Kena 2 Jun, 2021, Kot Nengeri Minusinsk ba Begian Krasnoyarsk ngumbai Menyadi Dmitriy Maslov besalah. Iya didenda 450,000 rubles (iya nya $6,125 U.S. tauka RM25,811).

Dmitriy Maslov

• Ada: 1976 (Minusinsk)

• Biograpi: Iya enggau dua iku menyadi iya ke biak agi dibesaika indai tunggal. Iya bulih degree ari kolej vokasional ba pengawa ngintu sarang indu manyi. Diatu iya gawa nyadi tukang paip. Iya rindu nepan basikal, main nyelam ba ai laut sereta nebah accordion

  Kenyau ari mit, iya mayuh tanya pasal pengidup. Iya tetemuka saut ti terang sereta ngemuaska ati dalam Bup Kudus. Iya dibaptisa kena taun 1994. Lebuh iya dikangau nyadi soldadu, iya nulak ketegal penemu ati iya, tang iya nerima pengawa bukai ke nadai sangkut paut enggau pengawa soldadu. Iya jadi enggau bini iya Yuliya kena taun 1997

Kena lemai 19 April 2019, bala soldadu enggau pegawai opis penasat (Investigative Committee) sereta Federal Security Service (FSB) nyerungkai lima buah rumah Saksi-Saksi Jehovah di Minusinsk. Lebuh maya nya, seiku menyadi lelaki ke beumur 76 taun dijuka ngagai lantai lalu bakal. Lebih ari 30 iku menyadi lelaki enggau indu ditangkap sereta ditasat lalu nyau kelama dilepaska baru. Pengudah nya, piak ti bekuasa ngepunka kes jenayah ngelaban Dmitriy. Iya dituduh ngereja “jenayah” laban iya ngatur seraban bala kaban begulai niki bukit, lalu maya nya sida bisi berandau pasal Petara enggau Bup Kudus.

Diatu, Dmitriy disekat ari bejalai ke endur bukai seraya iya nganti kot ngaga pemutus pasal kes iya. Indai iya, ke ukai Saksi Jehovah, ngasaika anak iya endang enda besalah sereta enda patut dikumbai penjenayah. Iya indah ngumbai pengarap ke dipegai anak iya nya ngemansangka pemaik.

Dmitriy bulih peransang sereta pemerani laban iya nemu Jehovah “meri pengering ngagai orang ke taluk ngagai Iya.”—2 Bansa Israel 16:9.