Kena 2 Februari 2021, a Kot Pelilih Birobidzhan ba Jewish Autonomous Region deka madahka jaku gerah pasal kes Menyadi Artur Lokhvitskiy. Iya engka deka dijil pengelama empat taun.

Artur Lokhvitskiy

• Ada: 1986 (Belgorodskoye, Jewish Autonomous Region)

• Biograpi: Lebuh Artur beumur tujuh taun, apai iya nadai. Iya udah gawa nyadi wireman, lalu pakar ba begian masang perengka pengelikun ari api. Ketegal iya gawa enggau bagas, iya udah diberi sijil pekereja puji

  Kenyau ari biak, indai Artur nulung iya ngembuan pengerindu ngagai Jehovah. Iya dibaptisa kena taun 1998 lebuh iya beumur 11 taun. Kena taun 2018, iya jadi enggau bini iya Anna. Seduai iya rindu raun sereta ngereja pengawa ba luar rumah

Kena bulan Mei 2018, semina tiga bulan pengudah Artur seduai Anna kawin, rumah seduai iya diserungkai. Maya nya, 150 iku polis nyerungkai 22 buah rumah Saksi-Saksi Jehovah (nyengkaum rumah Artur seduai Anna) ba operasi ke dikumbai “Hari Pechara.” Rumah indai Artur, Irina, pan bisi diserungkai maya nya. Kena 31 Julai 2019, bala ari Federal Security Service (FSB) ba Birobidzhan ngepunka kes jenayah lalu nuduh Artur ngereja pengawa ekstremis. Bini iya Anna enggau indai iya Irina mega dituduh, tang ba kes jenayah ke bukai.

Ketegal dituduh ngereja pengawa jenayah, tu ngujungka penanggul ba penatai pemisi ke sida sebilik. Piak ti bekuasa udah nagang Artur ari ngambi duit ari akaun iya ba bank. Kelimpah ari nya, tuke iya pan ngemba iya, madahka diri deka muai iya ari kereja.

Ketegal kes jenayah tu, pengawa besehari-hari sida sebilik pan dikachau. Artur nerangka: “Jadual kami sehari-hari seruran berubah. Tusah ga kami merambu pengawa dalam seminggu, indah dalam sehari aja pan tusah. Kami dikangau ngagai balai polis barang maya sida deka nasat kami. Nyadi, kami patut suah ngubah jadual kami.”

Artur seduai Anna beterima kasih ke sukung ari bala menyadi Kristian. Artur nerangka: “Bala menyadi nyukung kami ba pengarap sereta ba emosi. . . . Nadai jaku kami kena nerangka naka ni pengaga ati kami laban begulai enggau bala nembiak Jehovah. Pia mega, ngetanka nama Jehovah ba kot nya siti basa ti amat besai! Endang nyata, Jehovah nadai kala ninggalka orang ke enggi Iya!”

Sida Artur sebilik mega ngulihka pengering enggau pemerani ari suah besampi sereta belajarka Bup Kudus. Taja pia, tu enda selalu senang. Artur nerangka, pengudah operasi “Hari Pechara” nyadi, “Kami nadai Bup Kudus tauka litaricha.” Tu ngirauka ati Artur. Iya pan berunding, baka ni sida sebilik ulih terus belajarka Bup Kudus? Tang iya teingatka siti utai ti enda ulih diubah: “Sida [bala FSB] enda ulih nagang kami ari besampi. Tekala nya, kami terus besampi. Sampi meh utai ke nulung kami.”

Jehovah nyaut sampi sida enggau jampat, lalu nyediaka utai ke diguna sida ngambika neruska jadual sida kena ngeringka pengarap. Artur madah: “Kami enggau naka ulih bejarit belajarka Bup Kudus enggau diri sebilik, nyediaka gempuru, sereta macha Bup Kudus begulai. Tu ukai semina ngerapatka kaul kami sebilik, tang pia mega nulung kami betatika saup Petara ba pengidup kami sereta ngembuan runding ti positif.”

Kelimpah ari macha enggau belajarka Bup Kudus, sida mega bulih penguntung ari belematika berekat ke dianti sida jemah ila. Artur madah: “Kami berengkah suah agi belematika pengadang kami ke jemah ila, lalu ngambarka diri ba dunya baru.” Ku iya nampung: “Kami deka nulung meresi bumi tu, sereta nulung ba pengawa nirika bengunan. Pengadang tu ngeringka kami sereta meransang kami.”

Seraya nganti hari nya datai, Artur enggau Anna suah belematika jaku ba Hebrew 13:6 ti madah: ‘Jehovah endang penyaup aku, nya alai aku enda takut. Nama utai ulih dikereja orang ngagai aku?’ Artur madah: “Kami duai nguji ingatka, taja pan pengelepas kami ulih disekat, lalu piak ti bekuasa nyangka nagang kami ari begempuru, indah nyeraraka kami, tang nadai orang tau ngerampas utai ti pemadu beguna ari kami, iya nya kaul kami enggau Jehovah, peluang besampi, sereta pengadang ke jemah ila.”