai utai ti meransang.”

Nambahka nya, Anna nerangka seduai laki iya Artur nguji ngenuluka orang bukai ari ke semina berundingka diri empu. Ku iya: “Kami ngaga juluk ati tiap bulan meri pemeri ngagai orang bukai, indah enti nya hadiah mit aja. Kami nguji berundingka orang bukai, ukai semina berundingka penanggul diri.”

Seraya iya nganti pemutus ari kot, iya ngumbai tu ‘peluang ti manah mandangka penetap ati ngagai Jehovah ari ulah iya.’—Masmur 18:25.