21 JANUARI 2021
RUSIA
Menyadi Feliks Makhammadiyev Dibibaska ari Jil ba Rusia Lalu Dipindahka Ngagai Menua Uzbekistan
Kena 31 Disember 2020, Menyadi Feliks Makhammadiyev dibibaska ari jil ba Rusia. Kot Pelilih Belyayevsky ba Begian Orenburg mutuska Menyadi Feliks deka ditan ba endur bukai nyentukka iya tau bulih surat ke diguna iya ngambika iya ulih dipindah ngagai menua asal iya, iya nya Uzbekistan. Tu nyadi laban, kenyau ari bulan April 2020, hak Feliks nyadi rayat menua Rusia dirampas perintah Rusia. Kena 20 Januari 2021, Feliks diasuh piak ti bekuasa nepan kerita api ke nuju ngagai Uzbekistan. Kami gaga ati meri jaku gerah pasal Feliks ke udah sangkai enggau likun ba Uzbekistan kena 21 Januari 2021. Bini iya, Yevgeniya, udah ngagai Uzbekistan dua hari dulu agi ari Feliks ngambika iya ulih nyambut penatai iya lebih Feliks sangkai.
Feliks udah diau ba Rusia kira-kira 18 taun. Kena taun 2002 lebuh iya agi nembiak, iya enggau indai iya pindah ari Uzbekistan ngagai Saratov, Rusia. Kena taun 2004, lebuh iya beumur 19 taun, iya dibaptisa. Iya jadi enggau Yevgeniya kena taun 2011.
Kena 12 Jun 2018, bala pegawai Federal Security Service (FSB) ke bepegai senyata sereta nutupka mua nyerungkai rumah Feliks seduai Yevgeniya. Feliks lalu ditangkap sereta ditan nyau ka setaun seraya nganti kes iya dipechara ba kot. Maya nya iya seruran besampi ngagai Jehovah, lalu sampi meh ke ngeringka iya. Iya nerangka: “Ninting hari aku besampi ngagai Jehovah, minta pemaik enggau pengaga ati ke sehari nya.”
Menyadi Feliks Makhammadiyev, kurang dua minggu pengudah iya balat amat dijamah bala jejaga jil
Pengudah nya, Feliks enggau lima iku menyadi bukai dikumbai besalah lalu diukum jil kena 19 September 2019. Pengudah apil sida ditulak ba kot, iya enggau empat iku menyadi lelaki bukai dianjung ngagai rumah jil ba Orenburg enggau penyauh 800 kilometer (500 batu) ari rumah enggau diri sebilik sida. Lebuh sida sangkai ba Orenburg, sida balat amat dijamah.
Sekumbang penguji ti balat tu, Feliks tetap mengkang gaga ati. Indah, iya ulih dikelala ari tuchum besai ke seruran bisi ba mua iya. Yevgeniya madah: “Aku balat temegahka iya! Lebuh iya dipechara ba kot iya betan enggau basa, lalu iya terus betan nyentukka diatu. Indah, iya nulung aku mega betan.”
Taja pan piak ti bekuasa ba Rusia deka ngemediska Feliks ngambika iya badu agi nyembah Jehovah. Tang iya empu madah, ari ke ngerusakka pengarap iya, pemerinsa tu udah ngeringka penaluk iya ngagai Jehovah. Tu ngingatka kitai pasal jaku ba Pemungkal 50:20, dia Josep madahka bala menyadi iya: ‘Kita ngiga akal ti jai kena kita ngeleban aku, tang Petara udah mutarka utai nya nyadi utai ti manah.’